Honda ADV160: అడ్వెంచర్ లుక్‌తో భారత మార్కెట్లోకి హోండా ADV160 మ్యాక్సీ స్కూటర్

వ్రాసిన వారు Moogati Shabari

Jul 25, 2026

01:02 pm

ఈ వార్తాకథనం ఏంటి

భారత ద్విచక్ర వాహన విభాగంలో అడ్వెంచర్ స్టైల్ మ్యాక్సీ స్కూటర్‌ను పరిచయం చేస్తూ హోండా తన కొత్త ADV160 మోడల్‌ను ఆవిష్కరించింది. ఆకర్షణీయమైన డిజైన్‌తో పాటు, ఈ స్కూటర్‌ను భారతదేశంలోనే తయారు చేసి విదేశాలకు ఎగుమతి చేయనున్నట్లు కంపెనీ ప్రకటించింది. దీంతో మార్కెట్లోకి వచ్చిన తర్వాత దీని ధర పోటీ స్థాయిలో ఉండే అవకాశాలు కనిపిస్తున్నాయి. హోండా X-ADVకు చిన్న వెర్షన్‌లా కనిపించేలా ADV160ను రూపొందించారు. సాధారణ స్కూటర్లతో పోలిస్తే మరింత దృఢమైన, అడ్వెంచర్ తరహా రూపాన్ని ఇది సొంతం చేసుకుంది. ఇందులో ఎత్తును సర్దుబాటు చేసుకునే విండ్‌స్క్రీన్, ట్విన్ ఎల్ఈడీ హెడ్‌ల్యాంప్స్, బ్లాక్ ప్యాటర్న్ టైర్లు వంటి అంశాలు ఉన్నాయి.

వివరాలు

రోడ్డుపై ప్రత్యేకమైన ఆకర్షణ..

నగర ప్రయాణాలతో పాటు అడ్వెంచర్ ఫీలింగ్‌ను అందించేలా హోండా "సిటీ అడ్వెంచర్" కాన్సెప్ట్ ఆధారంగా ఈ మోడల్‌ను అభివృద్ధి చేసింది.

రోజువారీ వినియోగానికి అనువుగా ఉండటంతో పాటు రోడ్డుపై ప్రత్యేకమైన ఆకర్షణను కలిగించేలా దీని డిజైన్ రూపొందించబడింది.

భారతదేశంలో ప్రదర్శించిన తొలి E85 కంప్లయింట్ స్కూటర్లలో ADV160 ఒకటిగా హోండా పేర్కొంది.

అంటే 85 శాతం వరకు ఎథనాల్ కలిగిన ఇంధన మిశ్రమంతో కూడా ఈ స్కూటర్ పనిచేసే సామర్థ్యాన్ని కలిగి ఉంది.

దేశంలో ప్రత్యామ్నాయ ఇంధన సాంకేతికతలు వేగంగా అభివృద్ధి చెందుతున్న నేపథ్యంలో ఇది ప్రత్యేకమైన ఫీచర్‌గా నిలుస్తోంది.

వివరాలు

లిక్విడ్ కూల్డ్ ఇంజిన్‌..

ఫీచర్ల విషయానికి వస్తే, ADV160లో TFT డిజిటల్ ఇన్‌స్ట్రుమెంట్ డిస్‌ప్లేతో పాటు Honda RoadSync స్మార్ట్‌ఫోన్ కనెక్టివిటీ అందుబాటులో ఉంది.

అలాగే USB ఛార్జింగ్ పోర్ట్, Honda Selectable Torque Control (HSTC), సింగిల్-చానల్ ABS, 27 లీటర్ల అండర్‌సీట్ స్టోరేజ్ వంటి ఆధునిక సదుపాయాలను కూడా ఇందులో అందించారు.

ఈ స్కూటర్‌కు 157 సీసీ సింగిల్ సిలిండర్, లిక్విడ్ కూల్డ్ ఇంజిన్‌ను అమర్చారు.

ఇది గరిష్ఠంగా 16.3 హెచ్‌పీ శక్తితో పాటు 14.9 ఎన్ఎమ్ టార్క్ను ఉత్పత్తి చేస్తుంది.

వివరాలు

స్కూటర్ మొత్తం బరువు 133 కిలోగ్రాములు..

ఈ ఇంజిన్‌కు CVT ఆటోమేటిక్ ట్రాన్స్‌మిషన్‌ను జత చేశారు. ముఖ్యంగా భవిష్యత్ ఇంధన అవసరాలను దృష్టిలో పెట్టుకుని రూపొందించిన E85 అనుకూలత ఈ స్కూటర్‌కు ప్రధాన ఆకర్షణగా నిలుస్తోంది.

సస్పెన్షన్ వ్యవస్థలో ముందు భాగంలో టెలిస్కోపిక్ ఫోర్క్, వెనుక భాగంలో ట్విన్ షాక్ అబ్జార్బర్లు ఉన్నాయి.

ముందు 14 అంగుళాల చక్రం, వెనుక 13 అంగుళాల చక్రాన్ని అమర్చారు.

స్కూటర్ మొత్తం బరువు 133 కిలోగ్రాములు. సీటు ఎత్తు 780 మిల్లీమీటర్లు, గ్రౌండ్ క్లియరెన్స్ 165 మిల్లీమీటర్లు కాగా, ఇంధన ట్యాంక్ సామర్థ్యం 8.1 లీటర్లు.