Meta: మెటా సరికొత్త ఏఐ టూల్స్.. ఇక స్మార్ట్ఫోన్లోనే గేమ్స్ తయారు చేసుకోవచ్చు
ఈ వార్తాకథనం ఏంటి
గేమ్స్ తయారు చేయాలంటే కోడింగ్, డెవలప్మెంట్ పరిజ్ఞానం తప్పనిసరి అనే పరిస్థితి క్రమంగా మారుతోంది. ఆర్టిఫిషియల్ ఇంటెలిజెన్స్ (ఏఐ) సాయంతో గేమ్ డెవలప్మెంట్ను మరింత సులభతరం చేసే దిశగా మెటా మరో అడుగు వేసింది. తన హారిజన్ సోషల్ ప్లాట్ఫామ్ కోసం రెండు కొత్త డెవలప్మెంట్ టూల్స్ను ప్రకటించింది. వీటికి 'హారిజన్ క్రియేట్','హారిజన్ స్టూడియో'అని పేర్లు పెట్టింది. ఏఐ ప్రాంప్ట్లను ఉపయోగించి గేమ్స్ను రూపొందించుకునేలా వీటిని అభివృద్ధి చేసింది. హారిజన్ క్రియేట్ మొబైల్ యాప్ కాగా.. హారిజన్ స్టూడియో బ్రౌజర్ ఆధారిత అప్లికేషన్. హారిజన్ క్రియేట్ ద్వారా స్మార్ట్ఫోన్ నుంచే గేమ్ తయారీకి శ్రీకారం చుట్టొచ్చు. హారిజన్ స్టూడియోలో మాత్రం గేమ్ డెవలప్మెంట్కు సంబంధించిన మరిన్ని వివరమైన నియంత్రణలు, ఆప్షన్లు అందుబాటులో ఉంటాయి.
వివరాలు
ఫేస్బుక్, ఇన్స్టాగ్రామ్లో గేమ్స్కు ప్రత్యేక ప్రచారం
ప్రస్తుతం ఈ రెండు టూల్స్ను ఎర్లీ యాక్సెస్ కోసం అందుబాటులోకి తీసుకురానున్నారు. ఆసక్తి ఉన్నవారు వెయిట్లిస్ట్లో నమోదు చేసుకోవచ్చు.
హారిజన్ క్రియేట్, హారిజన్ స్టూడియో ద్వారా తయారు చేసే గేమ్స్కు ఎక్కువ మంది ప్రేక్షకులను అందించాలని మెటా భావిస్తోంది.
ఇందుకోసం వాటిని ఫేస్బుక్, ఇన్స్టాగ్రామ్లో సిఫారసు చేయనుంది. ఆయా ప్లాట్ఫామ్లలోనే ఈ గేమ్స్ను ఆడుకునే అవకాశం కూడా ఉంటుంది.
అంటే సోషల్ మీడియా ఫీడ్ను చూస్తున్న సమయంలో ఎవరికైనా ఒక గేమ్కు సంబంధించిన క్లిప్ కనిపిస్తే.. అక్కడి నుంచే గేమ్లోకి వెళ్లి మల్టీప్లేయర్ సెషన్లో చేరొచ్చు.
వివరాలు
ఒక్క ఐడియాతోనే 2డీ, 3డీ గేమ్ తయారీ
హారిజన్ క్రియేట్, హారిజన్ స్టూడియో రాకతో గేమ్ డెవలప్మెంట్ విధానంలో మార్పు వస్తుందని మెటా చెబుతోంది.
వినియోగదారులు తమకు వచ్చిన ఒక సాధారణ ఆలోచనను పూర్తి స్థాయి 2డీ లేదా 3డీ మొబైల్ గేమ్గా మార్చుకోవచ్చు.
ఇందులో గేమ్ ప్రోగ్రెషన్ సిస్టమ్స్, కష్టతర స్థాయిలను సమతుల్యం చేయడం, ఆర్ట్ డైరెక్షన్, మల్టీప్లేయర్ సామర్థ్యాలు వంటి అంశాలను కూడా జోడించుకోవచ్చు.
గేమ్లోని ప్రతి అంశాన్ని తమకు నచ్చిన విధంగా మార్చుకునే అవకాశం ఉంటుంది.
వివరాలు
హారిజన్ వరల్డ్స్కు కొత్త రూపం
మెటా హారిజన్ వరల్డ్స్ను కొత్త రూపంలో తీసుకొస్తోంది. ఇందులో ఏఐ సామర్థ్యాలను కొత్త గేమింగ్ ఇంజిన్తో అనుసంధానం చేసింది.
దీంతో గేమ్స్ తయారు చేయడం గతంతో పోలిస్తే సులభం కానుంది. వినియోగదారులు ఒక చిన్న ఆలోచనతో తమ తొలి గేమ్ను ప్రారంభించవచ్చు.
యాప్లో ఇన్స్టాగ్రామ్ తరహాలో గేమింగ్ ఫీడ్ కూడా ఉంటుంది. ఇందులో ఇతరులు రూపొందించిన గేమ్స్ను వెంటనే ఆడటంతో పాటు వాటిని రీమిక్స్ చేసుకునే అవకాశం ఉంటుంది.
వివరాలు
స్నేహితులతో కలిసి రియల్టైమ్లో గేమ్ తయారీ
హారిజన్ క్రియేట్లో ఉన్న ముఖ్యమైన ఫీచర్లలో రియల్టైమ్ కోలాబరేషన్ ఒకటి.
అంటే స్నేహితులతో కలిసి ఒకేసారి గేమ్ను రూపొందించుకోవచ్చు. మెటా డెమోలో ఐదుగురు వ్యక్తులు ఒకే గేమ్లోని వేర్వేరు అంశాలపై ఒకేసారి పనిచేశారు.
కొందరు వాతావరణ పరిస్థితులను మార్చగా.. మరికొందరు వాహనాలను రూపొందించారు.
గేమ్ సిద్ధమైన తర్వాత దాన్ని కేవలం రెండు ట్యాప్లతో ఫేస్బుక్, ఇన్స్టాగ్రామ్ లేదా హారిజన్లో ప్రచురించవచ్చు.
వివరాలు
హారిజన్ స్టూడియోలో మరిన్ని డెవలప్మెంట్ ఆప్షన్లు
డెస్క్టాప్ ఆధారిత హారిజన్ స్టూడియోలో గేమ్ డెవలప్మెంట్కు మరింత విస్తృతమైన ఆప్షన్లు ఉంటాయి.
గేమ్కు సంబంధించిన పూర్తి డెవలప్మెంట్ ట్రీని, దాని డిపెండెన్సీలను పరిశీలించవచ్చు.
గేమ్ మెకానిక్స్లోని ప్రతి అంశాన్ని లోతుగా మార్చుకునే అవకాశం ఉంటుంది.
అవసరానికి అనుగుణంగా వీటిని పదేపదే మార్చి మెరుగుపరుచుకోవచ్చు. దీంతో గేమ్ రూపకల్పనపై క్రియేటర్లకు మరింత నియంత్రణ లభిస్తుందని మెటా తెలిపింది.