Google: గూగుల్‌ నుంచి కొత్త నానో బనానా 2.1.. ఇమేజ్‌ జనరేషన్‌ ఖర్చు సగానికి తగ్గింపు
ఈ వార్తాకథనం ఏంటి
గూగుల్‌ తన తాజా ఇమేజ్‌ జనరేషన్‌, ఎడిటింగ్‌ మోడల్‌ నానో బనానా 2.1 (Nano Banana 2.1)ను విడుదల చేసింది. 2026 ఫిబ్రవరిలో వచ్చిన మునుపటి వెర్షన్‌కు ఇది అప్‌గ్రేడ్‌ వెర్షన్‌. గత మోడళ్లతో పోలిస్తే దాదాపు అన్ని అంశాల్లో మెరుగైన పనితీరును అందిస్తుందని గూగుల్‌ తెలిపింది. ముఖ్యంగా ఇమేజ్‌లను రూపొందించేందుకు అయ్యే ఖర్చును గణనీయంగా తగ్గించింది.
వివరాలు
4K ఇమేజ్‌ ధర 0.0756 డాలర్లు
నానో బనానా 2.1లో ఇమేజ్‌ జనరేషన్‌ ఖర్చును మునుపటి వెర్షన్‌తో పోలిస్తే దాదాపు సగానికి తగ్గించారు.
ప్రస్తుతం 1K రిజల్యూషన్‌ ఇమేజ్‌ రూపొందించేందుకు 0.0336 డాలర్లు ఖర్చవుతుంది. గతంలో ఇదే ఇమేజ్‌కు 0.0670 డాలర్లు వసూలు చేసేవారు.
ఇక 4K ఇమేజ్‌ ధరను 0.1510 డాలర్ల నుంచి 0.0756 డాలర్లకు తగ్గించారు.
అయితే గూగుల్‌ అందిస్తున్న అత్యున్నత స్థాయి ఇమేజ్‌ మోడల్‌గా నానో బనానా ప్రో కొనసాగుతోంది.
ఇది తాజా ప్రో మోడల్‌ 3.1 ఆధారంగా పనిచేస్తుంది. కొత్త నానో బనానా 2.1 మాత్రం జెమినీ 3.6 ఫ్లాష్‌ను ఉపయోగిస్తోంది.
వివరాలు
నానో బనానా 2.1లో కీలక మార్పులు
నానో బనానా 2.1లో ఇమేజ్‌ నాణ్యత, చిత్రాల్లో టెక్స్ట్‌ను సరిగ్గా చూపించడం, ఒకే పాత్రను వివిధ ఇమేజ్‌ల్లో స్థిరంగా చూపించడం వంటి అంశాలను మెరుగుపరిచారు.
ఒకేసారి 14 రిఫరెన్స్‌ ఇమేజ్‌లను ఉపయోగించుకునే అవకాశం ఉంది.
వీటితో పాటు నాలుగు పాత్రలు, 10 వస్తువుల రూపాన్ని వరుస చిత్రాల్లో ఒకే విధంగా కొనసాగించే సామర్థ్యం ఈ మోడల్‌లో ఉంది.
గూగుల్‌ సెర్చ్‌తోనూ ఇది అనుసంధానమై పనిచేస్తుంది. ఇమేజ్‌ రూపొందించే సమయంలో మినిమల్‌, మీడియం, హై అనే మూడు స్థాయిల థింకింగ్‌ ఆప్షన్లు ఉన్నాయి.
వీటిని బట్టి ఇమేజ్‌ నాణ్యతలో మార్పులు ఉంటాయి.
వివరాలు
కొత్త మోడల్‌ ఎక్కడ అందుబాటులో ఉంది?
కొన్ని బెంచ్‌మార్క్‌ పరీక్షల్లో నానో బనానా 2.1, ప్రో మోడల్‌ కంటే మెరుగైన ఫలితాలు సాధించినప్పటికీ.. వాస్తవ వినియోగంలో ప్రతిసారీ ప్రో మోడల్‌ స్థాయి ఇమేజ్‌ నాణ్యతను అందించకపోవచ్చు.
అందుకే దీనిని ప్రో మోడల్‌కు మరింత సమర్థమైన ప్రత్యామ్నాయంగా గూగుల్‌ అభివర్ణించింది.
ఫ్లాష్‌ స్థాయి వేగంతో పనిచేసే నానో బనానా 2.1లో 1K, 2K, 4K రిజల్యూషన్లకు సపోర్ట్‌ ఉంది.
ఇప్పటికే ఇది జెమినీ యాప్‌, గూగుల్‌ సెర్చ్‌లోని AI మోడ్‌, గూగుల్‌ AI స్టూడియో తదితర గూగుల్‌ ఉత్పత్తుల్లో అందుబాటులోకి వచ్చింది.