ISRO అప్డేట్: చంద్రుడి కక్ష్యకు మరింత చేరువలో చంద్రయాన్-3
ఈ వార్తాకథనం ఏంటి
భారత అంతరిక్ష పరిశోధనా సంస్థ చేపట్టిన చంద్రయాన్-3 ప్రయోగం చంద్రుడి మీదకు దూసుకువెళ్తోంది. జులై 14వ తేదీన భూమి నుండి నింగిలోకి దూసుకెళ్ళిన చంద్రయాన్-3 మిషన్ భూమి కక్ష్యలో తిరుగుతూ నెమ్మదిగా చంద్రుడి కక్ష్యవైపు ప్రయాణాన్ని కొనసాగిస్తుంది.
ఈ నేపథ్యంలో చంద్రయాన్-3 ని మోసుకెళ్తున్న రాకెట్ ఇంజిన్ ని మండిస్తూ చంద్రుడి వైపు వెళ్ళేలా ఇస్రో శాస్త్రవేత్తలు చేస్తున్నారు. ఇప్పటివరకు మూడుసార్లు ఇంజిన్ ని మండించి కక్ష్యను పెంచారు.
ఇంటర్నేషనల్ మూన్ డే సందర్భంగా ఈరోజు ఇంజిన్ ని మండించి కక్ష్యను పెంచారు. ఈ విధంగా మరోసారి జులై 25వ తేదీన మధ్యాహ్నం 2 నుంచి 3గంటల మధ్య మండించి కక్ష్యను పెంచుతామని ఇస్రో వెల్లడి చేసింది.
Details
చంద్రుడి దక్షిణ ధృవం మీద ల్యాండ్ కానున్న చంద్రయాన్-3
చంద్రయాన్-3 మిషన్ ఇంకా భూ కక్ష్యలోనే ఉందని, ఆగస్టు 5వ తేదీలోగా చంద్రుడి కక్ష్యలోకి వెళ్ళనుందని ఇస్రో శాస్త్రవేత్తలు అంచనా వేస్తున్నారు.
చంద్రుడి కక్ష్యను చేరుకున్నాక చంద్రుడి చుట్టూ దీర్ఘవృత్తాకార కక్ష్యలో తిరుగుతూ ఆగస్టు 23 లేదా 24వ తేదీన చంద్రుడి మీద ల్యాండ్ కానుందని శాస్త్రవేత్తలు చెబుతున్నారు.
చంద్రయాన్-3 మిషన్ చంద్రుడి దక్షిణ ధృవం మీద దిగనుంది. ఇప్పటివరకు దక్షిణ ధృవం మీద రోవర్ ని దించిన దేశం ఒక్కటి కూడా లేదు. చంద్రయాన్-3 విజయవంతంగా ల్యాండ్ అయితే భారతదేశం చరిత్ర సృష్టించనుంది.