Google and Samsung: గూగుల్-శాంసంగ్ సంచలనం.. సిరికి సవాల్ విసిరిన జెమినీ AI
ఈ వార్తాకథనం ఏంటి
టెక్ ప్రపంచంలో మరోసారి హాట్ టాపిక్గా మారింది గూగుల్-శాంసంగ్ జంట. స్మార్ట్ఫోన్లలో ఆర్టిఫిషియల్ ఇంటెలిజెన్స్ను మరో స్థాయికి తీసుకెళ్లేలా గూగుల్ తన కొత్త AI మోడల్ Geminiను అప్డేట్ చేస్తున్నట్లు ప్రకటించింది. ఇకపై ఈ జెమినీ మల్టీ-స్టెప్ టాస్క్లను కూడా సులభంగా పూర్తి చేయగలదని గూగుల్ వెల్లడించింది. ఈ ఫీచర్ ముందుగా Pixel 10, Pixel 10 Pro, అలాగే Samsung Galaxy S26 ఫోన్లలో అందుబాటులోకి రానుంది. ఇటీవల జరిగిన ఈవెంట్లో ఆండ్రాయిడ్ ప్రెసిడెంట్ సమీర్ సామాత్(Sameer Samat) స్వయంగా ఈ ఫీచర్ డెమో చూపించారు.
వివరాలు
జెమినీకి ఆటో-బ్రౌజింగ్ ఫీచర్
తన ఫ్యామిలీ గ్రూప్ చాట్లో వచ్చిన మెసేజ్లను జెమినీ ఎలా విశ్లేషించి, అందరి ఇష్టాలను గుర్తించి, ఫుడ్ డెలివరీ యాప్ ద్వారా పిజ్జా ఆర్డర్ సిద్ధం చేసిందో చూపించారు. చివరగా యూజర్ కన్ఫర్మ్ చేస్తే సరిపోతుందని తెలిపారు. అంతేకాదు, జెమినీకి ఆటో-బ్రౌజింగ్ ఫీచర్ను కూడా గూగుల్ ఇప్పటికే గూగుల్ క్రోమ్ (Google Chrome)లో అందుబాటులోకి తెచ్చింది. త్వరలో వచ్చే ఆండ్రాయిడ్ అప్డేట్తో ఈ ఫీచర్ నేరుగా ఆపరేటింగ్ సిస్టమ్లోనే పనిచేయనుంది. దీంతో జెమినీ కేవలం చాట్బాట్ కాదు, రోజువారీ పనుల్లో సహాయకుడిగా మారబోతోందని గూగుల్ చెబుతోంది. ఇదిలా ఉండగా, AI రేస్లో గూగుల్ అడుగు ముందేసినట్టే కనిపిస్తోంది.
వివరాలు
iOS 27 వరకూ ఈ ఫీచర్లు పూర్తిగా అందుబాటులోకి..
గతంలో జరిగిన WWDC 2024లో ఆపిల్ కూడా సిరి కోసం ఇలాంటి ఫీచర్లు ప్రకటించినప్పటికీ అవి ఇంకా విడుదల కాలేదు. స్క్రీన్పై ఏముందో అర్థం చేసుకుని దానికి తగ్గట్టుగా స్పందించే సామర్థ్యం ఇంకా Siriలో కనిపించలేదు. ఆలస్యం కారణంగా ఆపిల్ ఒక ప్రకటనను కూడా వెనక్కి తీసుకున్నట్టు సమాచారం. రిపోర్టుల ప్రకారం ఈ ఫీచర్లు పూర్తిగా అందుబాటులోకి రావడానికి iOS 27 వరకూ వేచి చూడాల్సి రావొచ్చని తెలుస్తోంది. దీంతో AI రంగంలో జెమినీకి మరింత ఆధిక్యం దక్కే అవకాశాలు ఉన్నాయని టెక్ నిపుణులు భావిస్తున్నారు.