Ather: గుంతలపై ముందే అలర్ట్.. ఏథర్ ఈ-స్కూటర్లలో కొత్త 'Pothole+ Alerts' ఫీచర్!

వ్రాసిన వారు Jayachandra Akuri

Jul 29, 2026

01:32 pm

ఈ వార్తాకథనం ఏంటి

ఎలక్ట్రిక్ ద్విచక్ర వాహనాల తయారీ సంస్థ 'ఏథర్ ఎనర్జీ (Ather Energy)' తన వినియోగదారుల కోసం ఎంతో ఆసక్తిగా ఎదురుచూస్తున్న 'Pothole+ Alerts' ఫీచర్‌ను అధికారికంగా అందుబాటులోకి తీసుకొచ్చింది. దాదాపు ఏడాది క్రితం నిర్వహించిన కమ్యూనిటీ డే (Community Day) కార్యక్రమంలో ఈ టెక్నాలజీని మొదటిసారి పరిచయం చేయగా, ఇప్పుడు ఎంపిక చేసిన ఏథర్ స్కూటర్లకు అందిస్తోంది. ఏ స్కూటర్లకు అందుబాటులో? ఈ ఫీచర్‌ను 'Gen 2' ఆ తర్వాత విడుదలైన ఏథర్ స్కూటర్లకు అందుబాటులోకి తెచ్చారు. వీటిలో ముఖ్యంగా: Ather 450 Apex Ather 450X Ather Rizta Z మోడళ్ల వినియోగదారులు ఈ సదుపాయాన్ని ఉపయోగించుకోవచ్చు.

వివరాలు

దశాబ్ద కాలం పరిశోధన ఫలితం

'Pothole+ Alerts' ఫీచర్‌ను అభివృద్ధి చేయడానికి దాదాపు 10 సంవత్సరాల సమయం పట్టిందని ఏథర్ తెలిపింది.

కంపెనీ కనెక్టెడ్ స్కూటర్ల నుంచి సంవత్సరాలుగా సేకరించిన రియల్-వరల్డ్ రైడింగ్ డేటా ఆధారంగా ఈ టెక్నాలజీని రూపొందించింది.

ఏథర్ స్కూటర్లలో ఉన్న ఆన్‌బోర్డ్ కంప్యూటింగ్, కనెక్టివిటీ వ్యవస్థల ద్వారా రోడ్ల పరిస్థితులకు సంబంధించిన భారీ డేటాబేస్‌ను కంపెనీ రూపొందించింది.

వివరాలు

Pothole+ Alerts ఎలా పనిచేస్తుంది?

ఏథర్ కనెక్టెడ్ స్కూటర్ల నుంచి సేకరించిన సమాచారాన్ని విశ్లేషించి రోడ్డుపై ఉండే ప్రమాదకర ప్రాంతాలను ఈ సిస్టమ్ గుర్తిస్తుంది.

వీటిలో ముఖ్యంగా:

గుంతలు (Potholes)

దెబ్బతిన్న రోడ్లు

ఎత్తుపల్లాలు ఉన్న రహదారులు

సరిగా నిర్మించని స్పీడ్ బ్రేకర్లు

వంటి ప్రమాదకర ప్రాంతాల గురించి ముందుగానే హెచ్చరిస్తుంది.

వినియోగదారులు స్కూటర్‌లో నావిగేషన్ ఉపయోగిస్తున్నప్పుడు, ముందున్న ప్రమాదకర రోడ్డు పరిస్థితులపై అలర్ట్‌లు అందుతాయి.

వివరాలు

డిస్‌ప్లేలోనూ.. ఆడియో రూపంలోనూ హెచ్చరికలు

ఈ హెచ్చరికలు స్కూటర్ డ్యాష్‌బోర్డ్‌పై కనిపించడంతో పాటు Ather Halo స్మార్ట్ హెల్మెట్, బ్లూటూత్ హెడ్‌సెట్ ఉపయోగిస్తున్న వారికి ఆడియో రూపంలో కూడా అందుతాయి.

దీంతో రైడర్లు ముందుగానే అప్రమత్తమై సురక్షితంగా ప్రయాణించవచ్చు.

ఇకపై వేగవంతమైనదే కాదు.. స్మూత్ రూట్ కూడా

ప్రస్తుతం ఈ ఫీచర్ రోడ్డుపై ఉన్న ప్రమాదాల గురించి మాత్రమే హెచ్చరిస్తోంది. అయితే భవిష్యత్తులో మరింత అధునాతన నావిగేషన్ సేవలను అందించాలనే లక్ష్యంతో ఏథర్ పనిచేస్తోంది.

కంపెనీ సేకరిస్తున్న రోడ్డు సమాచారాన్ని ఉపయోగించి, వేగంగా చేరుకునే మార్గంతో పాటు అత్యంత సౌకర్యవంతమైన(Smoothest Route)మార్గాన్ని కూడా సూచించే టెక్నాలజీని అభివృద్ధి చేయాలని యోచిస్తోంది.

దీంతో గుంతలు, దెబ్బతిన్న రోడ్లు ఉన్న మార్గాలను తప్పించుకుని మరింత సౌకర్యంగా ప్రయాణించే అవకాశం ఉంటుంది.

వివరాలు

మరిన్ని స్మార్ట్ ఫీచర్లకు శ్రీకారం

'Pothole+ Alerts' అనేది కనెక్టెడ్ వాహనాల సామర్థ్యాన్ని వినియోగించుకునే దిశలో తొలి అడుగు మాత్రమేనని ఏథర్ ఎనర్జీ తెలిపింది.

ఇదే డేటా ఆధారిత ప్లాట్‌ఫామ్‌ను ఉపయోగించి భవిష్యత్తులో మరిన్ని స్మార్ట్ ఫీచర్లను అందించనున్నట్లు కంపెనీ వెల్లడించింది.

అయితే అవి ఏవన్న వివరాలను ఇంకా ప్రకటించలేదు.