iPhone 17 Price Hike: యాపిల్ అభిమానులకు బిగ్ షాక్.. ఐఫోన్ 17 ధరలు భారీగా పెరిగే అవకాశం
ఈ వార్తాకథనం ఏంటి
ప్రముఖ టెక్ దిగ్గజం ఆపిల్ గత సెప్టెంబర్‌లో ఐఫోన్ 17 సిరీస్‌ను మార్కెట్లోకి తీసుకొచ్చిన విషయం తెలిసిందే. విడుదలకు ముందే భారీ హైప్ క్రియేట్ అయిన ఈ సిరీస్‌కు భారత్‌లో విశేష స్పందన లభించింది. ప్రస్తుతం కూడా ఐఫోన్ 17 మోడళ్లకు డిమాండ్ కొనసాగుతోంది. అయితే తాజా సమాచారం యాపిల్ అభిమానులకు నిరాశ కలిగించేలా ఉంది. నివేదికల ప్రకారం, కంపెనీ త్వరలో భారత మార్కెట్లో ఐఫోన్ 17 ధరలను పెంచే అవకాశాలు ఉన్నాయి. సుమారు రూ.7,000 వరకు పెరుగుదల ఉండవచ్చని తెలిసింది. అందువల్ల ఈ మోడల్ కొనాలని భావించే వారు ఆలస్యం చేయకుండా కొనుగోలు చేయడం మంచిదిగా సూచిస్తున్నారు, ఎందుకంటే ధర ఎప్పుడైనా పెరగవచ్చు.
Details
7వేలు పెరిగే అవకాశం
టిప్‌స్టర్ యోగేష్ బ్రార్ వెల్లడించిన వివరాల మేరకు, ఐఫోన్ 17 ధర త్వరలో రూ.89,990కి చేరే అవకాశం ఉంది. ప్రస్తుతం ఈ మోడల్ ధర రూ.82,900గా ఉంది. అంటే దాదాపు 7 వేల రూపాయల పెరుగుదల నమోదవుతుందన్నమాట. ఐఫోన్ 17కు ఉన్న భారీ డిమాండ్‌తో పోలిస్తే కంపెనీ వద్ద స్టాక్ పరిమితంగా ఉండటం, అధిక డిమాండ్-తక్కువ సరఫరా పరిస్థితి ధరల పెరుగుదలకు దారితీస్తోంది. అదనంగా, డాలర్‌తో పోలిస్తే రూపాయి బలహీనత కూడా ధరలపై ప్రభావం చూపే అంశంగా భావిస్తున్నారు. గతంలో కూడా ఈ పరిస్థితుల కారణంగా యాపిల్ భారత మార్కెట్లో ధరలను రివైజ్ చేసిన విషయం తెలిసిందే.
Details
ఖర్చులు గణనీయంగా పెరిగాయి
ఇక మరోవైపు, ఐఫోన్ 17లో ప్రవేశపెట్టిన అధునాతన ఏఐ ఫీచర్లకు అవసరమైన మెమరీ, హార్డ్‌వేర్ ఖర్చులు గణనీయంగా పెరిగాయి. ఈ వ్యయాలను కంపెనీలు స్వయంగా భరించాల్సి రావడం లేదా వాటిని వినియోగదారులపై మోపాల్సి రావడం సహజం. దీంతో ధరల పెరుగుదల అనివార్యంగా కనిపిస్తోంది. ఈసారి యాపిల్ బేస్ మోడల్ ఐఫోన్ 17లోనే మెరుగైన స్పెసిఫికేషన్లు అందించింది. 256GB స్టోరేజ్, 120Hz ప్రోమోషన్ డిస్‌ప్లే, మెరుగుపరిచిన కెమెరా వ్యవస్థ, మరింత ప్రీమియం డిజైన్ వంటి అప్‌గ్రేడ్స్‌ను అందించగా, ఐఫోన్ 17 ప్లస్ స్థానంలో సన్నని 'ఐఫోన్ ఎయిర్' మోడల్‌ను కూడా రిలీజ్ చేసింది.