Hardik Pandya: మిస్టర్ బీస్ట్‌తో పోటీ.. విజేతగా హార్దిక్ పాండ్యా.. గెలిచిన డబ్బు ఛారిటీకి!
ఈ వార్తాకథనం ఏంటి
టీమిండియా స్టార్ ఆల్‌రౌండర్ హార్దిక్ పాండ్యా (Hardik Pandya) క్రికెట్ మైదానానికి దూరంగా ఉన్నప్పటికీ మరో ఆసక్తికరమైన పోటీలో సత్తా చాటాడు. చేతిలో క్రికెట్ బ్యాట్‌కు బదులుగా బేస్‌బాల్ బ్యాట్ పట్టి అందరినీ ఆశ్చర్యపరిచాడు. ప్రముఖ యూట్యూబర్ మిస్టర్ బీస్ట్ (MrBeast) నిర్వహించిన ప్రత్యేక స్పోర్ట్స్ ఛాలెంజ్‌లో పాల్గొని విజేతగా నిలిచాడు. ఈ పోటీలో ఏకంగా లక్ష అమెరికన్ డాలర్లు (సుమారు రూ.94.9 లక్షలు) గెలుచుకున్నాడు. అయితే ఈ ప్రైజ్‌మనీని తన దగ్గరే ఉంచుకోకుండా సేవా కార్యక్రమాలకు విరాళంగా ఇవ్వాలని కోరడం విశేషం. ఇందుకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.
వివరాలు
మిస్టర్ బీస్ట్‌తో బేస్‌బాల్ ఛాలెంజ్..
జిమ్మీ డొనాల్డ్‌సన్‌గా ప్రసిద్ధి చెందిన మిస్టర్ బీస్ట్.. ప్రపంచవ్యాప్తంగా గుర్తింపు పొందిన క్రీడాకారులు, ప్రముఖులతో కలిసి ఈ ప్రత్యేక ఛాలెంజ్ వీడియోను రూపొందించాడు.
ఇందులో హార్దిక్ పాండ్యాతో పాటు బాస్కెట్‌బాల్ దిగ్గజం లెబ్రాన్ జేమ్స్, బాస్కెట్‌బాల్ స్టార్ కైట్లిన్ క్లార్క్, జిమ్నాస్ట్ సిమోన్ బైల్స్, ఫిగర్ స్కేటర్ అలైసా లియు పాల్గొన్నారు.
భారత ప్రముఖ యూట్యూబర్ క్యారీ మినాటీ కూడా ఈ వీడియోలో కనిపించాడు. ఈ ఛాలెంజ్‌లో భాగంగా హార్దిక్ పాండ్యా, మిస్టర్ బీస్ట్ మధ్య బేస్‌బాల్ హోమ్‌రన్ పోటీ నిర్వహించారు. బంతిని బ్యాట్‌తో బలంగా బాది మైదానం బయటకు పంపించడమే ఈ ఆట లక్ష్యం.
ఇందులో భాగంగా ముగ్గురు బంతులను బౌండరీ అవతలకు పంపించాల్సి ఉంటుంది.
వివరాలు
బేస్‌బాల్ ఆడిన అనుభవం లేదు
అయితే సాధారణ బేస్‌బాల్ మ్యాచ్‌ల్లో మాదిరిగా వేగంగా బంతులు వేయకుండా.. బ్యాటర్లు సులభంగా కొట్టేలా బంతులను విసిరారు.
తనకు గతంలో బేస్‌బాల్ ఆడిన అనుభవం లేదని హార్దిక్ చెప్పినప్పటికీ.. పోటీలో మాత్రం అద్భుతంగా ఆడాడు.
మిస్టర్ బీస్ట్‌పై పైచేయి సాధించి విజేతగా నిలిచాడు. దీంతో లక్ష డాలర్ల ప్రైజ్‌మనీని సొంతం చేసుకున్నాడు.
వివరాలు
రూ.94.9 లక్షలు ఛారిటీకి విరాళం..
ఈ పోటీలో గెలుచుకున్న లక్ష డాలర్ల మొత్తాన్ని హార్దిక్ పాండ్యా పూర్తిగా సేవా కార్యక్రమాలకు కేటాయించాలని నిర్ణయించుకున్నాడు.
జంతు సంక్షేమం, నిరుపేద పిల్లలకు సహాయం అందించే సంస్థలకు ఈ మొత్తాన్ని విరాళంగా ఇవ్వాలని కోరాడు.
ముఖ్యంగా ఏబిలిటీ డెవలప్‌మెంట్ అండ్ ఇన్‌క్లూజన్ (ADAPT), కమ్యూనిటీ స్ట్రీటీస్ ఇండియా (Community Streeties India) సంస్థలకు ఈ డబ్బును అందించనున్నట్లు సమాచారం.
ఈ సంస్థలు జంతు సంక్షేమం, సామాజిక సేవా కార్యక్రమాల్లో చురుగ్గా పనిచేస్తున్నాయి. దీంతో హార్దిక్ ఆటతో పాటు తన మంచి మనసుతోనూ అభిమానుల ప్రశంసలు అందుకుంటున్నాడు.
వివరాలు
హార్దిక్ రీఎంట్రీ ఎప్పుడంటే..?
మరోవైపు హార్దిక్ పాండ్యా క్రికెట్ భవిష్యత్తుపైనా ఆసక్తికర చర్చ జరుగుతోంది. అతను చివరిసారిగా 2026 మార్చిలో అహ్మదాబాద్ వేదికగా జరిగిన టీ20 ప్రపంచకప్ ఫైనల్‌లో భారత్ తరఫున ఆడాడు.
ఆ తర్వాత మే 24న ముంబయి ఇండియన్స్ తరఫున ఐపీఎల్ మ్యాచ్‌లో చివరిసారిగా మైదానంలో కనిపించాడు. అప్పటి నుంచి అంతర్జాతీయ క్రికెట్‌కు దూరంగా ఉంటున్నాడు.
కాలి కండరాల లోపలి భాగంలో ఏర్పడిన స్ట్రెస్ ఇంజ్యూరీ కారణంగా ప్రస్తుతం హార్దిక్ కోలుకుంటున్నాడు. బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో వైద్యుల పర్యవేక్షణలో చికిత్స పొందుతున్నాడు.
అక్టోబర్ ప్రారంభంలో వైద్య నిపుణుడు డాక్టర్ దిన్‌షా పార్దివాలా అతని వైద్య నివేదికలను పరిశీలించనున్నట్లు సమాచారం.
వివరాలు
గాయంతో ఇబ్బంది పడుతున్న హర్దిక్
రికవరీ ప్రణాళికలో భాగంగా నవంబర్‌లో జాగింగ్ ప్రారంభించే అవకాశం ఉందని నివేదికలు వెల్లడిస్తున్నాయి.
తొలుత జాగింగ్‌తో మొదలుపెట్టి.. ఆ తర్వాత ఎనిమిది వారాల పాటు క్రమంగా పరుగుల సాధనను పెంచనున్నారు.
గాయం మళ్లీ తిరగబెట్టకుండా తగిన జాగ్రత్తలు తీసుకుంటూ బలవర్ధక వ్యాయామాలు కూడా చేయించనున్నారు.
అయితే హార్దిక్ పూర్తిస్థాయి ఫిట్‌నెస్ సాధించి తిరిగి క్రికెట్ మైదానంలోకి ఎప్పుడు అడుగుపెడతాడనే దానిపై ఇప్పటివరకు స్పష్టత లేదు.
అతని రికవరీ ఆలస్యమైతే 2027 మార్చిలో ప్రారంభం కానున్న ఐపీఎల్ వరకు క్రికెట్‌కు దూరంగా ఉండే అవకాశం ఉంది.
అదే జరిగితే శ్రీలంక, జింబాబ్వేతో భారత్ ఆడనున్న పరిమిత ఓవర్ల సిరీస్‌లకు కూడా అతను దూరమయ్యే ప్రమాదం ఉంది.
వివరాలు
భారత జట్టులో చోటు లభించలేదు
ఇప్పటికే న్యూజిలాండ్ పర్యటన కోసం ఎంపిక చేసిన భారత జట్టులో హార్దిక్‌కు చోటు దక్కలేదు.
ప్రస్తుతం గాయం కారణంగా క్రికెట్‌కు దూరంగా ఉన్న హార్దిక్.. మిస్టర్ బీస్ట్ నిర్వహించిన ఛాలెంజ్‌లో విజయం సాధించడంతో మరోసారి వార్తల్లో నిలిచాడు.
అంతేకాకుండా గెలుచుకున్న భారీ మొత్తాన్ని తన కోసం ఉపయోగించకుండా సేవా కార్యక్రమాలకు విరాళంగా ఇవ్వాలని నిర్ణయించుకోవడం అభిమానులను ఆకట్టుకుంటోంది.