E85 Flex-Fuel Motorcycles: భారత్‌లో అందుబాటులో ఉన్న E85 ఫ్లెక్స్ ఫ్యూయల్ బైక్‌లు ఇవే!

వ్రాసిన వారు Sirish Praharaju

Jul 13, 2026

05:05 pm

ఈ వార్తాకథనం ఏంటి

ఎథనాల్ మిశ్రమ ఇంధనంపై చర్చలు పెరుగుతున్న వేళ, భారత్‌లో ఫ్లెక్స్ ఫ్యూయల్ టెక్నాలజీ కలిగిన మోటార్‌సైకిళ్లకు డిమాండ్ క్రమంగా పెరుగుతోంది. కేంద్ర ప్రభుత్వం ఎథనాల్ వినియోగాన్ని ప్రోత్సహిస్తుండటంతో వాహన తయారీ సంస్థలు E20 నుంచి E85 వరకు ఎథనాల్-పెట్రోల్ మిశ్రమ ఇంధనంతో నడిచే బైక్‌లను మార్కెట్లోకి తీసుకొస్తున్నాయి. ఈ బైక్‌లలో ప్రత్యేక ఫ్యూయల్ సిస్టమ్, ఇంజిన్ భాగాలు, ఎలక్ట్రానిక్ కాలిబ్రేషన్ వంటి మార్పులు ఉండటంతో వివిధ శాతం ఎథనాల్ కలిగిన ఇంధనాన్ని సులభంగా ఉపయోగించవచ్చు. ప్రస్తుతం భారత్‌లో నాలుగు E85 ఫ్లెక్స్ ఫ్యూయల్ మోటార్‌సైకిళ్లు విక్రయాల్లో ఉన్నాయి.

వివరాలు

హీరో స్ప్లెండర్+ ఫ్లెక్స్ ఫ్యూయల్

హీరో మోటోకార్ప్ దేశంలో సామాన్య వినియోగదారులను దృష్టిలో పెట్టుకుని విడుదల చేసిన తొలి E85 ఫ్లెక్స్ ఫ్యూయల్ బైక్‌లలో స్ప్లెండర్+ ఫ్లెక్స్ ఫ్యూయల్ ఒకటి. సాధారణ స్ప్లెండర్ మాదిరిగానే కనిపించే ఈ బైక్‌లో E20 నుంచి E85 వరకు ఎథనాల్ మిశ్రమ ఇంధనాన్ని ఉపయోగించేలా ఫ్యూయల్ సిస్టమ్, ఇంజిన్ మేనేజ్‌మెంట్, ఇతర భాగాల్లో మార్పులు చేశారు.

ఇందులో 97.2 సీసీ సింగిల్ సిలిండర్ ఇంజిన్‌ను అందించారు. దీని ఎక్స్‌షోరూమ్ ధర రూ.82,710.

వివరాలు

హీరో హెచ్‌ఎఫ్ డీలక్స్ ఫ్లెక్స్ ఫ్యూయల్

హీరో హెచ్‌ఎఫ్ డీలక్స్ ఫ్లెక్స్ ఫ్యూయల్ కూడా స్ప్లెండర్+ ఫ్లెక్స్ ఫ్యూయల్‌కు సమానమైన మెకానికల్ సెటప్‌తో వస్తుంది.

ఇందులో కూడా 97.2 సీసీ సింగిల్ సిలిండర్ ఇంజిన్ ఉండగా, E20 నుంచి E85 వరకు ఎథనాల్ మిశ్రమ ఇంధనాన్ని ఉపయోగించవచ్చు.

తక్కువ ధరలో ఫ్లెక్స్ ఫ్యూయల్ బైక్ కొనాలనుకునే వారికి ఇది మంచి ఎంపికగా నిలుస్తోంది.

దీని ఎక్స్‌షోరూమ్ ధర రూ.72,792. ప్రస్తుతం భారత్‌లో లభిస్తున్న అత్యంత చవకైన E85 బైక్‌లలో ఇదొకటి.

వివరాలు

సుజుకి జిక్సర్ SF 250 ఫ్లెక్స్ ఫ్యూయల్

కమ్యూటర్ సెగ్మెంట్‌కే పరిమితం కాకుండా ప్రీమియం విభాగంలో కూడా సుజుకి జిక్సర్ SF 250 ఫ్లెక్స్ ఫ్యూయల్ను అందుబాటులోకి తీసుకొచ్చింది.

సాధారణ జిక్సర్ SF 250 డిజైన్‌ను కొనసాగిస్తూ, E85 ఇంధనానికి అనుగుణంగా ఇంజిన్ ట్యూనింగ్, ఫ్యూయల్ డెలివరీ సిస్టమ్‌లో మార్పులు చేసింది.

ఇందులో 249 సీసీ సింగిల్ సిలిండర్, ఆయిల్ కూల్డ్ ఇంజిన్ ఉంది.

ప్రస్తుతం భారత్‌లో విక్రయాల్లో ఉన్న E85 ఫ్లెక్స్ ఫ్యూయల్ బైక్‌లలో అత్యధిక ఇంజిన్ సామర్థ్యం కలిగిన మోడల్ ఇదే. దీని ఎక్స్‌షోరూమ్ ధర రూ.2,00,896.

వివరాలు

యమహా FZ బ్లూ ఫ్లెక్స్

యమహా కూడా జులై 2026లో FZ బ్లూ ఫ్లెక్స్ పేరుతో ఫ్లెక్స్ ఫ్యూయల్ బైక్‌ను భారత మార్కెట్లో విడుదల చేసింది.

FZ ప్లాట్‌ఫారమ్ ఆధారంగా రూపొందించిన ఈ మోటార్‌సైకిల్ E20 నుంచి E85 వరకు ఎథనాల్ మిశ్రమ ఇంధనంతో నడుస్తుంది.

ఇందులో 149 సీసీ సింగిల్ సిలిండర్ బ్లూ కోర్ ఇంజిన్‌ను అమర్చారు. ప్రారంభ ఎక్స్‌షోరూమ్ ధర రూ.1.24 లక్షలుగా కంపెనీ నిర్ణయించింది.