బతుకమ్మ పండగ: 9 రోజుల బతుకమ్మ, 8రకాల నైవేద్యాల గురించి తెలుసుకోండి
తెలంగాణలో బతుకమ్మ పండగను చాలా ఘనంగా చేస్తారు. ఆడబిడ్డల పండగగా బతుకమ్మ పండగను చెప్పుకుంటారు. ఆడబిడ్డలంతా కలిసి గునుగు, తంగేడు పూలతో కలిసి బతుకమ్మను తయారు చేస్తారు. ఆ తర్వాత బతుకమ్మ ఆడి దగ్గర్లోని చెరువులో నిమజ్జనం చేస్తారు. తొమ్మిది రోజుల పాటు బతుకమ్మ పండగను జరుపుకుంటారు. తొమ్మిది రోజులు బతుకమ్మను తయారు చేసి 8రకాల నైవేద్యం సమర్పిస్తారు. మొదటి రోజు - ఎంగిలిపూల బతుకమ్మ: భాధ్రపద అమావాస్య నాడు బతుకమ్మ పండగ ప్రారంభం అవుతుంది. మొదటిరోజున ఎంగిలిపూల బతుకమ్మ అని పిలుస్తారు. ఈరోజున బియ్యంపిండి, నువ్వులను నైవేద్యంగా సమర్పిస్తారు.
రెండవ రోజు - అటుకుల బతుకమ్మ
ఈరోజున అటుకులు, బెల్లం, సప్పిడి పప్పు కలిపి నైవేద్యంగా సమర్పిస్తారు. మూడవ రోజు - ముద్దపప్పు బతుకమ్మ: ఈరోజున ముద్దపప్పు, బెల్లం, పాలను గౌరమ్మకు నైవేద్యంగా సమర్పిస్తారు. నాలుగవ రోజు: నానబియ్యం బతుకమ్మ: ఈరోజున నానబియ్యం, బెల్లం, పాలను నైవేద్యంగా సమర్పిస్తారు. ఐదవ రోజు - అట్ల బతుకమ్మ: ఈరోజున అట్లను నైవేద్యంగా సమర్పిస్తారు. వీటిని గోధుమ పిండితో తయారు చేస్తారు.
ఆరవ రోజు - అలిగిన బతుకమ్మ
ఈరోజు బతుకమ్మ అలుగుతుంది. అందుకని ఈరోజు నైవేద్యం సమర్పించరు. ఏడవరోజు - వేపకాయల బతుకమ్మ: సకినాల పిండితో నైవేద్యాన్ని సమర్పిస్తారు. ఎనిమిది రోజు: వెన్నముద్దల బతుకమ్మ: బెల్లం, నువ్వులు, వెన్న వంటి పదార్థాలను నైవేద్యంగా సమర్పిస్తారు. తొమ్మిదవ రోజు: సద్దుల బతుకమ్మ: ఈరోజు పులిహోర, పెరుగన్నం, నువ్వుల సద్ది, కొబ్బరి అన్నం మొదలగు వాటిని నైవేద్యంగా సమర్పిస్తారు.
