Tata Tiago EV Review: ధర తక్కువ.. ఫీచర్లు ఎక్కువ.. 2026 టియాగో ఈవీ రివ్యూపై ఓ లుక్కేయండి!

వ్రాసిన వారు Jayachandra Akuri

Jun 09, 2026

03:36 pm

ఈ వార్తాకథనం ఏంటి

భారత ఎలక్ట్రిక్ కార్ల మార్కెట్లో టాటా మోటార్స్‌కు చెందిన టియాగో ఈవీ ఇప్పటికే మంచి ఆదరణ పొందుతోంది. ఇప్పుడు 2026 ఫేస్‌లిఫ్ట్ వెర్షన్‌తో ఈ కారు మరింత ఆకర్షణీయంగా మారింది. కొత్త డిజైన్, ఆధునిక ఫీచర్లు, అందుబాటు ధరలతో నగర ప్రయాణాలకు అనువైన ఎలక్ట్రిక్ హ్యాచ్‌బ్యాక్‌గా టియాగో ఈవీ మరోసారి తన ప్రత్యేకతను చాటుతోంది.

వివరాలు

డిజైన్‌లో మార్పులు

ఎలక్ట్రిక్ వాహనాలకు ప్రత్యేక గుర్తింపుగా ఉండే క్లోజ్డ్ ఫ్రంట్ ఫాసియా డిజైన్‌ను టియాగో ఈవీ కొనసాగించింది. సంప్రదాయ గ్రిల్‌కు బదులుగా క్లీన్ లుక్‌ను అందించే ముందు భాగం ఉండగా, కొత్త బంపర్ డిజైన్‌ను జోడించారు. సైడ్ ప్రొఫైల్‌లో బ్లాక్ కాంట్రాస్ట్ రూఫ్, కొత్త అలాయ్ వీల్స్, అదనపు క్రోమ్ హైలైట్స్‌ను అందించారు. వెనుక భాగంలో కనెక్టెడ్ టెయిల్ ల్యాంప్స్‌ను అమర్చడం ద్వారా కారు మరింత ఆధునికంగా కనిపిస్తోంది.

వివరాలు

ఇంటీరియర్‌లో ప్రధాన అప్‌డేట్స్

2026 టియాగో ఈవీ క్యాబిన్‌లోనే ఎక్కువ మార్పులు కనిపిస్తాయి. కొత్త స్టీరింగ్ వీల్, అప్‌డేటెడ్ డిజిటల్ డిస్‌ప్లేలు, క్లీన్ డ్యాష్‌బోర్డ్ డిజైన్ కారుకు ప్రీమియం ఫీలింగ్‌ను అందిస్తున్నాయి. ఫీచర్ల పరంగా 10.25 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ డ్రైవర్ డిస్‌ప్లే, ఆటోమేటిక్ క్లైమేట్ కంట్రోల్, క్రూయిజ్ కంట్రోల్, సర్‌రౌండ్ వ్యూ కెమెరా వంటి సదుపాయాలు అందుబాటులో ఉన్నాయి. సెంటర్ కన్సోల్‌ను కొత్తగా డిజైన్ చేయగా, సంప్రదాయ గేర్ లివర్ స్థానంలో రోటరీ డయల్‌ను అందించారు. దీంతో క్యాబిన్ మరింత ఆధునికంగా కనిపిస్తోంది. అలాగే 65W USB ఫాస్ట్ చార్జింగ్ సపోర్ట్ ఉన్నప్పటికీ, వెనుక సీటు ప్రయాణికుల కోసం ప్రత్యేక చార్జింగ్ పోర్ట్ లేకపోవడం ఒక చిన్న లోపంగా చెప్పవచ్చు.

వివరాలు

స్టోరేజ్, సౌకర్యాలు

ముందు సీట్ల వెనుక భాగంలో అదనపు స్టోరేజ్ పాకెట్లు అందించారు. రియర్ ఏసీ వెంట్స్‌ను కూడా జోడించారు. లైట్ కలర్ ఇంటీరియర్ వల్ల క్యాబిన్ విశాలంగా అనిపించినప్పటికీ, దీర్ఘకాలంలో శుభ్రంగా ఉంచడం కొంత సవాల్‌గా మారే అవకాశం ఉంది. బ్యాటరీ, పనితీరు టియాగో ఈవీలో యాంత్రికంగా ఎలాంటి మార్పులు చేయలేదు. ఇది రెండు బ్యాటరీ ప్యాక్ ఎంపికలతో అందుబాటులో ఉంటుంది. 19.2 kWh బ్యాటరీ 24 kWh బ్యాటరీ ఈ బ్యాటరీలు వరుసగా 61 హెచ్‌పీ, 75 హెచ్‌పీ శక్తిని ఉత్పత్తి చేస్తాయి. ఇప్పుడు టియాగో ఈవీ 65 కిలోవాట్ల వరకు ఫాస్ట్ డీసీ చార్జింగ్‌కు మద్దతు ఇస్తోంది. దీని వల్ల ప్రయాణాల సమయంలో చార్జింగ్ సమయం గణనీయంగా తగ్గుతుంది.

వివరాలు

డ్రైవింగ్ అనుభవం

కంపెనీ ప్రకారం పెద్ద బ్యాటరీ ప్యాక్‌తో 285 కిలోమీటర్ల వరకు రేంజ్ లభిస్తుంది. అయితే వాస్తవ వినియోగంలో సుమారు 180 కిలోమీటర్ల వరకు ఉపయోగకరమైన రేంజ్‌ను అందించగలదని అంచనా. నగరాల్లో రోజువారీ ప్రయాణాల కోసం టియాగో ఈవీ ఎంతో అనుకూలంగా ఉంటుంది. కారు పరిమాణం చిన్నగా ఉండటంతో ట్రాఫిక్‌లో సులభంగా నడపవచ్చు. యాక్సిలరేషన్ స్మూత్‌గా ఉండగా, రీజనరేటివ్ బ్రేకింగ్ కూడా సౌకర్యవంతంగా ఉంటుంది. 170 మిల్లీమీటర్ల గ్రౌండ్ క్లియరెన్స్ కారణంగా స్పీడ్ బ్రేకర్లు, గుంతలపై కూడా పెద్దగా ఇబ్బంది ఉండదు. 60-80 కిమీ వేగాల్లో ప్రయాణించే సమయంలో మంచి కంఫర్ట్‌ను అందిస్తుంది.

వివరాలు

భద్రతకు పెద్దపీట

భద్రత పరంగా టాటా ఈసారి మరింత మెరుగులు దిద్దింది. అన్ని వేరియంట్లలో 6 ఎయిర్‌బ్యాగ్‌లను స్టాండర్డ్‌గా అందిస్తోంది. సర్‌రౌండ్ వ్యూ కెమెరా, క్రూయిజ్ కంట్రోల్, ఇతర భద్రతా ఫీచర్లు కూడా ఇందులో ఉన్నాయి. ధర ఎంత? 2026 టాటా టియాగో ఈవీ ప్రారంభ ఎక్స్-షోరూమ్ ధర సుమారు రూ.6.99 లక్షలుగా ఉంది. బ్యాటరీ-యాజ్-ఎ-సర్వీస్ (BaaS) మోడల్ ద్వారా ప్రారంభ ధరను రూ.4.69 లక్షల వరకు అందుబాటులోకి తీసుకొచ్చింది. టాప్ వేరియంట్ ఆన్-రోడ్ ధర సుమారు రూ.10 లక్షల వరకు ఉండే అవకాశం ఉంది. 2026 టాటా టియాగో ఈవీ పూర్తిగా కొత్త కారు కాకపోయినా, ఇప్పటికే ఉన్న బలాలను మరింత మెరుగుపరుచుకున్న మోడల్‌గా నిలిచింది.