Medak-Vikarabad Tourism Attractions: పర్యాటకుల మనసు దోచుకుంటున్న మెదక్-వికారాబాద్ ప్రాంతాలు.. నీతీ ఆయోగ్ నివేదిక
ఈ వార్తాకథనం ఏంటి
దేశంలోని పర్యాటక ప్రాంతాలను అందరికీ పరిచయం చేసి, ప్రజలను అక్కడికి వెళ్లేలా ప్రోత్సహించేందుకు నీతీ ఆయోగ్ 'దివ్యభారత్' పేరుతో ప్రత్యేక నివేదికను విడుదల చేసింది. ఈ నివేదికలో ఉమ్మడి మెదక్, వికారాబాద్ జిల్లాలకు చెందిన అనేక సందర్శనీయ ప్రదేశాలు, పిండి వంటలు, హస్తకళలకు ప్రాధాన్యం లభించడం విశేషం. ఇప్పుడు వాటి విశేషాలను తెలుసుకుందాం.
వివరాలు
నకాశీ కళకు అంతర్జాతీయ గుర్తింపు
నకాశీ కళ గ్రామీణ సంస్కృతిని ప్రతిబింబించే అరుదైన హస్తకళ. శతాబ్దం క్రితం చేర్యాలలో ప్రారంభమైన ఈ చిత్రకళ ఖండాంతర స్థాయిలో గుర్తింపు పొందింది. పురాణ కథల ఆధారంగా గంజి, గింజల అంబలి, సున్నంతో ఈ చిత్రాలను తయారు చేస్తారు. కాలానుగుణంగా ఈ కళలో మార్పులు వచ్చాయి. నిత్యవసర వస్తువులపై కూడా ఈ చిత్రాలు వేస్తున్నారు. కీచైన్లు, డబ్బాలు, పెన్నుల నిల్వ పెట్టెలు వంటి వస్తువులను తయారు చేస్తున్నారు. 2023లో జరిగిన జీ20 శిఖరాగ్ర సమావేశం 2023లోనూ, తెలంగాణ అభివృద్ధి కార్యక్రమాల్లోనూ ఈ కళాఖండాలు అతిథులకు అందించారు. ప్రస్తుతం నగరాల కార్యాలయాలు, పర్యాటక ప్రదేశాల్లో ఈ చిత్రాలు విస్తృతంగా కనిపిస్తున్నాయి.
వివరాలు
ప్రపంచవ్యాప్తంగా సర్వపిండి రుచి
సిద్దిపేట ప్రాంతానికి చెందిన సర్వపిండి ఎంతో ప్రసిద్ధి పొందిన చిరుతిండి. దీని తయారీ విధానం ప్రత్యేకంగా ఉంటుంది. ప్రత్యేక పాత్రల్లో శ్రద్ధగా తయారు చేస్తే వారం రోజులపాటు నిల్వ ఉంటుందని వ్యాపారులు చెబుతున్నారు. సుమారు రెండు దశాబ్దాల క్రితం ప్రాచుర్యంలోకి వచ్చిన ఈ వంటకం క్రమంగా ఇతర ప్రాంతాలకు విస్తరించింది. ప్రస్తుతం ఆంధ్రప్రదేశ్తో పాటు ఇతర రాష్ట్రాలు, విదేశాలకు కూడా పంపిస్తున్నారు. అమెరికా, ఆస్ట్రేలియా, సౌదీ, దుబాయ్ వంటి దేశాల్లో కూడా దీనికి మంచి ఆదరణ ఉంది.
వివరాలు
మహిమాన్వితం మెదక్ చర్చి
మెదక్ ప్రాంతం పేరు చెప్పగానే గుర్తుకు వచ్చేది చర్చి. మానవత్వం, మత సామరస్యానికి ప్రతీకగా నిలిచిన ఈ నిర్మాణం శతాబ్దం గడిచినా తన అందాన్ని కోల్పోలేదు. ఈ చర్చిని చార్లెస్ వాకర్ ఫాస్నెట్ నిర్మింపజేశారు. 1914 నుంచి 1924 వరకు నిర్మాణం సాగింది. సుమారు 350 ఎకరాల్లో విస్తరించి, ఐదు వేల మంది ఒకేసారి ప్రార్థనలు చేసుకునేలా నిర్మించారు. అద్దాల కిటికీలపై యేసుక్రీస్తు జన్మకథ చిత్రీకరణ ప్రత్యేక ఆకర్షణగా నిలుస్తుంది.
వివరాలు
చారిత్రక కీర్తి మెదక్ ఖిల్లా
మెదక్ ప్రాంతానికి ప్రతీకగా నిలిచింది మెదక్ ఖిల్లా. దీన్ని 12వ శతాబ్దంలో రెండో ప్రతాపరుద్రుడు నిర్మించారు. మొదట మెతుకుదుర్గంగా పిలిచిన ఈ కోట తరువాత మెదక్గా మారింది. సుమారు 500 మీటర్ల ఎత్తులో, వంద ఎకరాల విస్తీర్ణంలో నిర్మించబడింది. కాకతీయుల శిల్పకళకు ఇది అద్దం పడుతుంది. మూడు ప్రధాన ద్వారాలు ఈ కోటకు ప్రత్యేకత. నీటి కోసం తవ్విన పాలబావిలో ఇప్పటికీ నీరు ఉండటం ఆశ్చర్యకరం. తరువాత కాలంలో కుతుబ్షాహీ రాజులు మసీదును నిర్మించారు. కోటపై మూడు ఫిరంగులు ఇప్పటికీ కనిపిస్తాయి.
వివరాలు
ప్రకృతి అందాల నిలయం.. అనంతగిరి అడవులు
వికారాబాద్ సమీపంలోని అనంతగిరి అటవీ ప్రాంతం ప్రకృతి అందాలతో ప్రసిద్ధి చెందింది. సుమారు 3,750 ఎకరాల్లో విస్తరించిన ఈ ప్రాంతం ఆధ్యాత్మికత, ప్రకృతి సౌందర్యం కలయికగా నిలుస్తుంది. ఎత్తైన కొండల మధ్య ఉన్న అనంత పద్మనాభస్వామి ఆలయం ప్రధాన ఆకర్షణ. ఇక్కడ సైక్లింగ్, విద్యార్థుల విద్యా విహార యాత్రలు, వినోద కార్యక్రమాలు నిర్వహించేందుకు అనుకూలంగా ఉంటుంది. అందమైన దృశ్యాలను ఆస్వాదించాలనుకునే వారికి ఇది మంచి గమ్యం. పర్యాటక శాఖ ఆధ్వర్యంలో ఈ ప్రాంతాన్ని అభివృద్ధి చేస్తూ, భారీ వ్యయంతో పర్యావరణ పర్యాటక కేంద్రంగా తీర్చిదిద్దే చర్యలు కొనసాగుతున్నాయి.