Israel-Hamas: ఉత్తర గాజాపై ఇజ్రాయెల్ వైమానిక దాడులు.. 73 మంది పాలస్తీనియన్లు మృతి
ఈ వార్తాకథనం ఏంటి
గాజాపై ఇజ్రాయెల్ దాడులు కొనసాగుతూనే ఉన్నాయి. తాజాగా, ఇజ్రాయెల్ ఉత్తర గాజాపై దాడులు చేసింది, ఇందులో దాదాపు 73 మంది పాలస్తీనియన్లు మరణించారు. హమాస్ వార్తా సంస్థ ఈ సమాచారాన్ని అందించింది.
ఇజ్రాయెల్ వైమానిక దళాలు ఉత్తర గాజాలోని బీట్ లాహియా పట్టణంలో భవనాలపై దాడులు జరిపాయి.
మరణించినవారిలో అనేక మంది మహిళలు, చిన్నారులే ఉండటం గమనార్హం.
ఈ దాడుల్లో పలువురు తీవ్రంగా గాయపడగా, కొందరి ఆచూకీ ఇంకా తెలియకపోవడంతో అక్కడి అధికారులు ఆందోళన వ్యక్తం చేశారు.
వివరాలు
వైద్యం, ఆహారాన్ని అడ్డుకుంటున్న ఇజ్రాయెల్ దళాలు..
ఇజ్రాయెల్ దళాలు అక్కడి పౌర స్థావరాలను లక్ష్యంగా చేసుకుని దాడులు చేస్తున్నట్లు, ఆసుపత్రులను ముట్టడించి బాధితులకు అవసరమైన వైద్యం, ఆహారాన్ని అడ్డుకుంటున్నట్లు నివాసితులు, వైద్యాధికారులు ఆరోపించారు.
గాజా ఆరోగ్య శాఖ ప్రకారం, ఉత్తర గాజాలోని ఆసుపత్రుల్లో వైద్య సామగ్రి మరియు సిబ్బంది కొరత తీవ్రమైందని పేర్కొంది.
వివరాలు
దక్షిణ గాజాపై ఇజ్రాయెల్ కరపత్రాలు..
ఇటీవల జరిగిన దాడుల్లో హమాస్ మిలిటెంట్ అధినేత యాహ్యా సిన్వార్ మరణించిన సంగతి తెలిసిందే.
ఈ క్రమంలో ఇజ్రాయెల్ దక్షిణ గాజాపై విమానాల ద్వారా కరపత్రాలను విసురుతోంది, అందులో సిన్వర్ మృతదేహానికి సంబంధించిన ఫొటోతో పాటు "హమాస్ ఇకపై గాజాను పాలించదు. ఆయుధాలు వదిలి బందీలను అప్పగిస్తే స్వేచ్ఛగా జీవించే అవకాశం కల్పిస్తాం" అనే సందేశాలు ఉన్నాయని సమాచారం.