SpaceX rocket: స్పేస్ఎక్స్ రాకెట్పై భారత స్టార్టప్ తొలి ఆర్బిటల్ కంప్యూటింగ్ ఉపగ్రహం
ఈ వార్తాకథనం ఏంటి
భారత అంతరిక్ష రంగానికి చెందిన స్టార్టప్ టేక్మీ2స్పేస్ (TakeMe2Space) కీలక ప్రయోగానికి సిద్ధమవుతోంది. దేశంలోనే తొలి ఆర్బిటల్ కంప్యూటింగ్ ఉపగ్రహంగా పేర్కొంటున్న 'MOI-1A'ను అక్టోబర్ 1న ప్రయోగించనుంది. ఈ ప్రయోగాన్ని స్పేస్ఎక్స్ చేపట్టనుంది. 50 కిలోల కంటే తక్కువ బరువున్న ఈ ఉపగ్రహంలో ఎన్విడియా (NVIDIA)కు చెందిన Orin NX ఎడ్జ్ కంప్యూటింగ్ ప్రాసెసర్లు అమర్చారు. స్పేస్-X నిర్వహించే Transporter-18 రైడ్షేర్ మిషన్లో భాగంగా MOI-1Aను కక్ష్యలోకి పంపనున్నారు.
వివరాలు
23 మంది కస్టమర్లు ఇప్పటికే సిద్ధం
ఈ సేవ కోసం ఇప్పటికే 23 మంది కస్టమర్లు టేక్మీ2స్పేస్తో ఒప్పందం చేసుకున్నారు.
వీరిలో భౌగోళిక సమాచార వ్యవస్థ (GIS) సంస్థలు, విద్యా సంస్థలు ఉన్నాయి.
వ్యవసాయం, మైనింగ్, సరఫరా గొలుసు నిర్వహణ, బీమా తదితర రంగాలకు చెందిన వాణిజ్య సంస్థలు ఈ సేవలను ఉపయోగించుకోనున్నట్లు సంస్థ వ్యవస్థాపకుడు, సీఈవో రోనక్ సమంత్రే రాయిటర్స్కు తెలిపారు.
అమెరికాకు చెందిన అంతరిక్ష డేటా విశ్లేషణ సంస్థ లిటిల్ ప్లేస్ ల్యాబ్స్ కూడా ఈ ప్రాజెక్టులో కస్టమర్గా ఉంది.
వివరాలు
MOI-1A ఉపగ్రహం ఎలా పనిచేస్తుంది?
MOI-1A ఉపగ్రహం ఎలా పనిచేస్తుందంటే.. కస్టమర్లు తమ AI మోడళ్లను కంటైనర్ల రూపంలో ఉపగ్రహానికి అప్లోడ్ చేయవచ్చు.
ఉపగ్రహం నిర్దిష్ట ప్రాంతం మీదుగా ప్రయాణిస్తున్న సమయంలో అక్కడి నుంచి సేకరించిన డేటాను కక్ష్యలోనే ప్రాసెస్ చేస్తుంది.
పూర్తి డేటాను భూమికి పంపకుండా.. అవసరమైన విశ్లేషణ ఫలితాలను మాత్రమే తిరిగి పంపుతుంది.
దీంతో భారీ మొత్తంలో ముడి డేటాను భూమికి డౌన్లోడ్ చేసి, అక్కడ కంప్యూటింగ్ చేయాల్సిన అవసరం తగ్గుతుంది.
ఫలితంగా డేటా ప్రాసెసింగ్ ఖర్చులు కూడా తగ్గే అవకాశం ఉంది.
వివరాలు
భవిష్యత్తులో మరిన్ని పెద్ద ఉపగ్రహాల నెట్వర్క్ నిర్మాణం
భవిష్యత్తులో మరింత పెద్ద నెట్వర్క్ ఉపగ్రహాలను ఏర్పాటు చేయాలని టేక్మీ2స్పేస్ లక్ష్యంగా పెట్టుకుంది.
ఒకేసారి పలువురు కస్టమర్లకు సేవలు అందించేలా పరస్పరం అనుసంధానమైన ఉపగ్రహాల వ్యవస్థను నిర్మించాలని భావిస్తోంది.
2024 చివర్లో నిర్వహించిన సాంకేతిక ప్రదర్శన ప్రయోగంలో యాప్లను ఉపగ్రహానికి అప్లోడ్ చేయడం, కక్ష్యలోనే AI విశ్లేషణ నిర్వహించడం, ఫలితాలను తిరిగి భూమికి పంపడం వంటి సామర్థ్యాలను సంస్థ విజయవంతంగా పరీక్షించింది.
అయితే ఆ తర్వాత ప్రయోగించిన MOI-1 ఉపగ్రహం ప్రయోగ వాహకంలోని మూడో దశలో తలెత్తిన వైఫల్యం కారణంగా కక్ష్యలోకి చేరకుండానే నష్టపోయింది.
వివరాలు
కక్ష్యలోనే కీలక డేటాకు కోల్డ్ స్టోరేజీ సేవలు
కక్ష్యలోనే కీలక డేటాకు కోల్డ్ స్టోరేజీ సేవలను అందించాలన్న ప్రణాళిక కూడా టేక్మీ2స్పేస్కు ఉంది.
భౌమ క్లౌడ్ సేవలకు అదనంగా మరో బ్యాకప్ ప్రదేశం కావాలనుకునే ఆర్థిక సేవలు, రక్షణ రంగ సంస్థలను లక్ష్యంగా ఈ సేవను అందించాలని కంపెనీ భావిస్తోంది.
ఉపగ్రహాలకు అవసరమైన అనేక సబ్సిస్టమ్లను సంస్థ భారత్లోనే రూపొందించి తయారు చేస్తోంది.
అయితే చిప్లు, సౌర విద్యుత్ కణాలు, ప్రొపల్షన్ వ్యవస్థలను మాత్రం ఇతర సంస్థల నుంచి సమకూర్చుకుంటోంది.