'Stop oligarchy': ట్రంప్ ఎన్నికల ప్రచారానికి మస్క్ భారీ ఖర్చు.. బెర్నీ సాండర్స్ సంచలన వ్యాఖ్యలు
ఈ వార్తాకథనం ఏంటి
భారత్‌లో స్టార్‌లింక్ ఉపగ్రహ ఇంటర్నెట్ సేవల ప్రారంభానికి అనుమతులు రావడంలో జాప్యం జరుగుతుండటంపై ప్రపంచ కుబేరుడు ఎలాన్ మస్క్ చేస్తున్న వ్యాఖ్యలు చర్చనీయాంశంగా మారాయి. ఈ నేపథ్యంలో అమెరికా సెనెటర్ బెర్నీ సాండర్స్ ఆయనపై విమర్శలు గుప్పించారు. అమెరికా అధ్యక్ష ఎన్నికల ప్రచార సమయంలో డొనాల్డ్ ట్రంప్‌కు మద్దతుగా మస్క్ 290 మిలియన్ డాలర్లు ఖర్చు చేశారని ఆయన పేర్కొన్నారు.
వివరాలు
మస్క్ సంపద 696 బిలియన్ డాలర్లు పెరిగింది: సాండర్స్
ఆ ఖర్చు మస్క్‌కు ప్రయోజనం చేకూర్చిందని సాండర్స్ ఎద్దేవా చేశారు.
ఆ తర్వాత మస్క్ సంపద 696 బిలియన్ డాలర్లు పెరిగిందని, దీంతో ఆయన ప్రపంచంలోనే తొలి ట్రిలియనీర్‌గా మారారని వ్యాఖ్యానించారు.
అయితే, మస్క్ రాజకీయ ఖర్చులు అక్కడితో ఆగలేదని ఆయన విమర్శించారు.
అమెరికా కాంగ్రెస్‌లో రిపబ్లికన్ల ఆధిపత్యాన్ని కొనసాగించేందుకు మస్క్ 366 మిలియన్ డాలర్లు ఖర్చు చేస్తున్నారని ఆరోపించారు.
మస్క్ రాజకీయ ప్రభావాన్ని అడ్డుకోవాలని, సంపన్నుల ఆధిపత్యంతో కూడిన వ్యవస్థకు ముగింపు పలకాలని సాండర్స్ పిలుపునిచ్చారు.
వివరాలు
భారత్‌లో స్టార్‌లింక్ సేవల అనుమతుల అంశంపై మస్క్ ఆరోపణలు
మరోవైపు, భారత్‌లో స్టార్‌లింక్ శాటిలైట్ ఇంటర్నెట్ సేవలు ప్రారంభం కాకుండా కొందరు సంపన్నులు అడ్డంకులు సృష్టిస్తున్నారని మస్క్ గతంలో ఆరోపించారు.
దేశంలో తమ గుత్తాధిపత్యాన్ని కాపాడుకునేందుకే వారు ఇలా చేస్తున్నారని విమర్శించారు.
ఈ క్రమంలో, సామాజిక మాధ్యమాల్లో బీజేపీ ప్రచారాన్ని విస్తృతం చేసేందుకు అవసరమైన నిధులను రిలయన్స్‌తో సంబంధం ఉన్న ఓ కంపెనీ సమకూర్చిందని పేర్కొంటూ వచ్చిన మీడియా కథనాలను కూడా మస్క్ షేర్ చేశారు.
భారత్‌లో స్టార్‌లింక్ సేవల అనుమతుల అంశంపై మస్క్ చేస్తున్న ఆరోపణల నేపథ్యంలో, ఇప్పుడు సాండర్స్ సైతం ఆయన రాజకీయ ఖర్చులు, సంపన్నుల ప్రభావంపై విమర్శలు చేయడం ప్రాధాన్యం సంతరించుకుంది.