Kawasaki: కవాసాకి నుంచి కొత్త డ్యూయల్-స్పోర్ట్ బైక్.. 233సీసీ ఇంజిన్తో KLX230 S విడుదల
ఈ వార్తాకథనం ఏంటి
భారత మార్కెట్లో ప్రముఖ ద్విచక్ర వాహన తయారీ సంస్థ కవాసాకి కొత్త మోటార్సైకిల్ను విడుదల చేసింది. MY27 KLX230 S పేరుతో వచ్చిన ఈ డ్యూయల్-స్పోర్ట్ బైక్ను కంపెనీ రూ.2.19 లక్షల (ఎక్స్-షోరూమ్) ధరకు అందుబాటులోకి తీసుకొచ్చింది. మెరుగైన హ్యాండ్లింగ్ కోసం 830 మి.మీ సీట్ హైట్, 233సీసీ ఇంజిన్తో ఈ కొత్త మోడల్ను తీసుకొచ్చింది. ముఖ్యంగా కొత్త రైడర్లు, తక్కువ ఎత్తు ఉన్న రైడర్లను దృష్టిలో పెట్టుకుని ఎర్గోనామిక్స్లో మార్పులు చేసింది. ఈ బైక్ బుకింగ్స్ దేశవ్యాప్తంగా ఉన్న అన్ని కవాసాకి డీలర్షిప్లలో ప్రారంభమయ్యాయి.
వివరాలు
మరింత సులభంగా ఉపయోగించగలిగే వెర్షన్..
కవాసాకి రోడ్-లీగల్ డ్యూయల్-స్పోర్ట్ మోటార్సైకిల్లలో KLX230 S మరింత సులభంగా ఉపయోగించగలిగే వెర్షన్గా నిలుస్తోంది. తక్కువ సీట్ హైట్తో పాటు ఎర్గోనామిక్స్లో చేసిన మార్పుల వల్ల వివిధ స్థాయిల రైడర్లకు ఆఫ్-రోడ్ రైడింగ్ మరింత సౌకర్యవంతంగా ఉంటుంది. ఈ మోడల్లో ప్రధాన ఆకర్షణగా నిలిచేది 830 మి.మీ సీట్ హైట్. ఇది స్టాండర్డ్ KLX230తో పోలిస్తే 50 మి.మీ తక్కువగా ఉంది. ఇంజిన్ విషయానికి వస్తే, కవాసాకి KLX230 Sలో 233సీసీ ఎయిర్-కూల్డ్, ఫ్యూయల్-ఇంజెక్టెడ్, సింగిల్-సిలిండర్ ఇంజిన్ అందించారు. ఈ ఇంజిన్ 7,800 ఆర్పీఎమ్ వద్ద 19 హెచ్పీ శక్తిని, 6,400 ఆర్పీఎమ్ వద్ద 19 ఎన్ఎం గరిష్ట టార్క్ను ఉత్పత్తి చేస్తుంది. దీనికి 6-స్పీడ్ గేర్బాక్స్ను జత చేశారు.
వివరాలు
7.5 లీటర్ల ఫ్యూయల్ ట్యాంక్ సామర్థ్యం..
నగర రోడ్లపై ప్రయాణంతో పాటు ఆఫ్-రోడ్ రైడింగ్లోనూ మెరుగైన లో-టు-మిడ్ రేంజ్ పనితీరును అందించేలా ఇంజిన్ను ట్యూన్ చేశారు. ఈ బైక్ కర్బ్ వెయిట్ 139 కిలోలు కాగా, 7.5 లీటర్ల ఫ్యూయల్ ట్యాంక్ సామర్థ్యాన్ని కలిగి ఉంది. సస్పెన్షన్ పరంగా కూడా KLX230 S తన డ్యూయల్-స్పోర్ట్ లక్షణాలను కొనసాగించింది. ముందుభాగంలో టెలిస్కోపిక్ ఫోర్క్, వెనుక భాగంలో కవాసాకి Uni-Trak రియర్ మోనోషాక్ సస్పెన్షన్ అందించారు. బ్రేకింగ్ కోసం ముందుభాగంలో డ్యూయల్-పిస్టన్ కాలిపర్తో కూడిన 290 మి.మీ డిస్క్ బ్రేక్, వెనుక భాగంలో సింగిల్-పిస్టన్ కాలిపర్తో 230 మి.మీ డిస్క్ బ్రేక్ ఏర్పాటు చేశారు. రైడింగ్ సమయంలో అవసరమైతే ABSను ఆఫ్ చేసుకునేలా స్విచ్బుల్ ABS ఫీచర్ను కూడా కంపెనీ అందిస్తోంది.
వివరాలు
రెండు రంగుల్లో అందుబాటులోకి..
ఈ బైక్లో 21 అంగుళాల ఫ్రంట్ వీల్, 18 అంగుళాల రియర్ వైర్-స్పోక్ వీల్ సెటప్ను ఉపయోగించారు. వీటికి డ్యూయల్-పర్పస్ టైర్లను అమర్చారు. అదనంగా LED లైటింగ్, డిజిటల్ ఇన్స్ట్రుమెంట్ కన్సోల్ వంటి ఫీచర్లు కూడా ఉన్నాయి. కొత్త రైడర్లతో పాటు అనుభవజ్ఞులైన రైడర్లకు కూడా అనుకూలంగా ఉండేలా తేలికైన హ్యాండ్లింగ్ను అందించారు. MY27 కవాసాకి KLX230 S రెండు రంగుల్లో అందుబాటులో ఉంది. అవి లైమ్ గ్రీన్ మరియు బ్యాటిల్ గ్రే.