OpenAI : 'అల్ట్రా ఫాస్ట్'.. GPT-5.6 Solతో ఇక పనులు 14 రెట్లు వేగంగా!
ఈ వార్తాకథనం ఏంటి
చాట్ జీపీటీ స్పందన ఇంకాస్త వేగంగా ఉంటే బాగుంటుందని ఎప్పుడైనా అనుకున్నారా? మీ ఆలోచనలకు సమాధానంగా OpenAI కొత్త ఫీచర్ను తీసుకొచ్చింది. 'Ultrafast' పేరుతో కొత్త మోడ్ను అందుబాటులోకి తెచ్చింది. తన తాజా, అత్యంత శక్తివంతమైన మోడల్ GPT-5.6 Sol పనులను మరింత వేగంగా పూర్తి చేసేలా దీన్ని రూపొందించినట్లు OpenAI వెల్లడించింది. సాధారణ ప్రాసెసింగ్తో పోలిస్తే Ultrafast మోడ్ 14 రెట్ల వేగంతో పనిచేస్తుందని కంపెనీ తెలిపింది. ఒక్క సెకనులో గరిష్ఠంగా 750 అవుట్పుట్ టోకెన్లను అందించగలదని పేర్కొంది. లార్జ్ లాంగ్వేజ్ మోడల్ (LLM) మనుషులతో సంభాషించే సమయంలో రూపొందించే టెక్స్ట్లోని ప్రత్యేక భాగాలను టోకెన్లు అంటారు.
వివరాలు
కొత్త దిశలో పురోగతి..
"ఇప్పటివరకు రియల్టైమ్ వేగాన్ని పొందాలంటే సాధారణంగా చిన్న లేదా ప్రత్యేకమైన మోడల్ను ఎంచుకోవాల్సి వచ్చేది. Ultrafast ద్వారా కొత్త దిశలో పురోగతి సాధిస్తున్నాం.
అంటే ప్రతి సెకనులో మరింత ఉపయోగకరమైన పనిని పూర్తి చేయడం" అని గురువారం విడుదల చేసిన బ్లాగ్పోస్ట్లో OpenAI పేర్కొంది.
OpenAI ప్రత్యర్థి సంస్థలు కూడా తమ ఏఐ మోడళ్ల వేగాన్ని పెంచే ప్రయత్నాలు చేస్తున్నాయి.
Anthropic ఇప్పటికే తన Claude మోడల్లో 'Fast mode'ను అందుబాటులోకి తెచ్చింది.
అయితే OpenAI ప్రస్తుతం Ultrafast ద్వారా అందిస్తున్న స్థాయి వేగాన్ని అది అందించడం లేదు.
GPT-5.6 Solలోని ఈ అత్యంత వేగవంతమైన వెర్షన్ను పలు రకాల కార్పొరేట్ కార్యకలాపాల్లో ఉపయోగించవచ్చని OpenAI తెలిపింది.
వివరాలు
సామర్థ్యం పెరిగే కొద్దీ మరింత మందికి అందుబాటులోకి..
ముఖ్యంగా సాంకేతిక సమస్యలు తలెత్తినప్పుడు వాటిని పరిష్కరించడం, కస్టమర్ సర్వీస్, సపోర్ట్, ఆర్థిక మార్కెట్ల విశ్లేషణ, ఈ-కామర్స్ వంటి రంగాల్లో ఇది ఉపయోగపడుతుందని పేర్కొంది.
ప్రస్తుతం Ultrafastను ప్రివ్యూ వెర్షన్గా విడుదల చేస్తున్నారు. చిప్ తయారీ సంస్థ Cerebrasతో OpenAIకి ఉన్న భాగస్వామ్యం ద్వారా ఈ ఫీచర్కు అవసరమైన సాంకేతిక శక్తిని అందిస్తున్నారు.
ప్రస్తుతానికి కొద్దిమంది కస్టమర్లకు మాత్రమే ఈ ప్రివ్యూ అందుబాటులో ఉంది.
అయితే సామర్థ్యం పెరిగే కొద్దీ మరింత మంది వినియోగదారులకు Ultrafastను అందుబాటులోకి తీసుకువస్తామని OpenAI వెల్లడించింది.