Anthropic AI Data Centers: డేటా సెంటర్లకు పవర్ కొరత.. 3.4 బిలియన్ డాలర్లు ఖర్చు చేసిన ఆంత్రోపిక్

వ్రాసిన వారు Balachander Sharma

Nov 09, 2026

09:32 am

ఈ వార్తాకథనం ఏంటి

ఆర్టిఫిషియల్ ఇంటెలిజెన్స్ రంగంలో పోటీ పెరుగుతున్న కొద్దీ డేటా సెంటర్లకు విద్యుత్ అవసరం కూడా భారీగా పెరుగుతోంది. ఈ పరిస్థితిని దృష్టిలో పెట్టుకుని AI సంస్థ ఆంత్రోపిక్‌ కీలక నిర్ణయం తీసుకుంది. తన డేటా సెంటర్లకు విద్యుత్ అందించేందుకు గ్యాస్‌తో పనిచేసే భారీ జనరేటర్ల కోసం ఏకంగా 3.4 బిలియన్ డాలర్ల ఒప్పందం చేసుకుంది. ఇందులో మొత్తం 1.7 గిగావాట్ల సామర్థ్యం ఉన్న జనరేటర్లు ఉన్నాయి. ఫైనాన్షియల్ టైమ్స్ ప్రకారం, ఒక AI కంపెనీ పవర్ పరికరాల కోసం చేసిన అతిపెద్ద సింగిల్ కొనుగోలు ఇదే. ఈ డీల్‌ను సెప్టెంబర్ చివర్లో శాన్ ఆంటోనియోకు చెందిన OnePWR Solutionsతో ఖరారు చేశారు.

Details

మొదట పవర్ తీసుకోవాలనుకుంది.. చివరకు ఆర్డర్లే చేతికి

వాస్తవానికి ఆంత్రోపిక్‌ మొదట OnePWR నుంచి విద్యుత్‌ను పొందాలని భావించింది.

కానీ తర్వాత వ్యూహాన్ని మార్చి, జనరేటర్ల ఆర్డర్లు, వాటి ఇన్‌స్టాలేషన్ ప్రక్రియను తానే చేపట్టాలని నిర్ణయించుకుంది.

ఈ యంత్రాలను సుమారు రెండేళ్ల క్రితం OnePWR సంస్థ Caterpillar నుంచి ఆర్డర్ చేసింది.

అయితే కొనుగోలు ప్రక్రియను పూర్తి చేయడానికి అవసరమైన నిధులు అందుబాటులో లేకపోవడంతో ఆ ఒప్పందం ముందుకు సాగలేదు.

ఇప్పుడు ఆ బాధ్యతను ఆంత్రోపిక్ తీసుకుంది. అయితే ఈ లావాదేవీలో OnePWR సంస్థను లేదా దాని ఉద్యోగులను ఆంత్రోపిక్‌ కొనుగోలు చేయలేదు.

అంటే ఇది కంపెనీ కొనుగోలు కాదు.. ప్రధానంగా పవర్ పరికరాలకు సంబంధించిన భారీ ఒప్పందం. ఇదే ఈ డీల్‌లో ముఖ్యంగా గుర్తుంచుకోవాల్సిన విషయం.

Details

Claude కోసం భారీ కంప్యూటింగ్ సామర్థ్యం

ఆంత్రోపిక్‌ ప్రస్తుతం తన Claude AI మోడళ్లకు పెరుగుతున్న డిమాండ్‌ను ఎదుర్కొంటోంది.

ఈ నేపథ్యంలో కంపెనీ భవిష్యత్తులో అవసరమయ్యే కంప్యూటింగ్, విద్యుత్ సామర్థ్యాలను ముందుగానే సమకూర్చుకుంటోంది.

ఇటీవల సవరించిన IPO దాఖలులో కూడా కంపెనీకి సంబంధించిన భారీ కంప్యూటింగ్ అవసరాలు బయటపడ్డాయి.

అందులో దాదాపు 895 బిలియన్ డాలర్ల కమిట్‌మెంట్లు ఉన్నట్లు వెల్లడైంది. వీటిలో ఎక్కువ భాగం కంప్యూటింగ్ పవర్, మౌలిక సదుపాయాలకు సంబంధించినవే.

రాబోయే పదేళ్లలో AI మౌలిక సదుపాయాల నిర్మాణానికి 500 బిలియన్ డాలర్లకుపైగా పెట్టుబడి పెట్టాలని ఆంత్రోపిక్ లక్ష్యంగా పెట్టుకుంది.

AI భవిష్యత్తు కేవలం సాఫ్ట్‌వేర్‌తోనే నడవదని ఈ పరిణామాలు చెబుతున్నాయి. దాని వెనుక భారీ డేటా సెంటర్లు, కంప్యూటింగ్ చిప్స్, విద్యుత్ వ్యవస్థలు కూడా ఉండాలి.