Sergeant Stubby: యుద్ధంలో సైనికులకు అండగా నిలిచిన శునకం.. స్టబ్బీకి సార్జెంట్ హోదా
ఈ వార్తాకథనం ఏంటి
చరిత్రలో యుద్ధ వీరుల గురించి ఎన్నో కథలు వింటుంటాం. అయితే ఓ వీధి కుక్క మొదటి ప్రపంచ యుద్ధంలో సైనికులతో కలిసి యుద్ధరంగంలోకి వెళ్లి, ప్రాణాలకు తెగించి సేవలందించడమే కాకుండా 'సార్జెంట్' హోదా అందుకుందంటే నమ్మడం కష్టమే. అలాంటి అరుదైన ఘనత సాధించిన శునకమే 'స్టబ్బీ'. మొదటి ప్రపంచ యుద్ధంలో సేవలందించిన అత్యంత ప్రసిద్ధ యుద్ధ శునకాల్లో స్టబ్బీకి ప్రత్యేక స్థానం ఉంది.
వివరాలు
యేల్‌ యూనివర్సిటీ వద్ద సైనికులతో స్నేహం..
1917లో అమెరికాలోని యేల్‌ యూనివర్సిటీలో సైనిక శిక్షణ జరుగుతున్న సమయంలో స్టబ్బీ అక్కడికి చేరింది.
అది ఓ వీధి కుక్క. అక్కడ శిక్షణ తీసుకుంటున్న సైనికుల్లో జే. రాబర్ట్‌ కాన్రాయ్‌తో స్టబ్బీకి సాన్నిహిత్యం ఏర్పడింది.
దాని పొట్టి తోకను చూసి కాన్రాయ్‌ దానికి 'స్టబ్బీ' అనే పేరు పెట్టాడు.
అయితే సైనిక శిబిరం నిబంధనల ప్రకారం స్టబ్బీని వెంట తీసుకెళ్లేందుకు అనుమతి లేదు.
అయినప్పటికీ కాన్రాయ్‌ దాన్ని విడిచిపెట్టలేదు. ఫ్రాన్స్‌కు బయలుదేరిన యుద్ధ నౌకలో స్టబ్బీని రహస్యంగా తీసుకెళ్లాడు.
అలా అది అమెరికా 102వ పదాతిదళ రెజిమెంట్‌తో కలిసి యుద్ధరంగంలో అడుగుపెట్టింది.
వివరాలు
18 నెలల పాటు యుద్ధ సేవలు..
ఫ్రాన్స్‌లోని పశ్చిమ సరిహద్దులో సుమారు 18నెలల పాటు స్టబ్బీ సైనికులతో కలిసి సేవలందించింది.
ఈ సమయంలో మొత్తం 17 యుద్ధాల్లో, నాలుగు ప్రధాన దాడుల్లో పాల్గొంది.
సాధారణంగా సైనిక శునకాలకు ఉండే అధికారిక శిక్షణ లేకపోయినా.. తన సహజసిద్ధమైన సామర్థ్యంతో స్టబ్బీ అనేక సందర్భాల్లో సైనికులకు ఉపయోగపడింది.
విషవాయువును ముందే గుర్తించింది..
యుద్ధ సమయంలో ఒకసారి స్టబ్బీ మస్టర్డ్‌ గ్యాస్‌ దాడికి గురైంది. ఆ ప్రమాదం నుంచి ప్రాణాలతో బయటపడిన తర్వాత విషవాయువు వాసనను గుర్తించే సామర్థ్యం దానికి అలవడింది.
ఆ తర్వాత గ్యాస్‌ దాడి జరగబోతున్నట్లు అనిపించిన ప్రతిసారీ కందకాల మధ్య పరుగులు తీస్తూ గట్టిగా మొరుగుతూ సైనికులను అప్రమత్తం చేసేది.
దీంతో వారు ముందుగానే జాగ్రత్తలు తీసుకునే అవకాశం లభించేది.
వివరాలు
గాయపడిన సైనికుల గుర్తింపు..
యుద్ధభూమిలో గాయపడిన సైనికులను గుర్తించడంలోనూ స్టబ్బీ కీలకంగా వ్యవహరించింది.
గాయపడినవారి వద్దకు వెళ్లి వారి ఉనికిని గుర్తించేలా చేయడంతో వైద్య సిబ్బంది వారికి చేరుకునే అవకాశం ఏర్పడేది.
జర్మన్‌ గూఢచారిని పట్టుకోవడంలో కీలక పాత్ర..
స్టబ్బీ చేసిన సాహసాల్లో జర్మన్‌ గూఢచారిని పట్టుకోవడం కూడా ముఖ్యమైనది.
ఓ సందర్భంలో శత్రు సైనికుడిని గుర్తించిన స్టబ్బీ అతడిని కదలనివ్వకుండా పట్టుకుని ఉంచింది.
అమెరికా సైనికులు అక్కడికి చేరుకునే వరకు అతడిని వదల్లేదు.
ఈ ఘటన తర్వాత స్టబ్బీ ధైర్యసాహసాలకు మరింత గుర్తింపు వచ్చింది. దాని సేవలను గౌరవిస్తూ సైనికులు అనధికారికంగా దానికి 'సార్జెంట్' హోదా ఇచ్చారు.
వివరాలు
పతకాలు.. అధ్యక్షులతో భేటీ..
యుద్ధ సమయంలో గాయపడినప్పటికీ స్టబ్బీ తన సేవలను కొనసాగించింది. దాని ధైర్యం, సేవలకు గుర్తింపుగా పలు పతకాలు కూడా అందాయి.
మొదటి ప్రపంచ యుద్ధం ముగిసిన తర్వాత అమెరికాకు తిరిగి వచ్చిన స్టబ్బీ అక్కడ పెద్ద సెలబ్రిటీగా మారింది.
అంతేకాదు.. ముగ్గురు అమెరికా అధ్యక్షులను కలిసే అరుదైన అవకాశం కూడా దక్కించుకుంది.
వివరాలు
నిద్రలోనే ప్రశాంతంగా..
స్టబ్బీ 1926 మార్చిలో నిద్రలోనే ప్రశాంతంగా మరణించింది.
అయితే దాని కథ అక్కడితో ముగియలేదు. యుద్ధంలో చూపిన ధైర్యసాహసాలకు గుర్తుగా స్టబ్బీ భౌతికకాయాన్ని భద్రపరిచారు.
అనంతరం వాషింగ్టన్‌లోని స్మిత్‌సోనియన్ నేషనల్‌ మ్యూజియం ఆఫ్‌ అమెరికన్‌ హిస్టరీలో దాన్ని ప్రదర్శనకు ఉంచారు.
అలా ఓ సాధారణ వీధి కుక్కగా మొదలైన స్టబ్బీ ప్రయాణం.. యుద్ధరంగంలో సైనికులకు అండగా నిలిచిన వీర శునకంగా, చివరికి చరిత్రలో గుర్తుండిపోయే సైనిక చిహ్నంగా మారింది.