Gaganyan: మానవ రహిత అంతరిక్ష యాత్ర గగన్‌యాన్‌'కు క్య్రూ మాడ్యూల్‌ సిద్ధం
ఈ వార్తాకథనం ఏంటి
ఇస్రో తొలిసారిగా చేపట్టనున్న మానవసహిత అంతరిక్ష ప్రయోగం గగన్‌యాన్‌కు సన్నాహాలు వేగంగా కొనసాగుతున్నాయి.
వచ్చే రెండేళ్లలో రోదసిలో వ్యోమగాములను పంపించి, వారిని సురక్షితంగా భూమిపైకి తీసుకొచ్చే లక్ష్యంతో ఈ మిషన్‌ ప్రారంభమవుతోంది.
ఈ దిశగా ఫిబ్రవరిలో మొదటి మానవరహిత ప్రయోగం సన్నద్ధమవుతోంది. హ్యూమన్‌ రేటెడ్‌ లాంచ్‌ వెహికల్‌ మార్క్‌-3 (హెచ్‌ఎల్‌వీఎం3)-జీ1 ద్వారా ఇస్రో రూపొందించిన ఆర్బిటల్‌ మాడ్యూల్‌ను అంతరిక్షంలోకి పంపించనున్నారు.
ఈ మాడ్యూల్‌ను బుధవారం ప్రత్యేక వాహనంలో షార్‌కు చేరవేశారు.
వివరాలు
8,200 కిలోల బరువైన ఆర్బిటల్‌ మాడ్యూల్‌
హెచ్‌ఎల్‌వీఎం3-జీ1 రాకెట్‌ ద్వారా 8,200 కిలోల బరువైన ఆర్బిటల్‌ మాడ్యూల్‌ను 170 కిలోమీటర్ల ఎత్తులోకి పంపి, 430 కిలోమీటర్ల దూరంలో దీర్ఘవృత్తాకార కక్ష్యలో, లోయర్‌ ఎర్త్‌ అర్బిట్‌లోకి ప్రవేశపెట్టనున్నారు.
7 రోజులు తరువాత, ఈ మాడ్యూల్‌ను సురక్షితంగా భూమిపైకి తిరిగి తీసుకొచ్చే ప్రక్రియను చేపట్టనున్నారు.
ఈ ప్రక్రియలో ఏదైనా అపరిశీలిత పరిస్థితి సంభవించినా, వ్యోమగాములు సురక్షితంగా బయటపడే సాంకేతిక పరిజ్ఞానాన్ని నిర్ధారించేందుకు ఈ మానవ రహిత ప్రయోగం కీలకంగా ఉపయోగపడుతుందని ఇస్రో శాస్త్రవేత్తలు పేర్కొంటున్నారు.