Apple: కొత్త ఐఫోన్లలో వేడి సమస్యకు చెక్.. ఆపిల్ తీసుకొచ్చిన కీలక మార్పులివే
ఈ వార్తాకథనం ఏంటి
ఆపిల్ తన తాజా ఐఫోన్ మోడళ్లైన ఐఫోన్ 18 ప్రో, ఐఫోన్ 18 ప్రో మ్యాక్స్‌తో పాటు ఐఫోన్ డుయోలో ఏ20 ప్రో (A20 Pro) పేరుతో కొత్త చిప్‌ను ఉపయోగిస్తోంది. ఫోన్‌లోనే సిరి ఏఐ లెక్కలు చేయడం, ఫొటోలను మెరుగ్గా ప్రాసెస్ చేయడం వంటి క్లిష్టమైన పనులను వేగంగా నిర్వహించేలా ఈ చిప్‌ను రూపొందించింది. అయితే, ఫోన్లలో అంతర్గతంగా స్థలం తక్కువగా ఉండటంతో చిప్ వల్ల ఉత్పత్తయ్యే వేడిని సమర్థంగా బయటకు పంపడం సవాలుగా మారింది. ఈ నేపథ్యంలో ఏ20 ప్రో చిప్‌తో పనితీరును పెంచుతూనే ఫోన్ వేడెక్కకుండా ఎలా నియంత్రిస్తున్నారో యాపిల్ బృందాలు పీసీమ్యాగ్ (PCMag)కు ఇచ్చిన ఇంటర్వ్యూలో వివరించాయి.
వివరాలు
ఏ20 ప్రో చిప్ డిజైన్‌లో ప్రత్యేకతలేంటి?
ఆపిల్ కంప్యూటర్లలో ఉపయోగించే ఎం-సిరీస్ చిప్‌లలోని కొన్ని డిజైన్ అంశాలను ఏ20 ప్రోలోనూ ఉపయోగించారు.
అయితే, సాధారణంగా ఫోన్ చిప్‌లలో మదర్‌బోర్డుపై స్థలం ఆదా చేసేందుకు భాగాలను నిలువుగా అమరుస్తారు.
దీనికి భిన్నంగా ఏ20 ప్రోలో వేఫర్-లెవల్ మల్టీచిప్ మాడ్యూల్ (WMCM) డిజైన్‌ను తీసుకొచ్చారు.
ఈ విధానంలో డీఆర్‌ఏఎం మెమొరీ మాడ్యూల్‌ను ప్రాసెసర్‌పై కాకుండా దాని పక్కనే అమరుస్తారు.
దీంతో డేటా వేగంగా బదిలీ కావడమే కాకుండా, చిప్ నుంచి వెలువడే వేడిని బయటకు పంపడం కూడా సులభమవుతుంది.
వివరాలు
కొత్తగా వచ్చిన ఇతర ఫీచర్లు ఏమిటి?
ఫోన్ల కోసం ఆపిల్ రూపొందించిన తొలి 2 నానోమీటర్ల చిప్ డిజైన్ ఏ20 ప్రో.
ఇందులో తక్కువ స్థలంలో ఎక్కువ ట్రాన్సిస్టర్లను అమర్చడంతో పాటు విద్యుత్ వినియోగాన్ని తగ్గించి, పనితీరును మెరుగుపరిచేలా తీర్చిదిద్దారు.
ఇందులో రెండు సూపర్‌ కోర్లు ఉంటాయి. ఇవి తక్కువ సమయంలో ఎక్కువ సామర్థ్యంతో పనులు పూర్తి చేస్తాయి.
మరో నాలుగు ఎఫిషియెన్సీ కోర్లు బ్యాక్‌గ్రౌండ్‌లో జరిగే పనులను నిర్వహిస్తాయి. ఈ చిప్‌తో పనితీరు 20 శాతం మెరుగుపడుతుందని ఆపిల్ చెబుతోంది.
ఇందులోని జీపీయూకు రెండో తరం న్యూరల్ యాక్సిలరేటర్‌ను కూడా జోడించారు. దీనివల్ల ప్రాసెసింగ్ సామర్థ్యం 50 శాతం పెరుగుతుందని కంపెనీ వెల్లడించింది.
వివరాలు
న్యూరల్ ఇంజిన్, డిస్‌ప్లేలో మార్పులు
ఏ20 ప్రోలో న్యూరల్ ఇంజిన్ కోసం 16 కోర్లతో కూడిన రెండు విభాగాలను ఏర్పాటు చేశారు.
దీంతో గత మోడల్‌తో పోలిస్తే కోర్ల సంఖ్య రెట్టింపైంది. ఈ మార్పు వల్ల ఫోన్‌లోనే ఏఐ లెక్కలను వేగంగా నిర్వహించవచ్చు.
ఐఫోన్ డుయోలో మాత్రం మరో ప్రత్యేక డిస్‌ప్లే ఇంజిన్‌ను అందించారు.
దీనివల్ల ఫోన్ లోపలి, బయటి స్క్రీన్‌లు ఒకేసారి పనిచేయగలవు. రెండు స్క్రీన్‌లపైనా పనులు చేస్తున్నప్పుడు వినియోగదారులకు అంతరాయం లేని అనుభవం లభిస్తుంది.
వివరాలు
ఫోన్ వేడిని నియంత్రించే వ్యవస్థలో మార్పులు
శక్తివంతమైన ఏ20 ప్రో చిప్ వల్ల ఉత్పత్తయ్యే వేడిని నియంత్రించేందుకు ఆపిల్ తన థర్మల్ మేనేజ్‌మెంట్ వ్యవస్థను పూర్తిగా మార్చింది.
చిప్‌కు, వేడిని వ్యాప్తి చేసే వేపర్ చాంబర్‌కు మధ్య అనుసంధానంగా 'మెటల్ ఓవర్ ఫోమ్' అనే కొత్త పదార్థాన్ని ఉపయోగించింది.
ఐఫోన్ 17 ప్రోలో ఉన్న వేపర్ చాంబర్‌తో పోలిస్తే కొత్త చాంబర్ పరిమాణం మూడు రెట్లు పెద్దదిగా ఉంటుందని కంపెనీ తెలిపింది.
ఇందులో డీ-అయనైజ్డ్ నీటిని కూడా ఎక్కువగా ఉపయోగించారు.
ఈ వ్యవస్థలో నీరు వేడిని ఒక చోటు నుంచి మరోచోటుకు బదిలీ చేయడంలో సహాయపడుతుంది. దీంతో చిప్ వేడిని ఫోన్ అంతటా సమర్థంగా వ్యాప్తి చేయవచ్చు.
వివరాలు
డిస్‌ప్లే వెనుక కొత్త రాగి పదార్థం
స్క్రీన్ వెనుక భాగంలో 'నానోట్విన్ కాపర్' అనే కొత్త పొరను ఆపిల్ ఉపయోగించింది.
ఇది డిస్‌ప్లేకు అవసరమైన దృఢత్వాన్ని అందించడంతో పాటు వేడిని వేగంగా ప్రసరింపజేస్తుంది.
స్మార్ట్‌ఫోన్లలో ఇప్పటివరకు చూడని విధంగా ఈ రెండు లక్షణాలను కలిపిన పదార్థాన్ని రూపొందించినట్లు కంపెనీ వివరించింది.
అంతేకాకుండా, డిస్‌ప్లే అంతటా వేడి సమానంగా వ్యాపించేలా, కొన్ని ప్రాంతాల్లో అధిక వేడి పేరుకుపోకుండా ఉండేలా అధిక ఉష్ణ వాహక సామర్థ్యం కలిగిన గ్రాఫైట్ పొరను కూడా అమర్చింది.
వివరాలు
ఐఫోన్ డుయో కీలు ద్వారా వేడిని బయటకు పంపే విధానం
మూడు ఫోన్లలోనూ వేడి నియంత్రణకు సంబంధించిన అనేక మార్పులు చేసినప్పటికీ,మడతపెట్టే డిజైన్ ఉన్న ఐఫోన్ డుయో విషయంలో ఆపిల్‌కు ప్రత్యేక సవాళ్లు ఎదురయ్యాయి.
ఈ ఫోన్ కోసం పలుచని వేపర్ చాంబర్‌ను రూపొందించారు.దీన్ని ఏ20 ప్రో చిప్‌తో అనుసంధానించినప్పటికీ,ఫోన్‌కు ప్రధాన నిర్మాణ ఆధారంగా కాకుండా స్వేచ్ఛగా కదలగలిగేలా అమర్చారు.
ఐఫోన్ డుయోను విప్పినప్పుడు చాలా పలుచగా ఉంటుంది.అయితే, మడతపెట్టినప్పుడు దాని మందం రెట్టింపవుతుంది.
దీనివల్ల వేడిని నియంత్రించడం మరింత క్లిష్టమవుతుంది. ఈ సమస్యను అధిగమించేందుకు ఆపిల్ కీలు (హింజ్) గుండా వంగగలిగే గ్రాఫైట్ పైపును అమర్చింది.
ఇది ఫోన్‌లోని రెండు భాగాల మధ్య వేడిని బదిలీ చేస్తుంది. దీంతో వేడి బయటకు వ్యాపించే ఉపరితల వైశాల్యం పెరిగి, ఫోన్ వేడెక్కకుండా నియంత్రించేందుకు వీలవుతుంది.