Bribes.fyi: లంచాల వివరాలను నమోదు చేసేందుకు Bribes.fyi.. ఇది ఎలా పనిచేస్తుందంటే..
ఈ వార్తాకథనం ఏంటి
దిల్లీలోని మహారాజా అగ్రసేన్ ఇన్స్టిట్యూట్ ఆఫ్ టెక్నాలజీలో బీటెక్ చదువుతున్న విద్యార్థి ఆర్యన్ నిషాద్.. 'Bribes.fyi' పేరుతో ఓ వెబ్సైట్ను రూపొందించారు. ప్రభుత్వ కార్యాలయాల్లో ఎదురైన లంచం ఘటనలను ప్రజలు స్వచ్ఛందంగా నమోదు చేసుకునేందుకు ఇది ఓ ఉచిత వేదికగా పనిచేస్తోంది. ఇందులో నమోదైన వివరాలను శాఖ, నగరం, రాష్ట్రం ఆధారంగా విభజించి.. దేశంలో లంచాల పరిస్థితికి సంబంధించిన ధోరణులను తెలుసుకునే అవకాశం ఉంటుంది. సోమవారం ఈ ప్లాట్ఫామ్కు కేవలం 10-12 గంటల్లోనే 25 లక్షలకు పైగా రిక్వెస్టులు రావడంతో ఇది దేశవ్యాప్తంగా వైరల్గా మారింది.
వివరాలు
Bribes.fyiలో లంచం గురించి ఎలా ఫిర్యాదు చేయాలి?
Bribes.fyiలో లంచం ఘటనను నమోదు చేయడం చాలా సులభం.
లంచం అడిగిన ప్రభుత్వ శాఖ, అడిగినట్లు ఆరోపిస్తున్న లంచం మొత్తం, ఘటన జరిగిన నగరం వంటి ప్రాథమిక వివరాలను అందించాలి.
అలాగే లంచం ఇచ్చారా? లేక నిరాకరించారా? అనే విషయాన్ని కూడా పేర్కొనవచ్చు. ఈ ప్రక్రియకు సుమారు ఒక నిమిషం సమయం పడుతుందని వెబ్సైట్ చెబుతోంది.
వివరాలు నమోదు చేసిన తర్వాత వ్యక్తిగతంగా గుర్తించే సమాచారాన్ని తొలగించి.. ఆ ఫిర్యాదును అందరికీ అందుబాటులో ఉండే సెర్చ్ చేయగల డేటాబేస్లో చేర్చుతుంది.
వివరాలు
ఇప్పటివరకు 3,700కుపైగా ఫిర్యాదులు
ప్రస్తుతం Bribes.fyiలో 1,000కుపైగా నగరాల నుంచి 3,713 ఫిర్యాదులు నమోదయ్యాయి.
అయితే ఈ వివరాలు స్వచ్ఛందంగా ఫిర్యాదు చేసిన వ్యక్తుల నుంచి వచ్చినవేనని వెబ్సైట్ స్పష్టం చేసింది.
కాబట్టి వీటిని మొత్తం భారత్లో అవినీతి స్థాయికి కొలమానంగా పరిగణించకూడదని పేర్కొంది.
నమోదైన వివరాలను ఎవరైనా పరిశీలించి.. వివిధ ప్రభుత్వ శాఖలు, ప్రాంతాల్లో లంచాలకు సంబంధించిన ధోరణులను పోల్చి చూడొచ్చు.
ఈ సమాచారం బహిరంగంగా అందుబాటులో ఉంటుంది.
వివరాలు
ఆన్లైన్లో మిశ్రమ స్పందన
ఒకే శాఖ లేదా ప్రభుత్వ కార్యాలయంపై పలువురు ఫిర్యాదులు వస్తే.. ఆ ఘటనకు సంబంధించిన నమూనాలను నిర్ధారించేందుకు Bribes.fyiలో వెరిఫికేషన్ విధానం కూడా ఉంది.
ఈ ప్లాట్ఫామ్కు రెడిట్ వంటి ఆన్లైన్ వేదికల్లో మంచి స్పందన లభిస్తోంది.
ఓ వినియోగదారు దీనిని 'ఇప్పటివరకు రూపొందించిన అత్యంత ప్రభావవంతమైన ప్లాట్ఫామ్'గా అభివర్ణించారు.
అయితే వెబ్సైట్లోని వెరిఫికేషన్ ప్రక్రియపై కొందరు సందేహాలు వ్యక్తం చేస్తున్నారు.
తమ అనుభవం నిజమేనని వినియోగదారులు నిర్ధారిస్తే సరిపోతున్నప్పుడు.. 'వెరిఫైడ్' అంటే అసలు ఏమిటనే ప్రశ్నలను కొందరు లేవనెత్తుతున్నారు.
వివరాలు
డాక్టర్ అనిరుద్ధ మల్పానీ మద్దతు
Bribes.fyiకి ప్రముఖ ఐవీఎఫ్ నిపుణుడు, ఏంజెల్ ఇన్వెస్టర్, అవినీతి వ్యతిరేక కార్యకర్త డాక్టర్ అనిరుద్ధ మల్పానీ మద్దతు లభించింది.
గత వారం లింక్డ్ఇన్లో చేసిన ఓ పోస్టులో ఆర్యన్ నిషాద్ ఈ విషయాన్ని వెల్లడించారు.
ఆన్లైన్లో Bribes.fyi గురించి తెలుసుకున్న డాక్టర్ అనిరుద్ధ మల్పానీ.. ఆర్యన్ను సంప్రదించినట్లు తెలిపారు.
ప్రస్తుతం ఇది ఒక్క వ్యక్తి ఆధారంగా కొనసాగుతున్న ప్రాజెక్టేనని, ఇంకా అనేక అంశాలను పరిష్కరించాల్సి ఉందని నిషాద్ చెప్పారు.
అయితే ఈ రంగంలో ఇప్పటికే పనిచేసిన ఓ వ్యక్తి తన ప్రాజెక్టును నమ్మడం చాలా ముఖ్యమైన విషయమని పేర్కొన్నారు.
భవిష్యత్తులో మరిన్ని విషయాలు వెల్లడిస్తామని ఆయన తెలిపారు.