AI robot: కేవలం రూ.35 వేలకే ఏఐ రోబో.. కొత్త స్కిల్స్ మీరే నేర్పించొచ్చు..
ఈ వార్తాకథనం ఏంటి
ఆర్టిఫిషియల్ ఇంటెలిజెన్స్ (AI) రంగంలో ప్రముఖ సంస్థ హగ్గింగ్ ఫేస్ (Hugging Face) మరో ఆసక్తికరమైన ఆవిష్కరణను తీసుకొచ్చింది. మైక్రోడక్ (Microduck) పేరుతో రెండు కాళ్లపై నడిచే చిన్న రోబోను తాజాగా పరిచయం చేసింది. పేరుకు తగ్గట్టుగానే ఈ రోబో బాతు ఆకారాన్ని స్ఫూర్తిగా తీసుకున్నప్పటికీ.. దీనికి ఒకే ఒక కన్ను ఉండటం విశేషం. ఈ రోబోను ఈ ఏడాది చివర్లో సుమారు 400 డాలర్లకు (దాదాపు రూ.35 వేల) విక్రయించాలని కంపెనీ భావిస్తోంది. హగ్గింగ్ ఫేస్ నుంచి వస్తున్న రెండో రోబో ఇదే. గతంలో సంస్థ రీచీ మినీ (Reachy Mini) పేరుతో తొలి రోబోను మార్కెట్లోకి తీసుకొచ్చింది. ఇప్పటివరకు దాదాపు 10 వేల యూనిట్లు విక్రయించినట్లు కంపెనీ వెల్లడించింది.
వివరాలు
కొత్త నైపుణ్యాలు నేర్చుకునేలా..
మైక్రోడక్ కేవలం చూడటానికి ముద్దుగా ఉండే రోబో మాత్రమే కాదు.
రోబోటిక్స్, ఏఐపై ఆసక్తి ఉన్న కొత్తవారితో పాటు అనుభవజ్ఞులైన డెవలపర్లకు కూడా ఇది ఉపయోగపడేలా రూపొందించారు.
రీన్ఫోర్స్మెంట్ లెర్నింగ్, సిమ్యులేషన్, ఓపెన్ సోర్స్ సాఫ్ట్వేర్ సాయంతో ఈ రోబోకు కొత్త భౌతిక నైపుణ్యాలను నేర్పించవచ్చు.
ఇందుకోసం ప్రత్యేకమైన కోడింగ్ పరిజ్ఞానం అవసరం లేకుండా.. పైథాన్, జావాస్క్రిప్ట్ వంటి ప్రోగ్రామింగ్ భాషలను ఉపయోగించవచ్చు.
అంటే.. వినియోగదారులు తమకు కావాల్సిన పనులను రోబోకు నేర్పించేందుకు ప్రయోగాలు చేయవచ్చన్నమాట.
దీంతో ఏఐ, రోబోటిక్స్ ప్రపంచాన్ని స్వయంగా అన్వేషించాలనుకునే వారికి మైక్రోడక్ ఓ ఆసక్తికరమైన సాధనంగా మారనుంది.
వివరాలు
రోలర్ స్కేటింగ్ కూడా చేస్తుందిలా..
మైక్రోడక్ను ఫ్రాన్స్కు చెందిన పోలెన్ రోబోటిక్స్ (Pollen Robotics) అభివృద్ధి చేసింది.
ఈ సంస్థను హగ్గింగ్ ఫేస్ గతేడాది కొనుగోలు చేసింది. మైక్రోడక్ దాదాపు 10 అంగుళాల ఎత్తు, సుమారు 770 గ్రాముల బరువు ఉంటుంది.
కంపెనీ నిర్వహించిన డెమోలో ఈ చిన్న రోబో పలు ఆసక్తికరమైన నైపుణ్యాలను ప్రదర్శించింది.
సమతల ప్రదేశాల్లో రోలర్ స్కేటింగ్ చేయడం, సాక్స్ వంటి చిన్న వస్తువులను గుర్తించి తీసుకురావడం వంటి పనులను చేసింది.
వివరాలు
సెన్సార్లు ఎన్నో..
మైక్రోడక్లో పలు అధునాతన సెన్సర్లను ఏర్పాటు చేశారు. ఇందులో లైడార్ (LiDAR), ఆన్బోర్డ్ కెమెరా, మైక్రోఫోన్, స్పీకర్ ఉన్నాయి.
యాక్సెసరీలను జత చేసేందుకు రెండు NFC రీడర్లను కూడా అందించారు.
వీటితో పాటు వైఫై, బ్లూటూత్ కనెక్టివిటీ కూడా ఉంది. మైక్రోడక్లో ముందుగానే కొన్ని ప్రవర్తనా విధానాలను పొందుపరిచారు.
దీంతో ప్రత్యేకంగా కోడ్ రాయకుండానే చుట్టూ ఉన్న వాతావరణంతో రోబో కొన్ని రకాలుగా స్పందించగలదు.
వివరాలు
గేమ్ కంట్రోలర్ ద్వారా రోబోతో కదలికలు..
వినియోగదారులు రోబోను నడిపిస్తూ వివిధ ప్రదేశాలకు తీసుకెళ్లవచ్చు.
అంతేకాదు.. లేజర్ పాయింటర్ లేదా గేమ్ కంట్రోలర్ ద్వారా రోబోతో కొన్ని కదలికలను చేయించవచ్చు.
ఏఐ సాంకేతికత అందరికీ అందుబాటులో ఉండేలా చేయడమే తమ లక్ష్యమని హగ్గింగ్ ఫేస్ సహ వ్యవస్థాపకుడు, చీఫ్ సైన్స్ ఆఫీసర్ థామస్ వోల్ఫ్ తెలిపారు.
ఏఐతో ప్రయోగాలు చేయడం కేవలం నిపుణులకు మాత్రమే పరిమితం కాదని.. సాధారణ వినియోగదారులు కూడా రోబోటిక్స్లో కొత్త విషయాలను నేర్చుకునేలా చేయాలనుకుంటున్నామని ఆయన పేర్కొన్నారు.