Masked Man: అలీ ఖమేనీ అంత్యక్రియల్లో కనిపించిన మిస్టరీ వ్యక్తి ఎవరంటే?
ఈ వార్తాకథనం ఏంటి
ఇరాన్ మాజీ సుప్రీం లీడర్ అయతొల్లా అలీ ఖమేనీ అంత్యక్రియల సందర్భంగా నల్ల ముసుగు ధరించి ముందు వరుసలో నిలబడ్డ ఓ వ్యక్తి ప్రపంచవ్యాప్తంగా చర్చనీయాంశంగా మారారు. ప్రార్థనల్లో పాల్గొన్న ఆయన వీడియోలు సోషల్ మీడియాలో వేగంగా వైరల్ కావడంతో,ఆ వ్యక్తి అలీ ఖమేనీ కుమారుడు మొజ్తబా ఖమేనీనేనని పలువురు ఊహించారు. దీంతో ఈ అంశంపై అంతర్జాతీయ స్థాయిలో విస్తృత చర్చ సాగింది. అయితే కొద్ది గంటల్లోనే ఈ ఊహాగానాలకు తెరపడింది. నల్ల ముసుగు ధరించిన వ్యక్తి మొజ్తబా ఖమేనీ కాదని,అలీ ఖమేనీ పెద్ద మనవడు మొహమ్మద్ జవాద్ ఖమేనీ అని ఇరాన్ ఇంటర్నేషనల్ వెల్లడించింది. అమెరికా,ఇజ్రాయెల్ వైమానిక దాడుల్లో తీవ్ర గాయాలు కావడంతోనే ఆయన ముఖాన్ని నల్ల ముసుగుతో కప్పుకున్నట్లు సమాచారం.
వివరాలు
అమెరికా,ఇజ్రాయెల్ వైమానిక దాడుల్లో గాయపడిన జవాద్ ఖమేనీ
అంత్యక్రియల సందర్భంగా మొహమ్మద్ జవాద్ ఖమేనీ ముందు వరుసలో నిలబడి ప్రార్థనల్లో పాల్గొన్నారు. ఆయన బేస్బాల్ టోపీతో పాటు ముఖమంతా కప్పేలా నల్ల ముసుగు ధరించడం వల్లే మొదట ఆయన గుర్తింపుపై అనుమానాలు వ్యక్తమయ్యాయి. వీడియోలు వైరల్ కావడంతో సోషల్ మీడియాలో పలు కథనాలు ప్రచారంలోకి వచ్చాయి. అయితే అనంతరం ఇరాన్ మీడియా ఆయన అసలు గుర్తింపును స్పష్టం చేసింది. సమాచారం ప్రకారం, ఫిబ్రవరి 28న జరిగిన అమెరికా, ఇజ్రాయెల్ వైమానిక దాడుల్లో మొహమ్మద్ జవాద్ ఖమేనీ తీవ్రంగా గాయపడ్డారు. అదే దాడుల్లో అలీ ఖమేనీ మరణించినట్లు పేర్కొంటున్నారు. మరోవైపు మొజ్తబా ఖమేనీ ముఖానికి కూడా తీవ్ర గాయాలైనట్లు అమెరికా నిఘా నివేదికలు వెల్లడించినట్లు సమాచారం.
వివరాలు
అంత్యక్రియలకు 4.3 కోట్ల మంది
మొహమ్మద్ జవాద్ ఖమేనీ, అలీ ఖమేనీ పెద్ద కుమారుడు మొస్తఫా ఖమేనీ కుమారుడు. అంటే ఆయన అలీ ఖమేనీ పెద్ద మనవడు. మొస్తఫా ఖమేనీ సుమారు 1965లో జన్మించినట్లు అక్కడి మీడియా కథనాలు వెల్లడించాయి. అలీ ఖమేనీ అంత్యక్రియలు గురువారం నిర్వహించగా, ఆరు రోజులపాటు కొనసాగిన కార్యక్రమాల్లో సుమారు 4.3 కోట్ల మంది పాల్గొన్నట్లు ఇరాన్ ప్రభుత్వ మీడియా తెలిపింది. ఇదిలా ఉండగా, మొజ్తబా ఖమేనీ శనివారం టెలిగ్రామ్ వేదికగా లిఖితపూర్వక సందేశాన్ని విడుదల చేశారు. తన తండ్రి మరణానికి ప్రతీకారం తీర్చుకుంటానని ఆ సందేశంలో పేర్కొన్నారు.