Ariselu : పాకం టెన్షన్ లేకుండా అరిసెలు.. కేవలం 15 నిమిషాల్లో రెడీ!
ఈ వార్తాకథనం ఏంటి
అరిసెలు అంటే చాలా మందికి ఇష్టమైన సాంప్రదాయ స్వీట్. మెత్తగా, నోట్లో వేసుకుంటే కరిగిపోయే రుచితో తిన్నాక మరొకటి తినాలనిపించే ప్రత్యేకత వీటిదే. అయితే సంప్రదాయ పద్ధతిలో అరిసెలు చేయాలంటే ముందుగా బియ్యం నానబెట్టి పిండి పట్టించాలి. తర్వాత బెల్లంతో పాకం తయారు చేయాలి. పాకం కచ్చితంగా సరిగ్గా రాకపోతే అరిసెలు పాడైపోయే అవకాశం ఉంటుంది. కానీ ఇప్పుడు పాకం పట్టే టెన్షన్ లేకుండా, మొదటిసారి చేసే వారు కూడా సులభంగా పర్ఫెక్ట్గా చేసుకునే విధానం ఉంది. ఆ సింపుల్ రెసిపీని ఇప్పుడు చూద్దాం.
Details
కావాల్సిన పదార్థాలు
బియ్యప్పిండి - 2 కప్పులు బెల్లం తురుము - 2 కప్పులు యాలకుల పొడి - 2 టీ స్పూన్లు గోధుమపిండి - 1 కప్పు నెయ్యి - సరిపడా నువ్వులు - 8 టేబుల్ స్పూన్లు ఆయిల్ - డీప్ ఫ్రైకి సరిపడా
Details
తయారీ విధానం
ముందుగా ఒక మిక్సింగ్ బౌల్లో రెండు కప్పుల బియ్యప్పిండి, ఒక కప్పు గోధుమపిండి వేసి బాగా కలిపి పక్కన పెట్టాలి. ఇప్పుడు స్టవ్ ఆన్ చేసి ఒక గిన్నెలో రెండు కప్పుల బెల్లం తురుము, మూడు కప్పుల నీళ్లు వేసి బెల్లం పూర్తిగా కరిగే వరకు వేడి చేయాలి. బెల్లం కరిగిన తర్వాత రెండు టీ స్పూన్ల యాలకుల పొడి, నాలుగు టేబుల్ స్పూన్ల నువ్వులు, రెండు టేబుల్ స్పూన్ల నెయ్యి వేసి బాగా కలపాలి. ఇక్కడ ప్రత్యేకంగా పాకం పట్టాల్సిన అవసరం లేదు - బెల్లం కరిగితే చాలు. ఈ మిశ్రమం బాగా కలిసిన తర్వాత ముందుగా కలిపి పెట్టుకున్న బియ్యప్పిండి-గోధుమపిండి మిశ్రమాన్ని కొద్దికొద్దిగా వేస్తూ ఉండలు లేకుండా కలపాలి.
Details
ఫ్రైకి సరిపడా నూనె పోసి వేడి చేయాలి
మంటను లో ఫ్లేమ్లో ఉంచి మధ్యమధ్యలో కొద్దిగా నెయ్యి వేస్తూ మిశ్రమం దగ్గరపడే వరకు ఉడికించాలి. పిండి ముద్దలా మారి పాన్కు అంటకుండా విడిపోతే స్టవ్ ఆఫ్ చేసి చల్లారనివ్వాలి. ఇంతలో మరో గిన్నెలో నాలుగు టేబుల్ స్పూన్ల నువ్వులు వేసి సిద్ధంగా పెట్టాలి. పిండి గోరువెచ్చగా ఉన్నప్పుడు చేతికి కొద్దిగా నెయ్యి రాసుకుని సుమారు మూడు నిమిషాలు బాగా మర్దన చేయాలి. తర్వాత పిండిని చిన్న చిన్న ముద్దలుగా చేసి బంతుల్లా చేసుకోవాలి. ఇక కడాయిలో డీప్ ఫ్రైకి సరిపడా నూనె పోసి వేడి చేయాలి.
Details
ఇలా చేస్తే నోరూరించే అరిసెలు రెడీ
మరోవైపు బటర్ పేపర్ లేదా పాలిథీన్ కవర్ మీద కొద్దిగా నెయ్యి రాయాలి. ప్రతి పిండి ముద్దను తీసుకుని ముందుగా నువ్వుల్లో ముంచి, చేత్తో అరిసెల ఆకారంలో ఒత్తి బటర్ పేపర్పై పెట్టాలి. నూనె బాగా కాగిన తర్వాత మంటను మీడియం ఫ్లేమ్లో ఉంచి కడాయిలో సరిపడా అరిసెలు వేసుకోవాలి. వాటిని రెండు వైపులా తిప్పుతూ దోరగా కాల్చాలి. కాలిన తర్వాత ప్లేట్లోకి తీసుకోవాలి. అంతే... నోరూరించే అరిసెలు రెడీ! చల్లారిన తర్వాత వీటిని ఎయిర్టైట్ డబ్బాలో నిల్వ చేసుకుంటే ఎక్కువ రోజుల పాటు తాజాగా ఉంటాయి.