CERT-In : గూగుల్ క్రోమ్లో తీవ్రమైన భద్రతా లోపం: CERT-In అలర్ట్
ఈ వార్తాకథనం ఏంటి
భారత ప్రభుత్వానికి చెందిన Indian Computer Emergency Response Team (CERT-In) గూగుల్ క్రోమ్ వినియోగదారులకు కీలక హెచ్చరిక జారీ చేసింది. ఎలక్ట్రానిక్స్,ఐటీ మంత్రిత్వ శాఖ ఆధ్వర్యంలో పనిచేస్తున్న CERT-In తెలిపిన ప్రకారం, విండోస్, మాక్, లినక్స్ వ్యవస్థల్లో ఉపయోగిస్తున్న పలు క్రోమ్ వెర్షన్లలో తీవ్రమైన భద్రతా లోపం ఉందని,దీనివల్ల సిస్టమ్ మొత్తం హ్యాకర్ల చేతుల్లోకి వెళ్లే ప్రమాదం ఉందని పేర్కొంది. ప్రత్యేకంగా రూపొందించిన HTML వెబ్ పేజీల ద్వారా హ్యాకర్లు ఈ లోపాన్ని దుర్వినియోగం చేయవచ్చని, అప్డేట్ చేయని బ్రౌజర్లతో సాధారణంగా ఇంటర్నెట్ బ్రౌజ్ చేసినా ప్రమాదం తప్పదని హెచ్చరించింది.
వివరాలు
క్రోమ్ అప్డేట్ చేయకపోతే సిస్టమ్ ప్రమాదంలో పడే అవకాశం
విండోస్, మాక్లలో 145.0.7632.75/76 కన్నా పాత వెర్షన్లు, లినక్స్లో 144.0.7559.75 కంటే తక్కువ వెర్షన్లు ఈ సమస్యకు గురవుతాయని చెప్పింది. క్రోమ్లోని CSS కంటెంట్ చూపించే భాగంలో ఉన్న లోపం వల్ల డేటా చోరీ, సిస్టమ్ నియంత్రణ, సేవల నిలిచిపోవడం వంటి సమస్యలు తలెత్తే అవకాశం ఉందని స్పష్టం చేసింది. ఈ లోపానికి CVE-2026-2441గా గుర్తింపు ఇచ్చినట్లు తెలిపిన CERT-In, గూగుల్ విడుదల చేసిన తాజా అప్డేట్ను వెంటనే ఇన్స్టాల్ చేసుకోవాలని సూచించింది. భారత్లో వ్యక్తిగతంగా, కార్యాలయాల్లో, విద్యా సంస్థల్లో విస్తృతంగా క్రోమ్ వినియోగం ఉన్న నేపథ్యంలో అప్డేట్ ఆలస్యం చేస్తే భారీ సైబర్ ముప్పు తప్పదని అధికారులు హెచ్చరిస్తున్నారు.