Strait of Hormuz: హర్మూజ్ జలసంధిలో ఉద్రిక్తతలు.. సింగపూర్ నౌక సముద్రంలో మునక
ఈ వార్తాకథనం ఏంటి
హర్మూజ్ జలసంధిలో ఉద్రిక్తతలు తీవ్రరూపం దాల్చాయి. ఈ మార్గంలో ప్రయాణిస్తున్న సింగపూర్‌లో రిజిస్టర్ అయిన రెండు కంటైనర్ నౌకలపై గుర్తుతెలియని ప్రక్షేపకాలతో దాడులు జరిగినట్లు సమాచారం. ఈ ఘటనలో ఒక నౌక మంటల్లో చిక్కుకుని పూర్తిగా దగ్ధమై సముద్రంలో మునిగిపోయింది. ఈ విషయాన్ని సింగపూర్ మారిటైమ్ అండ్ పోర్ట్ అథారిటీ (ఎంపీఏ) బుధవారం ధ్రువీకరించింది. 'జీఎఫ్ఎస్ ప్రైడ్' అనే నౌకపై దాడి జరగడంతో మంటలు చెలరేగి, చివరకు అది సముద్రంలో మునిగిపోయిందని ఎంపీఏ వెల్లడించింది. అయితే, ఆ నౌకలో ఉన్న 21 మంది సిబ్బందిని సురక్షితంగా రక్షించినట్లు తెలిపింది. మరోవైపు, 'జీఎఫ్ఎస్ గిసెల్' అనే రెండో నౌక కూడా దాడికి గురై స్వల్పంగా దెబ్బతింది.
వివరాలు
భిన్నమైన కథనాన్ని చెబుతున్న ఇరాన్
అయినప్పటికీ,ఆ నౌక తనంతట తానే సురక్షిత ప్రాంతానికి చేరుకోగలిగింది. అందులోని 22మంది సిబ్బంది కూడా క్షేమంగా ఉన్నారని అధికారులు వివరించారు.
ఈ రెండు నౌకల్లోనూ సింగపూర్ పౌరులు ఎవరూ లేరని స్పష్టం చేశారు.
ఈ ఘటనపై ఇరాన్ మాత్రం భిన్నమైన వివరాలను వెల్లడించింది.
ఇరాన్ ఇస్లామిక్ రెవల్యూషనరీ గార్డ్ కార్ప్స్ (ఐఆర్జీసీ) నేవీ ప్రకారం.. తమ జలాల్లోకి అనుమతి లేకుండా, ప్రమాదకరమైన మార్గంలో ప్రవేశించిన ఓ నౌక నేవల్ మైన్‌ను ఢీకొని పేలిపోయింది.
ఆ నౌకలో 2,500కు పైగా కంటైనర్లు ఉన్నాయని, పేలుడు తర్వాత మంటలు చెలరేగి సముద్రంలో మునిగిపోయిందని ఇరాన్ పేర్కొంది.
నౌక మునిగిపోవడంతో సముద్రంలో కంటైనర్లు తేలియాడుతున్నాయని,వాటి కారణంగా ఇతర నౌకలకు ప్రమాదం ఎదురయ్యే అవకాశం ఉందని ఇరాన్ హెచ్చరించింది.
వివరాలు
నిబంధనలు ఉల్లంఘిస్తే కఠిన చర్యలు
ఈ మార్గంలో ప్రయాణించే సమీపంలోని పడవలు, నౌకలు అప్రమత్తంగా ఉండాలని సూచించింది.
హర్మూజ్ జలసంధిపై తమ నౌకాదళం నిరంతరం నిఘా ఉంచుతోందని ఐఆర్జీసీ నేవీ కమాండర్ అలీ అజ్మాయీ తెలిపారు.
అమెరికా ప్రేరేపణతో ఎవరైనా నిబంధనలను ఉల్లంఘించేందుకు ప్రయత్నిస్తే కఠిన చర్యలు తీసుకుంటామని హెచ్చరించారు.
ఈ ఘటనతో ఇప్పటికే ఉద్రిక్తంగా ఉన్న హర్మూజ్ జలసంధిలో నౌకల రాకపోకలు, సముద్ర భద్రతపై ఆందోళనలు మరింత పెరిగాయి.