Apple: వచ్చే నెలలో యాపిల్ స్పెషల్ లాంచ్ ఈవెంట్.. ఎప్పుడు..ఎక్కడ చూడాలంటే..పూర్తి వివరాలు ఇవే
ఈ వార్తాకథనం ఏంటి
టెక్ దిగ్గజం ఆపిల్ వచ్చే నెలలో ప్రత్యేక లాంచ్ ఈవెంట్ నిర్వహించనున్నట్లు ప్రకటించింది. అయితే, ఈసారి కూడా ఏ ఉత్పత్తిని ఆవిష్కరించబోతున్నదన్న విషయంపై ఎలాంటి సంకేతాలు ఇవ్వలేదు. మార్చి 4, 2026న ఉదయం 9 గంటలకు (ఈస్టర్న్ టైమ్) ఈ కార్యక్రమం జరగనుండగా, భారత కాలమానం ప్రకారం అదే రోజు సాయంత్రం 7.30 గంటలకు ఈ ఈవెంట్ ఉంటుంది. ఈ ప్రకటనతో ఈ వారం ఐఫోన్ 17ఈ విడుదల అవుతుందన్న ప్రచారానికి కొంతవరకు బ్రేక్ పడినట్టైంది. కుపర్టినో కేంద్రంగా ఉన్న ఈ టెక్ సంస్థ తన రాబోయే ఈవెంట్లోనే కొత్త ఫోన్ను అధికారికంగా ఆవిష్కరించే అవకాశాలు ఉన్నట్లు సమాచారం.
వివరాలు
మార్చి 4న జరిగే ఈవెంట్లో ఆపిల్ ఏమి లాంచ్ చేస్తుంది?
అయితే ఐఫోన్తోపాటు బడ్జెట్ మ్యాక్బుక్, ఐప్యాడ్ కూడా త్వరలో విడుదలయ్యే అవకాశం ఉందని లీక్స్ వస్తున్నాయి. ఐఫోన్ 17e: ఐఫోన్ 17e (iPhone 17e) స్మార్ట్ఫోన్ ఈ నెలలోనే మార్కెట్లోకి వచ్చే అవకాశముందని తాజా లీకులు సూచిస్తున్నాయి. గత ఏడాది విడుదలైన ఐఫోన్ 16e కి కొనసాగింపుగా ఈ కొత్త మోడల్ను ఆపిల్ తీసుకురానుందని సమాచారం. పాత వెర్షన్తో పోలిస్తే ఇందులో పలు కీలక మార్పులు, మెరుగుదలలు ఉండవచ్చని అంచనా వేస్తున్నారు. లభ్యమవుతున్న వివరాల ప్రకారం, ఐఫోన్ 17e లో అత్యాధునిక A19 ప్రాసెసర్ను ఉపయోగించే అవకాశం ఉంది. అలాగే,మాగ్సేఫ్ సపోర్ట్ కూడా ఇందులో ఉండొచ్చని తెలుస్తోంది. డిజైన్ పరంగా సన్నని బెజెల్స్తో ఆకర్షణీయంగా రూపొందించే అవకాశం ఉందని టెక్ వర్గాలు భావిస్తున్నాయి.
వివరాలు
బడ్జెట్ మ్యాక్బుక్
ఈ ఫోన్కు సంబంధించిన మరిన్ని స్పెసిఫికేషన్లు త్వరలోనే బయటకు వచ్చే అవకాశముంది. ఆపిల్ సంస్థ తక్కువ ధరలో కొత్త మ్యాక్బుక్ను విడుదల చేయనుందనే చర్చలు కొంతకాలంగా వినిపిస్తున్నాయి. తాజా లీకుల ప్రకారం, ఈ బడ్జెట్ మ్యాక్బుక్ ఈ ఏడాది మార్చి నెలలో లాంచ్ అయ్యే అవకాశం ఉంది. దీని ధర సుమారు $699గా ఉండవచ్చని, అంటే భారతీయ కరెన్సీలో దాదాపు రూ.63,400 వరకు ఉండొచ్చని సమాచారం. ఈ కొత్త మ్యాక్బుక్ A18 ప్రో చిప్సెట్తో పనిచేసే అవకాశముందని చెబుతున్నారు. అలాగే 12.9 అంగుళాల LCD డిస్ప్లేతో ఇది అందుబాటులోకి రావచ్చని అంచనా. రంగుల విషయానికి వస్తే బ్లూ, పింక్, యెల్లో వంటి ఆకర్షణీయమైన కలర్ ఆప్షన్లలో విడుదలయ్యే అవకాశం ఉందని తెలుస్తోంది.
వివరాలు
మ్యాక్బుక్ ప్రో, మ్యాక్బుక్ ఎయిర్
బడ్జెట్ మ్యాక్బుక్తో పాటు, ఆపిల్ నుంచి కొత్త మ్యాక్బుక్ ప్రో,మ్యాక్బుక్ ఎయిర్ మోడల్స్ కూడా త్వరలో విడుదలయ్యే అవకాశం ఉందని సమాచారం. ఇవి కూడా మార్చి నెలలోనే లాంచ్ అయ్యే సూచనలు కనిపిస్తున్నాయి. మ్యాక్బుక్ ప్రో మోడల్స్లో శక్తివంతమైన M5 ప్రో, M5 మ్యాక్స్ చిప్సెట్లు ఉండే అవకాశం ఉందని టెక్ లీకులు చెబుతున్నాయి. మరోవైపు, మ్యాక్బుక్ ఎయిర్ మోడల్స్ M5 చిప్సెట్తో మార్కెట్లోకి రావచ్చని అంచనా. డిజైన్ పరంగా గత తరం మోడల్స్లానే ఉండే అవకాశం ఉంది. ఈ మ్యాక్బుక్ ఎయిర్ ప్రారంభ ధర సుమారు రూ.99,900గా ఉండవచ్చని తెలుస్తోంది. వీటితో పాటు కొత్త ఐప్యాడ్ మోడల్స్ను కూడా ఆపిల్ తీసుకురానున్నట్లు సమాచారం.
వివరాలు
ఐప్యాడ్లు
కొత్త ఐప్యాడ్ల విషయానికి వస్తే, 12వ తరం ఐప్యాడ్ A18 చిప్తో పనిచేసే అవకాశం ఉందని తెలుస్తోంది. అదే సమయంలో ఐప్యాడ్ ఎయిర్ మోడల్లో శక్తివంతమైన M4 చిప్ను ఉపయోగించే అవకాశముందని అంచనా వేస్తున్నారు. ఈ రెండు ఐప్యాడ్లు కూడా ఈ సంవత్సరం ప్రారంభ దశలోనే విడుదలయ్యే అవకాశం ఉంది. అయితే, వీటి ధరలపై ఇప్పటివరకు స్పష్టత రాలేదు. ఈ అన్ని ఉత్పత్తుల విడుదలపై ఆపిల్ సంస్థ నుంచి అధికారిక ప్రకటన మాత్రం ఇంకా వెలువడలేదు. త్వరలోనే పూర్తి వివరాలు వెల్లడయ్యే అవకాశముందని టెక్ నిపుణులు భావిస్తున్నారు.