BMW: ఇంజిన్ స్టార్టర్ సమస్య.. ప్రపంచవ్యాప్తంగా BMW కార్ల రీకాల్
ఈ వార్తాకథనం ఏంటి
జర్మనీకి చెందిన ప్రఖ్యాత లగ్జరీ కార్ల తయారీ సంస్థ BMW ప్రపంచవ్యాప్తంగా భారీ సంఖ్యలో కార్లను వెనక్కి పిలిపించుకుంటున్నట్లు ప్రకటించింది. ఇంజిన్ స్టార్టర్ వ్యవస్థలో తలెత్తిన సాంకేతిక లోపం కారణంగా వాహనాల్లో అగ్ని ప్రమాదం సంభవించే అవకాశం ఉండటంతో ఈ నిర్ణయం తీసుకున్నట్లు సంస్థ ప్రతినిధులు తెలిపారు. 2020 నుంచి 2022 మధ్య కాలంలో తయారైన మొత్తం 16 మోడళ్లలో ఈ సమస్య ఉన్నట్లు గుర్తించినట్లు వెల్లడించారు. వివిధ మోడళ్లకు చెందిన సుమారు 5 లక్షల 75 వేల వాహనాలపై ఈ లోపం ప్రభావం చూపే అవకాశం ఉందని అంచనా వేస్తున్నారు.
వివరాలు
ఈ లోపం కారణంగా వాహనంలో మంటలు చెలరేగే ప్రమాదం
ఉత్పత్తి సమయంలో చేసిన తనిఖీలు, అలాగే వినియోగదారుల నుంచి వచ్చిన ఫిర్యాదుల ఆధారంగా స్టార్టర్ మోటార్ వ్యవస్థలో లోపాలు ఉన్నట్లు నిర్ధారణకు వచ్చామని కంపెనీ పేర్కొంది. వాహనాన్ని పదే పదే స్టార్ట్ చేయడానికి ప్రయత్నించినప్పుడు స్టార్టర్లోని మాగ్నెటిక్ స్విచ్లు క్రమంగా అరిగిపోతాయని, దాంతో కారు స్టార్ట్ కావడం కూడా కష్టమవుతుందని వివరించింది. కొన్ని అరుదైన సందర్భాల్లో ఈ లోపం కారణంగా వాహనంలో మంటలు చెలరేగే ప్రమాదం కూడా ఉన్నట్లు సంస్థ స్పష్టం చేసింది.