Russia-Iran: ఇరాన్కు రష్యా రహస్య సాయం.. సూపర్సోనిక్ క్షిపణుల అభివృద్ధి?
ఈ వార్తాకథనం ఏంటి
రష్యా.. ఇరాన్కు అత్యాధునిక సూపర్సోనిక్ క్రూయిజ్ క్షిపణుల అభివృద్ధిలో రహస్యంగా సాయం చేస్తున్నట్లు 'ది ఫైనాన్షియల్ టైమ్స్' ఓ నివేదికలో వెల్లడించింది. 2023 నుంచి ఈ సహకారం కొనసాగుతున్నట్లు పేర్కొంది. 'C430L' అనే కోడ్ పేరుతో ఈ ప్రాజెక్టు సాగుతున్నట్లు సమాచారం. క్రూయిజ్ క్షిపణుల కోసం రామ్జెట్ ఇంజిన్ వ్యవస్థను అభివృద్ధి చేయడమే దీని ప్రధాన లక్ష్యంగా తెలుస్తోంది. ఈ సాంకేతికతతో శబ్ద వేగం కంటే ఎన్నో రెట్లు వేగంగా ప్రయాణించే క్షిపణులను రూపొందించే అవకాశం ఉంటుంది. వీటిని సముద్రంలోని నౌకలపై, అలాగే భూభాగంలోని లక్ష్యాలపై దాడులకు ఉపయోగించవచ్చని నివేదిక తెలిపింది. ముఖ్యంగా గల్ఫ్ ప్రాంతంలోని నౌకాదళాలకు ఇవి ముప్పుగా మారే అవకాశం ఉందని పేర్కొంది.
వివరాలు
ప్రాజెక్టులో పాల్గొన్న రష్యా క్షిపణి నిపుణులు
ఈ ప్రాజెక్టును రష్యా ప్రభుత్వానికి చెందిన ఆయుధ ఎగుమతి సంస్థ రోసోబోరోనెక్స్పోర్ట్.. అమెరికా ఆంక్షలు ఎదుర్కొంటున్న ఎన్పీఓ మషినోస్ట్రోయెనియాతో కలిసి ఏర్పాటు చేసినట్లు నివేదిక పేర్కొంది.
2023లో రష్యా ఆయుధ ఎగుమతి సంస్థకు చెందిన అధికారులు, ఎన్పీఓ మషినోస్ట్రోయెనియాకు చెందిన సీనియర్ నిపుణులు పలుమార్లు ఇరాన్ను సందర్శించినట్లు తెలిపింది.
ఈ ప్రాజెక్టులో రష్యాకు చెందిన అనుభవజ్ఞులైన క్షిపణి నిపుణులు పాల్గొన్నట్లు సమాచారం.
సముద్ర ప్రయోగ క్షిపణుల చీఫ్ డిజైనర్ అలెగ్జాండర్ డెర్గాచెవ్, గాలితో పనిచేసే ప్రొపల్షన్ యూనిట్ల డిజైన్ విభాగం అధిపతి అలెగ్జాండర్ చెబకోవ్, ఏరోడైనమిక్స్, బాలిస్టిక్స్ విభాగం అధిపతి యూరీ ప్రొఖోర్చుక్ తదితరులు ఇందులో ఉన్నట్లు నివేదిక తెలిపింది.
వివరాలు
ఇరాన్ నుంచి రష్యాకు సాంకేతిక సమాచారం
రోసోబోరోనెక్స్పోర్ట్ రక్షణ సాంకేతికతలు, అంతరిక్ష విభాగం అధిపతి వ్లాడిస్లావ్ కుజ్మిచెవ్ కూడా రష్యా బృందంతో కలిసి ఇరాన్కు మూడోసారి వెళ్లినట్లు ఫైనాన్షియల్ టైమ్స్ తెలిపింది.
అనంతరం ఇరాన్తో C430L ఒప్పందంపై చర్చలు జరిపినట్లు పేర్కొంది.
2025 నాటికి ఎన్పీఓ మషినోస్ట్రోయెనియాకు ఇరాన్ నుంచి వివిధ సాంకేతిక పత్రాలు, సమాచారం అందినట్లు నివేదిక వెల్లడించింది.
వీటిని రష్యా ఇంజినీర్లు పరిశీలించినట్లు తెలిపింది. రామ్జెట్ ప్రొపల్షన్ వ్యవస్థను ఇరాన్ ఇప్పటికే అభివృద్ధి చేసి, దానిపై ప్రయోగాలు కూడా నిర్వహించినట్లు సమాచారం.
అయితే రష్యా సహకారంతో రూపొందించిన సూపర్సోనిక్ క్రూయిజ్ క్షిపణిని ఇరాన్ ఇప్పటివరకు మోహరించలేదని నివేదిక పేర్కొంది.
వివరాలు
క్షిపణుల అభివృద్ధితో అమెరికా-ఇరాన్ ఉద్రిక్తతలు
రష్యా సాయం ఇరాన్కు అందితే అమెరికా నౌకాదళానికి చెందిన నౌకలను కూడా బెదిరించగల కొత్త తరహా వ్యూహాత్మక ఆయుధ వ్యవస్థ అందుబాటులోకి వస్తుందని సీఐఏలో ఇరాన్ వ్యవహారాలపై పనిచేసిన మాజీ సైనిక విశ్లేషకుడు జిమ్ లాంసన్ ఫైనాన్షియల్ టైమ్స్తో అన్నారు.
ఈ ప్రాజెక్టుపై చర్చలు ఈ వేసవిలో కూడా కొనసాగినట్లు లీకైన సమాచారాన్ని బట్టి తెలుస్తోందని నివేదిక తెలిపింది.
మరోవైపు అమెరికా-ఇరాన్ మధ్య ఉద్రిక్తతలు మరింత పెరుగుతున్న సమయంలో ఈ పరిణామం వెలుగులోకి వచ్చింది.
ఇరాన్ రివల్యూషనరీ గార్డ్ చేపట్టిన దాడుల ప్రయత్నాలకు ప్రతిస్పందనగా అమెరికా సెంట్రల్ కమాండ్ ఇరాన్ సైనిక లక్ష్యాలపై దాడులు చేసినట్లు సమాచారం.
వివరాలు
రష్యా మద్దతుపై ఇరాన్ కృతజ్ఞతలు
అమెరికా జరిపిన దాడుల్లో తమ దేశంలో 11 మంది మృతి చెందినట్లు ఇరాన్ బుధవారం వెల్లడించింది.
దీనికి ప్రతీకారంగా జోర్డాన్లోని అమెరికా ప్రిన్స్ హసన్ ఎయిర్బేస్పై బాలిస్టిక్ క్షిపణి దాడి చేసినట్లు ఇరాన్ ప్రభుత్వ వార్తా సంస్థ ఐఆర్ఎన్ఏ తెలిపింది.
ఆ స్థావరంలో ఉన్న ఆర్క్యూ-4, ఎమ్క్యూ-9 డ్రోన్లకు సంబంధించిన సదుపాయాలే లక్ష్యంగా దాడి జరిగినట్లు పేర్కొంది.
ఇదిలా ఉండగా, అమెరికా ఆంక్షలు, ఏకపక్ష విధానాలకు వ్యతిరేకంగా రష్యా అందిస్తున్న మద్దతుకు ఇరాన్ అధ్యక్షుడు మసూద్ పెజెష్కియన్ మంగళవారం రష్యా అధ్యక్షుడు వ్లాదిమిర్ పుతిన్కు కృతజ్ఞతలు తెలిపారు.
సైనిక ఉద్రిక్తతలు కొనసాగుతున్నప్పటికీ రష్యా-ఇరాన్ మధ్య ఆర్థిక, వాణిజ్య సహకారం కొనసాగుతుందని పుతిన్ హామీ ఇచ్చినట్లు సమాచారం.