Bangladesh: బంగ్లాదేశ్‌లో కార్మికుల ఆందోళనలు.. వందలాది వస్త్ర పరిశ్రమలు మూత
ఈ వార్తాకథనం ఏంటి
బంగ్లాదేశ్‌లో వస్త్ర పరిశ్రమ కార్మికుల ఆందోళనలు తీవ్ర ఉద్రిక్తతకు దారితీశాయి. వేతనాలు పెంచాలంటూ వేలాది మంది కార్మికులు చేపట్టిన నిరసనలు హింసాత్మకంగా మారడంతో పోలీసులు రంగంలోకి దిగారు. ఆందోళనకారులను చెదరగొట్టేందుకు టియర్ గ్యాస్, స్టన్ గ్రెనేడ్లను ప్రయోగించారు. నిరసనల ప్రభావంతో దేశవ్యాప్తంగా వందలాది వస్త్ర పరిశ్రమలు మూతపడ్డాయి. ప్రస్తుతం తమకు నెలకు కనీస వేతనంగా అందుతున్న 12,500 టాకాలను 30,000 టాకాలకు పెంచాలని కార్మికులు డిమాండ్ చేస్తున్నారు. నిత్యావసర వస్తువుల ధరలు పెరగడం, ద్రవ్యోల్బణం కారణంగా ప్రస్తుత వేతనాలతో కుటుంబాలను పోషించడం కష్టంగా మారిందని వారు చెబుతున్నారు.
వివరాలు
బంగ్లాదేశ్ ఆర్థిక వ్యవస్థలో వస్త్ర పరిశ్రమ కీలక పాత్ర
బంగ్లాదేశ్ ఆర్థిక వ్యవస్థలో వస్త్ర పరిశ్రమ కీలక పాత్ర పోషిస్తోంది.
ఈ రంగం ద్వారా ఏటా సుమారు 40 బిలియన్ డాలర్ల విలువైన ఎగుమతులు జరుగుతున్నాయి.
దేశవ్యాప్తంగా దాదాపు 2,500 వస్త్ర పరిశ్రమలు ఉండగా, వాటిలో సుమారు 40 లక్షల మంది పనిచేస్తున్నారు.
వీరిలో ఎక్కువమంది గ్రామీణ ప్రాంతాలకు చెందిన మహిళలే. రాజధాని ఢాకాలో కొద్దిరోజులుగా కొనసాగుతున్న నిరసనలు నగర శివార్లలోని పారిశ్రామిక ప్రాంతాలకూ విస్తరించాయి.
నారాయణ్‌గంజ్ జిల్లాలోని ఫతుల్లాలో కార్మికులు, పోలీసుల మధ్య జరిగిన ఘర్షణల్లో పలువురు గాయపడ్డారు.
ఈ ఘటనలకు సంబంధించి పలువురు నిరసనకారులను పోలీసులు అరెస్టు చేసినట్లు స్థానిక మీడియా వెల్లడించింది.
వివరాలు
ఢాకాలోని మీర్పూర్ ప్రాంతంలో 10 వేల మందికి పైగా పోలీసులు
ఢాకా సమీపంలోని సవార్ ప్రాంతం అషులియాలో సుమారు 100 ఫ్యాక్టరీలు మూతపడ్డాయని అక్కడి ఇండస్ట్రియల్ పోలీస్ సూపరింటెండెంట్ మొమినుల్ ఇస్లాం భుయాన్ తెలిపారు.
మరోవైపు గాజీపూర్ జిల్లాలో కార్మికులు ప్రధాన రహదారిని దిగ్బంధించారు.
నిరసనలను అదుపు చేసేందుకు ఢాకాలోని మీర్పూర్ ప్రాంతంలో 10 వేల మందికి పైగా పోలీసులను మోహరించారు.
కార్మికుల వేతన డిమాండ్లను పరిశీలించేందుకు ప్రభుత్వం కొత్త వేతన బోర్డును ఏర్పాటు చేసింది.
కొత్త వేతన విధానం ప్రకారం కార్మికులకు వచ్చే ఏడాది జనవరిలో తొలి జీతాలు అందుతాయని వేతన బోర్డు ఛైర్మన్ సయ్యద్ ఆజాద్ సుభానీ తెలిపారు.
అప్పటివరకు కార్మికుల ఆందోళనలు ఏ స్థాయికి చేరుకుంటాయన్నది ఆసక్తికరంగా మారింది.