Honda NX500: ఈ-క్లచ్ టెక్నాలజీతో హోండా NX500 లాంచ్.. ధర ఎంతంటే?
ఈ వార్తాకథనం ఏంటి
హోండా మోటార్సైకిల్ & స్కూటర్ ఇండియా భారత మార్కెట్లో కొత్త హోండా NX500 అడ్వెంచర్ టూరర్ బైక్ను ఈ-క్లచ్ టెక్నాలజీతో విడుదల చేసింది. ఈ మోటార్సైకిల్ ప్రారంభ ధర రూ.7.44 లక్షలు (ఎక్స్షోరూమ్)గా నిర్ణయించారు. ఈ కొత్త ఈ-క్లచ్ సిస్టమ్ ప్రత్యేకత ఏమిటంటే.. క్లచ్ లీవర్ ఉపయోగించకుండా గేర్ మార్పులు చేసుకునే అవకాశం ఉండటం. అయితే డిజైన్, ఇంజిన్, మెకానికల్ అంశాల్లో ఎలాంటి మార్పులు చేయకుండా, ప్రధానంగా ఈ-క్లచ్ టెక్నాలజీనే కొత్తగా అందించారు.
వివరాలు
ఎలా పనిచేస్తుంది ఈ-క్లచ్?
హోండా అందించిన ఈ-క్లచ్ సిస్టమ్లో రెండు ఎలక్ట్రానిక్ యాక్చ్యుయేటర్లు క్లచ్ను ఆటోమేటిక్గా నియంత్రిస్తాయి. గేర్ మార్చే సమయంలో క్లచ్ను ఆటోమేటిక్గా ఆపరేట్ చేస్తూ, రైడర్కు సులభమైన డ్రైవింగ్ అనుభవాన్ని అందిస్తాయి. బైక్ పూర్తిగా ఆగినప్పుడు లేదా మళ్లీ స్టార్ట్ చేసినప్పుడు కూడా ఈ సిస్టమ్ పనిచేస్తుంది. అయితే రైడర్కు అవసరమైతే సంప్రదాయ క్లచ్ లీవర్, గేర్ పెడల్ను ఉపయోగించి మాన్యువల్గా కూడా గేర్ మార్చుకునే అవకాశం ఉంది. ఈ-క్లచ్ సిస్టమ్ కారణంగా బైక్ బరువు 3 కిలోలు పెరిగి, మొత్తం 199 కిలోలకు చేరింది. ఇటీవల హోండా తన హోండా CB650R, హోండా CBR650Rమోడళ్లలో కూడా ఈ-క్లచ్ ఆప్షన్ను అందించింది. అయితే ఆ మోడళ్ల తాజా బ్యాచ్ ఇప్పటికే పూర్తిగా అమ్ముడైందని సమాచారం.
వివరాలు
ఇంజిన్, పనితీరు
కొత్త NX500లో మెకానికల్ సెటప్ను యథాతథంగా కొనసాగించారు. ఇందులో 471సీసీ ట్విన్ సిలిండర్ లిక్విడ్ కూల్డ్ ఇంజిన్ను అందించారు. ఈ ఇంజిన్ 8,500 ఆర్పీఎం వద్ద 47 హార్స్పవర్ శక్తిని, 6,500 ఆర్పీఎం వద్ద 43 ఎన్ఎం టార్క్ను ఉత్పత్తి చేస్తుంది. బైక్లో 6-స్పీడ్ గేర్బాక్స్ను అందించగా, క్లచ్ వ్యవస్థలో మాత్రమే మార్పులు చేశారు.
వివరాలు
సస్పెన్షన్, బ్రేకింగ్ వ్యవస్థ
ఈ అడ్వెంచర్ టూరర్ ముందు భాగంలో యూఎస్డీ (USD) ఫోర్క్, వెనుక భాగంలో మోనోషాక్ సస్పెన్షన్ను కలిగి ఉంది. ముందు 19 అంగుళాల, వెనుక 17 అంగుళాల అల్లాయ్ వీల్స్ను అందించారు. బ్రేకింగ్ కోసం డ్యూయల్ ఛానల్ ఏబీఎస్తో పాటు ముందు భాగంలో ట్విన్ 296 మిల్లీమీటర్ల డిస్క్ బ్రేకులు, రేడియల్గా అమర్చిన నిస్సిన్ కాలిపర్స్ను ఉపయోగించారు. వెనుక భాగంలో 240 మిల్లీమీటర్ల సింగిల్ డిస్క్ బ్రేక్ను అందించారు.
వివరాలు
ఫీచర్లు ఎలా ఉన్నాయి?
హోండా NX500లో 5 అంగుళాల టీఎఫ్టీ డిస్ప్లే, బలమైన స్విచ్గేర్ వంటి ఫీచర్లు ఉన్నాయి. ఎలక్ట్రానిక్ రైడింగ్ అసిస్ట్స్లో డ్యూయల్ ఛానల్ ఏబీఎస్, స్విచ్ చేయగల ట్రాక్షన్ కంట్రోల్ మాత్రమే ఉన్నాయి. అయితే ప్రస్తుతం ప్రీమియం బైక్స్లో కనిపించే రైడింగ్ మోడ్స్, అధునాతన గ్యాడ్జెట్స్ వంటి ఫీచర్లు ఇందులో ఇవ్వలేదు. అలాగే ఈ బైక్లో ఇప్పటికీ కేబుల్ ఆపరేటెడ్ థ్రోటిల్ను ఉపయోగించడం గమనార్హం.