El Niño: ఏడాది ముందే ఎల్‌నినో ముప్పును అంచనా వేయొచ్చు.. శాస్త్రవేత్తల కొత్త పరిశోధన!
ఈ వార్తాకథనం ఏంటి
ప్రపంచ వాతావరణంపై ప్రభావం చూపే ఎల్‌నినో, లానినా పరిణామాలను ఏడాది ముందుగానే అంచనా వేసేందుకు శాస్త్రవేత్తలు కొత్త మార్గాన్ని గుర్తించారు. పసిఫిక్‌ మహాసముద్రంలో నెలకొన్న పరిస్థితులను విశ్లేషించడం ద్వారా 12 నెలల ముందే వాతావరణ మార్పులను అంచనా వేయవచ్చని తాజా అధ్యయనం వెల్లడించింది. ఈ విధానం అందుబాటులోకి వస్తే కరవులు, వరదలు, తీవ్రమైన ఉష్ణోగ్రతల నుంచి నష్టాన్ని తగ్గించేందుకు ప్రభుత్వాలకు ముందస్తు ప్రణాళికలు రూపొందించుకునే అవకాశం లభిస్తుంది.
వివరాలు
ఎల్‌నినో, లానినా, తటస్థ పరిస్థితులు అనే మూడు దశలు
ఎల్‌నినో-సదరన్‌ ఆసిలేషన్‌ (ఈఎన్‌ఎస్‌ఓ) అనేది పసిఫిక్‌ మహాసముద్రంలోని సముద్ర ఉపరితల ఉష్ణోగ్రతలు, వాతావరణ పరిస్థితుల్లో ఏర్పడే సహజ మార్పులకు సంబంధించిన ప్రక్రియ.
ఇందులో ఎల్‌నినో, లానినా, తటస్థ పరిస్థితులు అనే మూడు దశలు ఉంటాయి.
ఈ పరిణామాలు ప్రపంచవ్యాప్తంగా వర్షపాతం, కరవులు, వరదలు, వడగాలులు, తుపానులపై ప్రభావం చూపుతాయి.
సాధారణంగా వీటి ప్రభావం డిసెంబరు సమయంలో గరిష్ఠ స్థాయికి చేరుకుంటుంది.
ఇప్పటివరకు ఈ పరిణామాలను సుమారు ఆరు నెలల ముందే అంచనా వేయగలుగుతున్నారు.
ఏడాది ముందుగానే కచ్చితమైన అంచనాలు ఇవ్వడం మాత్రం సవాలుగా మారింది.
వివరాలు
తొమ్మిది దేశాల 7,500కు పైగా అంచనాల విశ్లేషణ
ఆస్ట్రేలియాకు చెందిన సీఎస్ఐఆర్ఓ, మెల్‌బోర్న్‌ విశ్వవిద్యాలయ పరిశోధకులు తొమ్మిది దేశాల వాతావరణ నమూనాల ఆధారంగా రూపొందించిన 7,500కు పైగా పాత అంచనాలను పరిశీలించారు.
ఈ విశ్లేషణలో కీలక అంశాన్ని గుర్తించారు. అంచనా ప్రారంభించే సమయంలో పసిఫిక్‌ మహాసముద్రంలో లానినా పరిస్థితులు ఉంటే, ఏడాది తర్వాతి వాతావరణ పరిస్థితులను కూడా నమూనాలు మెరుగ్గా అంచనా వేస్తున్నట్లు తేలింది.
అదే తటస్థ పరిస్థితుల నుంచి అంచనా మొదలుపెట్టినప్పుడు ఫలితాలు అంత విశ్వసనీయంగా ఉండటం లేదని గుర్తించారు.
ఈ పరిశోధన వివరాలు 'సైన్స్‌ అడ్వాన్సెస్‌' జర్నల్‌లో ప్రచురితమయ్యాయి.
లానినా పరిస్థితులు ఉన్నప్పుడు దీర్ఘకాలిక వాతావరణ అంచనాలు మెరుగ్గా పనిచేస్తున్నాయని పరిశోధకురాలు డాక్టర్‌ మాండీ ఫ్రాయండ్‌ తెలిపారు.
వివరాలు
మెషీన్‌ లెర్నింగ్‌తో అంచనాలను మెరుగుపరిచే అవకాశం
తటస్థ పరిస్థితుల్లో సంప్రదాయ భౌతిక శాస్త్ర ఆధారిత నమూనాలు ఇబ్బందులు ఎదుర్కొంటున్నాయని వివరించారు.
ఇలాంటి సందర్భాల్లో మెషీన్‌ లెర్నింగ్‌, గణాంక పద్ధతులను ఉపయోగించడం ద్వారా అంచనాలను మరింత మెరుగుపరిచే అవకాశం ఉందని పరిశోధకులు భావిస్తున్నారు.
అయితే ఈ విధానాన్ని వాతావరణ అంచనా వ్యవస్థల్లో వెంటనే అమలు చేయలేమని శాస్త్రవేత్తలు స్పష్టం చేశారు.
మరిన్ని పరీక్షలు నిర్వహించాల్సి ఉందని తెలిపారు. ఈ పరిశోధన ఆధారంగా అభివృద్ధి చేసిన విధానం పూర్తిస్థాయిలో అందుబాటులోకి వస్తే రైతులకు ఎంతో ప్రయోజనం కలగనుంది.
పంటల ప్రణాళిక, నీటి నిర్వహణ, సాగునీటి వినియోగంపై ముందుగానే నిర్ణయాలు తీసుకునేందుకు వీలవుతుంది.
కరవులు, వరదలు వంటి ప్రకృతి విపత్తుల ముప్పును ఎదుర్కొనేందుకు కూడా ప్రభుత్వాలు ముందస్తు చర్యలు చేపట్టవచ్చు.