Kawasaki Z1100: భారత్‌లో 2027 కవాసకి Z1100 లాంచ్.. ధర రూ.12.79 లక్షలు!
ఈ వార్తాకథనం ఏంటి
ప్రముఖ ద్విచక్ర వాహన తయారీ సంస్థ కవాసకి (Kawasaki) భారత మార్కెట్లో 2027 Z1100 బైక్‌ను అధికారికంగా విడుదల చేసింది. ఈ కొత్త మోడల్ ఎక్స్‌షోరూమ్ ధరను రూ.12.79 లక్షలుగా నిర్ణయించింది. అయితే, గత మోడల్‌తో పోలిస్తే ఈ బైక్‌లో డిజైన్, ఫీచర్లు, ఇంజిన్, ఇతర సాంకేతిక అంశాల్లో ఎలాంటి మార్పులు చేయలేదు. గతంలో ఉన్న ఎబోనీ/మెటాలిక్ కార్బన్ గ్రే (Ebony/Metallic Carbon Gray) కలర్ ఆప్షన్‌లోనే ఇది అందుబాటులో ఉంది. కవాసకి Z1100 తన స్పోర్టీ డిజైన్‌తో పాటు స్ట్రీట్‌ఫైటర్ లుక్‌ను కొనసాగిస్తోంది. పదునైన ఫ్రంట్ డిజైన్, కండలు తిరిగినట్లుగా కనిపించే ఫ్యూయల్ ట్యాంక్ ఈ బైక్‌కు ప్రత్యేక ఆకర్షణగా నిలుస్తాయి.
వివరాలు
ఇంజిన్, పనితీరు
2027 కవాసకి Z1100లో 1,099 సీసీ, లిక్విడ్ కూల్డ్, ఇన్‌లైన్ ఫోర్ సిలిండర్ ఇంజిన్‌ను అందించారు.
ఈ ఇంజిన్ 9,000 ఆర్‌పీఎం వద్ద గరిష్ఠంగా 136 హెచ్‌పీ పవర్‌ను, 7,600 ఆర్‌పీఎం వద్ద 113 ఎన్ఎం టార్క్‌ను ఉత్పత్తి చేస్తుంది. ఈ బైక్‌లో ఆరు గేర్ల గేర్‌బాక్స్‌ను అమర్చారు.
ఇందులో అసిస్ట్, స్లిప్పర్ క్లచ్ సదుపాయాలు ఉన్నాయి. అంతేకాకుండా, బై-డైరెక్షనల్ క్విక్‌షిఫ్టర్‌ను కూడా అందించారు.
దీని సాయంతో క్లచ్‌ను ఉపయోగించకుండానే గేర్లను పైకి, కిందికి మార్చుకోవచ్చు. దీంతో గేర్లు మార్చే సమయంలో రైడింగ్ మరింత సులభంగా ఉంటుంది.
వివరాలు
డిజైన్, సస్పెన్షన్, బ్రేకింగ్
కవాసకి Z1100లో అల్యూమినియం ఫ్రేమ్‌ను కొనసాగించారు. ముందు వైపు 41 మిల్లీమీటర్ల ఇన్వర్టెడ్ ఫోర్క్ సస్పెన్షన్‌ను, వెనుక వైపు గ్యాస్‌చార్జ్డ్ హారిజాంటల్ బ్యాక్-లింక్ మోనోషాక్ సస్పెన్షన్‌ను అందించారు.
ముందు, వెనుక సస్పెన్షన్లలోనూ అవసరానికి అనుగుణంగా సర్దుబాట్లు చేసుకునే సదుపాయం ఉంది.
బ్రేకింగ్ విషయానికి వస్తే.. ముందు చక్రానికి రెండు 310 మిల్లీమీటర్ల డిస్క్ బ్రేకులు, వాటికి బ్రెంబో మోనోబ్లాక్ కాలిపర్లను అమర్చారు.
వెనుక చక్రానికి 260 మిల్లీమీటర్ల సింగిల్ డిస్క్ బ్రేక్‌ను అందించారు. ఇవి బైక్ వేగాన్ని నియంత్రించడంలో సహాయపడతాయి.