Kilauea volcano: 700 అడుగుల ఎత్తుకు ఎగిసిన లావా.. కిలావుయా అగ్నిపర్వతం మరోసారి బ్లాస్ట్‌!
ఈ వార్తాకథనం ఏంటి
అమెరికాలోని హవాయి ద్వీపంలో ఉన్న క్రియాశీల అగ్నిపర్వతం కిలావుయా మరోసారి విస్ఫోటనం చెందింది. అక్టోబర్ 17న సంభవించిన ఈ విస్ఫోటనంలో భారీగా లావా ఫౌంటెన్లు ఎగిసిపడ్డాయి. సుమారు 700 అడుగుల ఎత్తు వరకు లావా చిమ్మినట్లు సమాచారం. 2024 డిసెంబర్ నుంచి ఇప్పటివరకు 22 నెలల వ్యవధిలో ఈ అగ్నిపర్వతం విస్ఫోటనం చెందడం ఇది 55వసారి కావడం గమనార్హం.
వివరాలు
తెల్లవారుజామున ప్రారంభమైన విస్ఫోటనం
హవాయిలోని వోల్కనోస్ నేషనల్ పార్క్‌లో ఉన్న కిలావుయా అగ్నిపర్వతం ఉత్తర బిలం నుంచి స్థానిక కాలమానం ప్రకారం తెల్లవారుజామున 3.19 గంటలకు లావా బయటకు రావడం ప్రారంభమైంది.
ఉదయం 5 గంటల సమయానికి విస్ఫోటనం తీవ్రత మరింత పెరిగింది. ఈ ప్రక్రియ సుమారు ఆరు గంటల పాటు కొనసాగి ఉదయం 9 గంటలకు ముగిసింది.
విస్ఫోటనం ధాటికి అగ్నిపర్వతం నుంచి వెలువడిన బూడిద మేఘం సుమారు 25,000 అడుగుల ఎత్తు వరకు వ్యాపించింది.
మరోవైపు లావా ఫౌంటెన్లు సుమారు 700 అడుగుల ఎత్తుకు ఎగసిపడటం ఈ విస్ఫోటనం తీవ్రతను తెలియజేస్తోంది.
వివరాలు
రెండు నెలల తర్వాత మళ్లీ విస్ఫోటనం
కిలావుయా అగ్నిపర్వతం చివరిసారిగా ఆగస్టు 25న విస్ఫోటనం చెందింది.
దాదాపు రెండు నెలల విరామం తర్వాత అక్టోబర్ 17న మరోసారి బద్దలైంది.
అయితే తాజా విస్ఫోటనం హలేమా ఉమాఉ అగ్నిపర్వత బిలానికే పరిమితం కావడంతో చుట్టుపక్కల ప్రాంతాలకు పెద్దగా ప్రమాదం ఏర్పడలేదు.
వివరాలు
ప్రపంచంలోని క్రియాశీల అగ్నిపర్వతాల్లో ఒకటి
కిలావుయా ప్రపంచంలో అత్యంత క్రియాశీలంగా ఉన్న అగ్నిపర్వతాల్లో ఒకటిగా గుర్తింపు పొందింది.
తరచూ విస్ఫోటనాలు సంభవించే ఈ అగ్నిపర్వతం మరోసారి లావా, బూడిదను భారీగా వెలువరించడంతో స్థానికంగా ఆసక్తి నెలకొంది.
2024 డిసెంబర్ నుంచి తాజా విస్ఫోటనం వరకు మొత్తం 55 సార్లు విస్ఫోటనం చెందడం కిలావుయా నిరంతర క్రియాశీలతను సూచిస్తోంది.