A Miracle in the Sky:నేడు,రేపు ఆకాశంలో సూపర్ మూన్ అద్భుతం.. సాధారణ పౌర్ణమి కంటే 14% పెద్ద,30% ఎక్కువ వెలుగు
ఈ వార్తాకథనం ఏంటి
నింగిలో ఎన్నో రహస్యాలు, ఆశ్చర్యాలు దాగి ఉంటాయి. వాటిలో ఒక అద్భుత దృశ్యం ఈ సోమవారం రాత్రి మన కళ్లముందు కనువిందు చేయబోతోంది. 2025 సంవత్సరానికి సంబంధించిన తొలి సూపర్ మూన్ (Super Moon) అక్టోబర్ 6, 7 తేదీలలో ఆకాశంలో మెరిసిపోనుంది. సాధారణంగా పౌర్ణమి రోజున కనిపించే చంద్రుడికంటే ఈ సమయంలో చంద్రుడు భూమికి మరింత సమీపంగా వస్తాడు. అందువల్ల చంద్రుని పరిమాణం పెద్దదిగా, కాంతి మరింత ప్రకాశవంతంగా అనిపిస్తుంది. చంద్రుడు భూమి చుట్టూ తన కక్ష్యలో తిరుగుతుండగా, కొన్నిసార్లు దూరంగా, మరికొన్నిసార్లు దగ్గరగా వస్తుంటాడు. భూమికి అత్యంత దగ్గరగా ఉన్న సమయంలోనే పౌర్ణమి వస్తే, దాన్ని 'సూపర్ మూన్' అని పిలుస్తారు.
వివరాలు
నవంబర్, డిసెంబర్‌లో మరో రెండు సూపర్ మూన్స్
ఈసారి ఆ చంద్రుడు సాధారణ పౌర్ణమితో పోలిస్తే సుమారు 14 శాతం పెద్దగా, 30 శాతం ఎక్కువ వెలుగుతో ఆకాశంలో మెరిసిపోతాడు. ఈ అద్భుతమైన దృశ్యాన్ని చూడటానికి ఎలాంటి ప్రత్యేక పరికరాల అవసరం లేదు.. కళ్లతో నేరుగా ఆకాశాన్ని వీక్షిస్తే చాలు. 2025లో మొత్తం మూడు సూపర్ మూన్స్ కనిపించనున్నాయి. అక్టోబర్‌లో మొదటి సూపర్ మూన్ తర్వాత, నవంబర్, డిసెంబర్ నెలల్లో మరో రెండు సూపర్ మూన్స్ మన కళ్లముందు మెరిసిపోతాయి. ఈ అరుదైన ఆకాశ సౌందర్యాన్ని చూడటానికి ప్రకృతి ప్రేమికులు, ఖగోళ శాస్త్రాభిమానులు ఆసక్తిగా ఎదురుచూస్తున్నారు. ఈ సందర్భాల్లో రాత్రి ఆకాశ వీక్షణం మరింత ఆహ్లాదకరంగా, మనోహరంగా అనిపించబోతోంది.