Djibouti Migrant Boat Accident: జిబౌటి సముద్రంలో ఘోర ప్రమాదం.. వలసదారుల పడవ బోల్తా.. 109 మంది మృతి!
ఈ వార్తాకథనం ఏంటి
ఆఫ్రికా నుంచి యెమెన్‌కు వలస వెళ్తున్న పడవ సముద్రంలో బోల్తా పడింది. ఈ ప్రమాదంలో కనీసం 109 మంది మృతి చెందగా.. మరో 116 మందికి పైగా గల్లంతయ్యారు. మృతుల్లో 15 మంది చిన్నారులు కూడా ఉన్నారు. సుమారు 350 మందితో ప్రయాణిస్తున్న ఈ పడవ ప్రమాదానికి గురైనట్లు ఐక్యరాజ్య సమితి (ఐరాస)కు చెందిన అంతర్జాతీయ వలస సంస్థ (IOM) ఆదివారం వెల్లడించింది.
వివరాలు
ఒబాక్‌ పట్టణం సమీపంలో ప్రమాదం
జిబౌటి నుంచి యెమెన్‌కు వెళ్తున్న పడవ.. జిబౌటిలోని ఒబాక్‌ పట్టణానికి ఉత్తర దిశ వద్ద సముద్రంలో బోల్తా పడింది.
ఈ ఘటనలో భారీ ప్రాణనష్టం సంభవించడంపై సంస్థ తీవ్ర విచారం వ్యక్తం చేసింది. "ఇది అత్యంత విషాదకరమైన ప్రాణనష్టం.
ప్రమాదం నుంచి బయటపడిన వారితో పాటు, తమ ఆత్మీయులను కోల్పోయిన కుటుంబాలకు, వారి ఆచూకీ తెలియక ఎదురుచూస్తున్న వారికి మా ప్రగాఢ సానుభూతి తెలియజేస్తున్నామని జిబౌటిలోని ఐఓఎం మిషన్‌ చీఫ్‌ అలెగ్జాండర్‌ కోయిసాక్‌ తెలిపారు.
ప్రమాద బాధితులకు అత్యవసర సహాయం అందించేందుకు ఐఓఎం బృందాలు జిబౌటి అధికారులతో కలిసి క్షేత్రస్థాయిలో పనిచేస్తున్నాయని ఆయన వెల్లడించారు.
వివరాలు
వలసదారులకు ప్రమాదకరంగా మారిన సముద్ర మార్గం
ఆర్థిక అవకాశాలను వెతుక్కుంటూ వలస వెళ్లే వారికి ఈ సముద్ర మార్గం ఎంత ప్రమాదకరంగా మారిందో ఈ ఘటన మరోసారి స్పష్టం చేస్తోందని ఐఓఎం పేర్కొంది.
జిబౌటి నుంచి బాబ్‌ అల్‌-మందెబ్‌ జలసంధిని దాటి యెమెన్‌కు చేరుకుని, అక్కడి నుంచి గల్ఫ్‌ దేశాలకు వెళ్లేందుకు పలువురు ప్రయత్నిస్తున్నారు.
ఈ క్రమంలో ప్రాణాలకు ముప్పు ఎదురవుతోంది. ఇదిలా ఉండగా యెమెన్‌లో సౌదీ అరేబియా మద్దతున్న ప్రభుత్వం, ఇరాన్‌ మద్దతున్న హూతీ తిరుగుబాటుదారుల మధ్య ఘర్షణలు కొనసాగుతున్నాయి.
అమెరికా, దాని మిత్రదేశాలు, ఇరాన్‌కు సంబంధించిన విస్తృత ప్రాంతీయ ఉద్రిక్తతల్లోనూ హూతీలు భాగస్వాములయ్యారు.
వివరాలు
ఇథియోపియా నుంచి జిబౌటికి పెరుగుతున్న వలసలు
సెప్టెంబర్‌ 10 నుంచి ఇథియోపియా నుంచి జిబౌటికి 20,000 మందికి పైగా వలసదారులు వచ్చినట్లు నమోదు చేసినట్టు ఐఓఎం తెలిపింది.
వీరిలో చాలామంది సముద్ర మార్గంలో యెమెన్‌కు వెళ్లేందుకు ప్రయత్నిస్తున్న ఇథియోపియా, సోమాలియా దేశాలకు చెందినవారని ఐఓఎం ప్రతినిధి కెన్నెడీ ఒమోండి ఒకోథ్‌ తెలిపారు.
అయితే ఈ ప్రయాణానికి ప్రయత్నించే వారిలో చాలామంది జిబౌటిలోనే చిక్కుకుపోతున్నారని పేర్కొన్నారు.