Maya Rajeshwaran Revathi: టెన్నిస్‌లో చరిత్ర సృష్టించిన మాయా రాజేశ్వరన్.. సానియా మీర్జా రికార్డు బద్దలు!
ఈ వార్తాకథనం ఏంటి
భారత టెన్నిస్‌లో మరో యువ తార వెలుగులోకి వచ్చింది. 17 ఏళ్ల యువ క్రీడాకారిణి మాయా రాజేశ్వరన్ రేవతి తన తొలి ప్రొఫెషనల్ సింగిల్స్ టైటిల్‌ను గెలుచుకుని చరిత్ర సృష్టించింది. ఈ ఘనతతో 22 ఏళ్ల క్రితం టెన్నిస్ దిగ్గజం సానియా మీర్జా నెలకొల్పిన రికార్డును బద్దలు కొట్టింది. అయితే, తన విజయాన్ని సానియా మీర్జాతో పోల్చడాన్ని మాయా సున్నితంగా తిరస్కరించింది. సానియా ఎప్పటికీ ఓ లెజెండ్ అని, తాను ఆమెను ఆరాధిస్తానని స్పష్టం చేసింది.
వివరాలు
లాగోస్ టోర్నీలో మాయా అద్భుత ప్రదర్శన
నైజీరియాలోని లాగోస్‌లో జరిగిన W35 టెన్నిస్ టోర్నమెంట్‌లో మాయా రాజేశ్వరన్ అద్భుతంగా రాణించింది.
క్వాలిఫయర్‌గా టోర్నీలోకి ప్రవేశించిన ఆమె.. మెయిన్ డ్రాలో ఒక్క సెట్ కూడా కోల్పోకుండా సింగిల్స్ టైటిల్‌ను కైవసం చేసుకుంది.
ఫైనల్‌లో స్పెయిన్‌కు చెందిన సెలియా సెర్వినో రూజ్‌ను 6-4, 6-2 తేడాతో ఓడించి విజేతగా నిలిచింది.
ఈ విజయంతో W35 టైటిల్‌ను గెలుచుకున్న అతి పిన్న వయస్కురాలైన భారతీయ మహిళగా మాయా రికార్డు సృష్టించింది.
అంతేకాకుండా ఉక్రెయిన్‌కు చెందిన యెలిజవేటా కోట్లియార్‌తో కలిసి డబుల్స్ టైటిల్‌ను కూడా గెలుచుకుంది.
దీంతో ఒకే టోర్నీలో సింగిల్స్, డబుల్స్ టైటిళ్లను సొంతం చేసుకుని డబుల్ ధమాకా అందించింది.
వివరాలు
'ఇది నా ప్రొఫెషనల్ కెరీర్‌కు ఆరంభం మాత్రమే'
తన తొలి ప్రొఫెషనల్ సింగిల్స్ టైటిల్ విజయంపై మాయా రాజేశ్వరన్ సంతోషం వ్యక్తం చేసింది. ఈ విజయం తన కెరీర్‌కు మంచి ఆరంభమని, మరింత ఆత్మవిశ్వాసాన్ని ఇచ్చిందని తెలిపింది.
రాబోయే టోర్నమెంట్లలోనూ ఇదే ఆత్మవిశ్వాసంతో ఆడేందుకు ప్రయత్నిస్తానని పేర్కొంది. సానియా మీర్జాతో తనను పోల్చడంపై స్పందిస్తూ.. ఆమె ఒక లెజెండ్ అని, ఆమెను అధిగమించడం సాధ్యం కాదని మాయా చెప్పింది.
భారతదేశంలో టెన్నిస్‌కు ఇంతటి గుర్తింపు రావడానికి సానియా ఎంతో కృషి చేశారని కొనియాడింది.
తాను ఇప్పటికీ సానియా ఇంటర్వ్యూలు, పాడ్‌కాస్ట్‌లు వింటుంటానని, ఆమె నుంచి స్ఫూర్తి పొందుతానని వెల్లడించింది.
వివరాలు
తొలి రౌండ్‌లో 0-5తో వెనుకబడి.. 7-5తో సెట్ విజయం
ఈ టోర్నమెంట్‌లోని తొలి రౌండ్‌లో టాప్ సీడ్ క్రీడాకారిణితో జరిగిన మ్యాచ్‌లో మాయా ఆసక్తికరమైన అనుభవాన్ని పంచుకుంది.
మ్యాచ్‌లో తొలి సెట్‌లో ఒక దశలో 0-5తో వెనుకబడిపోయిన ఆమె.. కోర్టులోని గడియారాన్ని చూసిందట.
కేవలం 25 నిమిషాల్లోనే సెట్‌ను కోల్పోకూడదని తనలో తాను నిర్ణయించుకున్నట్లు తెలిపింది. ఆ పట్టుదలతో ఆటను కొనసాగించిన మాయా.. అద్భుతంగా పుంజుకుని తొలి సెట్‌ను 7-5తో గెలుచుకుంది.
అనంతరం మ్యాచ్‌లోనూ విజయం సాధించి తన పోరాట పటిమను చాటుకుంది. వెనుకబడిన పరిస్థితుల్లోనూ ఒత్తిడికి లోనుకాకుండా ఆడటం తన విజయానికి కీలకంగా నిలిచింది.
వివరాలు
రఫెల్ నాదల్ అకాడమీలో శిక్షణ
తన టెన్నిస్ ప్రయాణంలో భాగంగా స్పెయిన్‌కు చెందిన దిగ్గజ ఆటగాడు రఫెల్ నాదల్ అకాడమీలో శిక్షణ తీసుకున్నట్లు మాయా వెల్లడించింది.
ఆ సమయంలో నాదల్‌తో పాటు ఆయన మాజీ కోచ్ టోనీ నాదల్‌తో మాట్లాడే అవకాశం లభించిందని తెలిపింది. వారి అనుభవాలు, సూచనలు తనకు ఎంతో స్ఫూర్తినిచ్చాయని పేర్కొంది.
ప్రస్తుతం ఫ్రాన్స్‌లోని ఎలైట్ టెన్నిస్ సెంటర్‌లో మాయా శిక్షణ పొందుతోంది. భవిష్యత్తులో మరిన్ని ప్రొఫెషనల్ టోర్నమెంట్లలో పాల్గొనడంతో పాటు, తన ప్రపంచ ర్యాంకింగ్‌ను మెరుగుపరుచుకోవడంపై దృష్టి సారించనున్నట్లు తెలిపింది.
తొలి ప్రొఫెషనల్ సింగిల్స్ టైటిల్‌తో పాటు డబుల్స్ టైటిల్‌ను కూడా గెలుచుకున్న మాయా రాజేశ్వరన్.. భారత టెన్నిస్‌లో తనకంటూ ప్రత్యేక గుర్తింపు తెచ్చుకునే దిశగా అడుగులు వేస్తోంది.