Aston Martin AMB 002 Roadster: ఆస్టన్ మార్టిన్ AMB 002 రోడ్స్టర్.. 130 హెచ్పీ పవర్తో లగ్జరీ రైడ్
ఈ వార్తాకథనం ఏంటి
లగ్జరీ కార్ల తయారీ సంస్థ ఆస్టన్ మార్టిన్, బ్రిటిష్ మోటార్సైకిల్ తయారీదారు బ్రౌ సుపీరియర్ భాగస్వామ్యంతో మరో ప్రీమియం బైక్ను తీసుకొచ్చారు. ఈ భాగస్వామ్యంలో ఇప్పటికే ట్రాక్ కోసం మాత్రమే రూపొందించిన AMB 001, AMB 001 Pro మోడళ్లు వచ్చాయి. తాజాగా వీటి తర్వాత రోడ్డుపై నడపడానికి అనుమతి ఉన్న AMB 002 Roadsterను అభివృద్ధి చేశారు. కార్బన్-ఫైబర్ బాడీ, కాంపాక్ట్ డిజైన్, బయటకు కనిపించే మెకానికల్ భాగాలతో ఈ బైక్ ప్రత్యేకంగా కనిపిస్తుంది. ఆస్టన్ మార్టిన్, బ్రౌ సుపీరియర్ కలిసి రూపొందించిన మునుపటి మోడళ్ల డిజైన్ శైలిని AMB 002 Roadster కూడా కొనసాగిస్తుంది.
వివరాలు
కేవలం 300 బైక్లే..
AMB 002 Roadsterను పరిమిత సంఖ్యలో మాత్రమే ఉత్పత్తి చేయనున్నారు. ప్రపంచవ్యాప్తంగా కేవలం 300 యూనిట్లను మాత్రమే తయారు చేయాలని కంపెనీలు నిర్ణయించాయి. ఈ బైక్లో రీడిజైన్ చేసిన సైడ్ స్ట్రేక్ ఉంది.
ఇది హెడ్ల్యాంప్ హౌసింగ్ వరకు కొనసాగుతుంది. ట్విన్ ఎగ్జాస్ట్ల డిజైన్కు ఆస్టన్ మార్టిన్ రోడ్ కార్ల నుంచి స్ఫూర్తి తీసుకున్నారు.
అలాగే ఆస్టన్ మార్టిన్ హైపర్కార్లను పోలిన రియర్ లైట్ బ్లేడ్స్ను ఇందులో అందించారు.
కీ లేకుండా బైక్ను ఆపరేట్ చేసే సదుపాయం, బ్యాక్లిట్ ఇగ్నిషన్ బటన్, లెదర్ సీట్ ప్యాడ్స్ వంటి ఫీచర్లు కూడా ఉన్నాయి.
వివరాలు
5 కిలోల టైటానియం ఫ్రేమ్..
AMB 002 Roadsterకు ప్రధాన నిర్మాణ ఆధారంగా టైటానియం ఫ్రేమ్ను ఉపయోగించారు. ఒకే బిల్లెట్ నుంచి మెషీన్ చేసిన ఈ ఫ్రేమ్ బరువు కేవలం 5 కిలోలు.
బైక్ క్లెయిమ్డ్ కర్బ్ వెయిట్ 190 కిలోలు. బాడీ ప్యానెల్స్, ఫ్యూయల్ ట్యాంక్ భాగాల్లో కార్బన్ ఫైబర్ను ఉపయోగించారు.
ముందువైపు బ్రౌ సుపీరియర్ ప్రత్యేకమైన డబుల్ విష్బోన్ 'ఫియోర్ ఫోర్క్' సస్పెన్షన్ను అందించారు.
ఇది స్టీరింగ్, బ్రేకింగ్ ఫోర్స్లను వేరు చేయడంతో పాటు ముందు భాగం జ్యామెట్రీని స్థిరంగా ఉంచడంలో సహాయపడుతుంది.
వివరాలు
1,083cc V-ట్విన్ ఇంజిన్.. 130 హెచ్పీ పవర్
AMB 002 Roadsterలో 1,083cc లిక్విడ్-కూల్డ్ V-ట్విన్ ఇంజిన్ను అమర్చారు. ఈ ఇంజిన్ గరిష్ఠంగా 130 హెచ్పీ పవర్, 110 ఎన్ఎం టార్క్ ఉత్పత్తి చేస్తుంది.
తక్కువ, మధ్యస్థ ఆర్పీఎం పరిధిలో బలమైన పనితీరును అందించేలా ఇంజిన్ను ట్యూన్ చేశారు.
అదే సమయంలో ఎక్కువ ఆర్పీఎంల వద్ద కూడా పవర్ కొనసాగించేలా రూపొందించారు.
ఈ మోటార్సైకిల్ను ప్రధానంగా రోడ్ రైడింగ్కు అనువైన పెర్ఫార్మెన్స్ బైక్గా ఆస్టన్ మార్టిన్ అభివర్ణిస్తోంది.
వివరాలు
'నాలుగు చక్రాలకు మించి మా డిజైన్ భాషకు ఆదరణ'
ఆస్టన్ మార్టిన్ బ్రాండ్ డైవర్సిఫికేషన్ డైరెక్టర్ స్టెఫానో సపోరెట్టి మాట్లాడుతూ.. రెండు చారిత్రక బ్రిటిష్ సంస్థల భాగస్వామ్యంగా మొదలైన ఈ ప్రయాణం ఇప్పుడు లగ్జరీ కో-క్రియేషన్లో బలమైన భాగస్వామ్యంగా మారిందని అన్నారు.
తొలి పరిమిత ఉత్పత్తి మోడల్ నుంచి ప్రస్తుత పోర్ట్ఫోలియో వరకు తమ వాణిజ్య ప్రయాణం విజయవంతమైందని పేర్కొన్నారు.
బ్రౌ సుపీరియర్ ఇంజినీరింగ్ నైపుణ్యంతో కలిసి పనిచేసినప్పుడు ఆస్టన్ మార్టిన్ డిజైన్ భాషకు నాలుగు చక్రాలకు మించి కూడా ఆదరణ ఉందని ఈ భాగస్వామ్యం నిరూపించిందన్నారు.
ఈ భాగస్వామ్యం ఒక మైలురాయి తొలి మోడల్తో ఆగిపోకుండా.. దీర్ఘకాలికంగా బ్రాండ్ విలువను పెంచే స్థాయికి చేరుకుందని స్టెఫానో సపోరెట్టి తెలిపారు.