Ford cars: ఫోర్డ్ కార్లతో దొంగలకు చెక్‌.. దానంతట అదే తప్పించుకునేలా కొత్త టెక్నాలజీ!
ఈ వార్తాకథనం ఏంటి
అత్యాధునిక టెక్నాలజీతో కార్ల తయారీలో దూసుకెళ్తున్న ఫోర్డ్ (Ford) మరో కొత్త ఆలోచనతో ముందుకొచ్చింది. కార్లను దొంగతనాల నుంచి రక్షించేందుకు వాహనాలు వాటంతట అవే సురక్షిత ప్రాంతాలకు వెళ్లేలా ఓ సాంకేతికతకు పేటెంట్‌ కోసం దరఖాస్తు చేసింది. అమెరికా పేటెంట్‌, ట్రేడ్‌మార్క్‌ కార్యాలయం (USPTO)లో ఈ టెక్నాలజీకి సంబంధించిన దరఖాస్తును సమర్పించింది. ఈ వ్యవస్థ పరిసరాల్లో అనుమానాస్పద కదలికలను గుర్తించి, కారు తనంతట తానే సురక్షితమైన ప్రదేశానికి వెళ్లేలా పనిచేస్తుంది. అవసరమైతే గోడకు దగ్గరగా పార్క్‌ చేసుకుని, కారులోని వస్తువులు, చక్రాలను దొంగలు దొంగిలించకుండా అడ్డుకునే అవకాశం ఉంటుంది.
వివరాలు
అనుమానాస్పద కదలికలను ఎలా గుర్తిస్తుంది?
ఈ పేటెంట్‌ వివరాల ప్రకారం.. కారు చుట్టుపక్కల అనుమానాస్పద కార్యకలాపాలను గుర్తించేలా ఈ వ్యవస్థను రూపొందించనున్నారు.
ఎవరైనా కారు కిటికీల్లోంచి లోపలికి తొంగి చూడటం, మరో వాహనం అనుమానాస్పదంగా కారు చుట్టూ తిరగడం వంటి పరిస్థితులను ఇది గుర్తించగలదు.
అలాంటి కదలికలు కనిపిస్తే కారు అక్కడి నుంచి మరో సురక్షితమైన ప్రదేశానికి వెళ్లేలా వ్యవస్థ పనిచేస్తుంది.
అలాగే, గతంలో రద్దీగా ఉన్న పార్కింగ్‌ ప్రదేశంలో వాహనాలన్నీ వెళ్లిపోయి, తన కారు ఒక్కటే మిగిలినప్పుడు కూడా మరో పార్కింగ్‌ స్థలాన్ని ఎంచుకోవాలని సూచించగలదు.
వివరాలు
చక్రాల దొంగతనాన్ని అడ్డుకునేలా సెల్ఫ్‌ పార్కింగ్‌!
కొత్త కార్లలో చక్రాల దొంగతనం కూడా ఓ సమస్యగా మారింది. ఈ నేపథ్యంలో అలాంటి దొంగతనాలను అడ్డుకునేలా ఫోర్డ్ కొత్త టెక్నాలజీని ప్రతిపాదించింది.
కారు తనంతట తానే రెండు గోడలు లేదా ఇతర వాహనాల మధ్య పార్క్‌ చేసుకునేలా ఈ వ్యవస్థ పనిచేయవచ్చు.
అలాగే, వాలుగా ఉన్న ప్రదేశంలో లేదా నేల మెత్తగా, ఎగుడుదిగుడుగా ఉన్న చోట కూడా పార్కింగ్‌ చేసుకునే అవకాశం ఉంటుంది.
ఇలాంటి ప్రదేశాల్లో జాక్‌ ఉపయోగించి కారును పైకి లేపడం దొంగలకు కష్టమవుతుంది.
తద్వారా చక్రాలను తొలగించి దొంగిలించే ప్రయత్నాలను అడ్డుకోవచ్చని ఈ పేటెంట్‌ వివరిస్తోంది.
వివరాలు
ఖరీదైన కారు విడిభాగాలకు కూడా రక్షణ
కారులోని వస్తువులు, ఖరీదైన విడిభాగాలను దొంగతనం కాకుండా కాపాడేందుకు కూడా ఈ టెక్నాలజీ ఉపయోగపడవచ్చు.
డ్రైవర్‌ కారు దిగి వెళ్లిన తర్వాత వాహనం తనంతట తానే మరో ప్రదేశానికి వెళ్లి, గోడకు దగ్గరగా పార్క్‌ చేసుకోవచ్చు.
దీంతో కారు వెనుక భాగంలోని డిక్కీ లేదా హ్యాచ్‌బ్యాక్‌ తలుపును తెరవడం దొంగలకు కష్టమవుతుంది.
అంతేకాకుండా, కార్లలో ఖరీదైన హెడ్‌లైట్లు, టెయిల్‌లైట్లను తొలగించి దొంగిలించకుండా కూడా ఈ విధానం కొంతవరకు రక్షణ కల్పించవచ్చు.
వివరాలు
ప్రస్తుతానికి పేటెంట్‌ దశలోనే టెక్నాలజీ
ఫోర్డ్ ప్రతిపాదించిన ఈ టెక్నాలజీ ఆసక్తికరంగా ఉన్నప్పటికీ, ప్రస్తుతం ఇది పేటెంట్‌ దరఖాస్తు దశలోనే ఉంది.
ఈ టెక్నాలజీకి పేటెంట్‌ లభించినా, దాన్ని కంపెనీ తన ఉత్పత్తి కార్లలో అమలు చేస్తుందని కచ్చితంగా చెప్పలేం.
భవిష్యత్తులో ఈ వ్యవస్థ అందుబాటులోకి వస్తే, కార్ల భద్రతను మరింత మెరుగుపరిచే అవకాశం ఉంటుంది.