Refund Scam: పెరుగు రిఫండ్‌ పేరుతో ఘరానా మోసం... మహిళ ఖాతాలో 98వేలు మాయం
ఈ వార్తాకథనం ఏంటి
ఆన్‌లైన్‌లో ఆర్డర్‌ చేసిన పెరుగు పాడైందని రీఫండ్‌ కోసం ప్రయత్నించిన బెంగళూరుకు చెందిన 56 ఏళ్ల మహిళకు ఊహించని షాక్‌ తగిలింది. గూగుల్‌లో బ్లింకిట్‌ కస్టమర్‌ కేర్‌ నంబర్‌ కోసం వెతికి, అక్కడ కనిపించిన నంబర్‌కు ఫోన్‌ చేయడంతో సైబర్‌ మోసగాళ్ల వలలో చిక్కుకున్నారు. వాట్సాప్‌లో వచ్చిన లింక్‌ను అనుసరించిన తర్వాత ఆమె బ్యాంకు ఖాతా నుంచి ఏకంగా రూ.98,000 డెబిట్‌ అయ్యాయి. నిమిషం వ్యవధిలోనే డబ్బు పోవడంతో ఆమె పోలీసులను ఆశ్రయించారు.
Details
పెరుగు పాడైందని ఫిర్యాదు చేయాలనుకుంటే..
బెంగళూరులోని వసంత్‌ నగర్‌కు చెందిన ఈ మహిళ అక్టోబర్‌ 17న బ్లింకిట్‌ ద్వారా నిత్యావసర సరుకులు ఆర్డర్‌ చేశారు.
డెలివరీలో వచ్చిన పెరుగు ప్యాకెట్‌ పాడైపోయినట్లు గుర్తించి, డబ్బు తిరిగి పొందేందుకు ప్రయత్నించారు.
ఇందుకోసం గూగుల్‌లో కస్టమర్‌ కేర్‌ నంబర్‌ వెతికారు. సెర్చ్‌లో కనిపించిన రెండు నంబర్లలో ఒకదానికి ఫోన్‌ చేశారు.
అవతలి వ్యక్తి వాట్సాప్‌లో ఓ లింక్‌ పంపి, పాడైన పెరుగు ప్యాకెట్‌ ఫొటోను అప్‌లోడ్‌ చేయాలని సూచించినట్లు పోలీసులకు ఇచ్చిన ఫిర్యాదులో పేర్కొన్నారు.
ఆమె అలాగే చేసిన కొద్దిసేపటికే మరో గుర్తుతెలియని వ్యక్తి ఫోన్‌ చేసి, రీఫండ్‌ ప్రక్రియ కొనసాగుతోందని చెప్పినట్లు సమాచారం.
గూగుల్‌ పే యాప్‌ను పరిశీలించాలని సూచించడంతో ఖాతాలో డబ్బు తగ్గిన విషయం ఆమె గుర్తించారు.
Details
ఒక్క నిమిషంలో రూ.98 వేల నష్టం
మహిళ బ్యాంక్‌ ఆఫ్‌ బరోడా ఖాతా నుంచి మధ్యాహ్నం 3:15 నుంచి 3:16 గంటల మధ్య రూ.98,000 డెబిట్‌ అయినట్లు ఫిర్యాదు వివరాలు వెల్లడిస్తున్నాయి. డబ్బు ఎలా బదిలీ అయిందనే విషయం ఇంకా స్పష్టంగా తెలియలేదు.
అక్టోబర్‌ 23న ఆమె బెంగళూరులోని సెంట్రల్‌ సైబర్‌ ఎకనామిక్‌ అండ్‌ నార్కోటిక్స్‌ (CEN) పోలీస్‌ స్టేషన్‌లో ఫిర్యాదు చేశారు. మోసానికి ఉపయోగించిన ఫోన్‌ నంబర్లు, లింక్‌పై పోలీసులు దర్యాప్తు చేస్తున్నారు.
ఇదే నగరంలో మార్చిలోనూ పాడైన పాలు తిరిగి ఇచ్చే ప్రయత్నంలో 65 ఏళ్ల మహిళ రూ.77,000 కోల్పోయిన ఘటన నమోదైంది.
Details
రీఫండ్‌ కోసం ఈ జాగ్రత్తలు తప్పనిసరి
బ్లింకిట్‌లో పాడైన లేదా దెబ్బతిన్న వస్తువులు వస్తే గూగుల్‌లో కనిపించిన ఫోన్‌ నంబర్లకు కాల్‌ చేయకుండా, అధికారిక యాప్‌లోని Help లేదా Customer Support విభాగం ద్వారా ఫిర్యాదు చేయాలి.
My Ordersలో సంబంధిత ఆర్డర్‌ను ఎంచుకుని, Need Help లేదా Raise a Complaint ద్వారా సమస్యను తెలియజేయవచ్చు.
గుర్తుతెలియని వ్యక్తులు పంపే వాట్సాప్‌ లింక్‌లను తెరవకూడదు. ఓటీపీ, యూపీఐ పిన్‌, బ్యాంకు పాస్‌వర్డ్‌లను ఎవరికీ చెప్పకూడదు. డబ్బు స్వీకరించడానికి యూపీఐ పిన్‌ నమోదు చేయాల్సిన అవసరం ఉండదని గుర్తుంచుకోవాలి.
అనుమానాస్పద లావాదేవీ జరిగితే వెంటనే బ్యాంకును సంప్రదించి, 1930 సైబర్‌ క్రైమ్‌ హెల్ప్‌లైన్‌కు ఫిర్యాదు చేయాలి. అలాగే జాతీయ సైబర్‌ క్రైమ్‌ పోర్టల్‌లోనూ ఫిర్యాదు నమోదు చేయవచ్చు.