Earth-Theia collision: భూమి-థియా ఢీకొనడంతో కేవలం 5 గంటల్లోనే చంద్రుడు ఏర్పడ్డాడా? కొత్త అధ్యయనంలో ఆసక్తికర విషయాలు
ఈ వార్తాకథనం ఏంటి
చంద్రుడు ఎలా ఏర్పడ్డాడనే దానిపై శాస్త్రవేత్తలు ఎప్పటి నుంచో పరిశోధనలు చేస్తున్నారు. సుమారు 450 కోట్ల సంవత్సరాల క్రితం 'థియా' అనే గ్రహం భూమిని ఢీకొట్టడంతో చంద్రుడు ఏర్పడ్డాడని ఇప్పటివరకు భావిస్తూ వచ్చారు. ఈ భారీ ఢీకొనడం వల్ల పెద్ద మొత్తంలో రాళ్లు, శిథిలాలు అంతరిక్షంలోకి ఎగసిపడ్డాయి. ఆ పదార్థమంతా కాలక్రమేణా ఒకదానితో ఒకటి కలుస్తూ చంద్రుడిగా ఏర్పడిందని శాస్త్రవేత్తలు చెబుతున్నారు. అయితే తాజాగా సౌత్వెస్ట్ రీసెర్చ్ ఇన్స్టిట్యూట్, యూనివర్సిటీ ఆఫ్ అరిజోనా శాస్త్రవేత్తలు చేసిన అధ్యయనం మాత్రం ఆసక్తికర విషయాన్ని వెల్లడించింది. చంద్రుడు ఏర్పడటానికి ఏళ్ల సమయం అవసరం లేకపోవచ్చని.. కేవలం ఐదు గంటల్లోనే చంద్రుడు రూపుదిద్దుకుని ఉండొచ్చని వారు చెబుతున్నారు.
వివరాలు
అనేక కంప్యూటర్ సిమ్యులేషన్లు రూపొందించిన శాస్త్రవేత్తలు..
ఈ ఘటనను అర్థం చేసుకునేందుకు శాస్త్రవేత్తలు అనేక కంప్యూటర్ సిమ్యులేషన్లను రూపొందించారు.
వాటిలో కొన్ని సిమ్యులేషన్లలో చంద్రుడు పూర్తిస్థాయి ఆకారంలోకి రావడానికి ఎక్కువ సమయం పట్టలేదని గుర్తించారు.
భూమి, థియా గ్రహాలు ఢీకొనే ముందు వాటి ఉష్ణోగ్రతలు ఎంత ఉన్నాయన్నదే చంద్రుడు ఎంత వేగంగా ఏర్పడటంలో కీలక పాత్ర పోషించిందని పరిశోధకులు తెలిపారు.
ఈ ఉష్ణోగ్రతల కారణంగానే ఢీకొన్న తర్వాత ఏర్పడిన భారీ శిథిలాల డిస్క్ ఎంత వేగంగా ఒకచోట చేరి చంద్రుడిగా మారిందో నిర్ణయించబడిందని డాక్టర్ అడీన్ డెంటన్ తెలిపారు.
వివరాలు
ఐదు గంటల్లోనే పూర్తిస్థాయిలో ఏర్పడిన చంద్రుడు..
తమ పరిశోధనలో గతంలో ఉపయోగించిన ఇంపాక్ట్ మోడలింగ్లోని అదే ప్రమాణాలను ఉపయోగించినట్లు డాక్టర్ డెంటన్ చెప్పారు.
భూమి, థియా రెండింటి అంతర్గత భాగాల్లో సమానమైన ఉష్ణోగ్రత నిర్మాణాలను పరిగణనలోకి తీసుకున్నప్పుడు.. సుమారు ఐదు గంటల్లోనే పూర్తిస్థాయి చంద్రుడు ఏర్పడినట్లు సిమ్యులేషన్లో కనిపించిందని ఆయన వివరించారు.
ఈ తాజా అధ్యయనం 'Astrophysical Journal Letters'లో ప్రచురితమైంది. చంద్రుడు ఎలా ఏర్పడ్డాడనే విషయాన్ని గత పరిశోధనలకు భిన్నంగా అర్థం చేసుకునేందుకు ఈ మోడల్ను రూపొందించారు.
గతంలో జరిగిన అధ్యయనాల్లో చంద్రుడు, థియాలను ద్రవ రూపంలో ఉన్న గ్రహాలుగా పరిగణించారు. అయితే వాటిలోని రాళ్ల బలాన్ని పరిగణనలోకి తీసుకోలేదు.
తాజా సిమ్యులేషన్లలో గ్రహ పదార్థాల బలాన్ని కూడా లెక్కలోకి తీసుకోవడంతో ఫలితాలు గణనీయంగా మారాయని పరిశోధకులు తెలిపారు.
వివరాలు
శాస్త్రవేత్తలు ఏం చెప్పారంటే..
గ్రహశకలాలు వంటి చిన్న ఖగోళ వస్తువుల మధ్య జరిగే ఢీకొనుళ్లను అధ్యయనం చేసేటప్పుడు వాటి పదార్థాల బలం చాలా ముఖ్యమని డాక్టర్ డెంటన్ చెప్పారు.
ప్లూటో-చారన్ వ్యవస్థ ఏర్పడటంపై తాను గతంలో చేసిన పరిశోధనలోనూ ఇదే అంశాన్ని పరిగణనలోకి తీసుకున్నట్లు తెలిపారు.
చంద్రుడి ఏర్పాటును పరిశీలించినప్పుడు కూడా ఉష్ణోగ్రత, పదార్థాల బలం.. పరిశోధనలో తేలిందని ఆయన వెల్లడించారు.
చంద్రుడిని సృష్టించిన ఈ చారిత్రక ఢీకొనడం సరిగ్గా ఎప్పుడు జరిగిందో తెలుసుకోవడానికి ఈ పరిశోధన ఉపయోగపడుతుందని శాస్త్రవేత్తలు చెబుతున్నారు.
అలాగే చంద్రుడి నిర్మాణంలో కనిపించే కొన్ని తేడాలు, అందులో ఉన్న అస్థిర పదార్థాల (volatile materials) పరిమాణం వెనుక కారణాలను అర్థం చేసుకోవడానికి కూడా ఈ ఫలితాలు సహాయపడతాయని భావిస్తున్నారు.