Harley-Davidson: హార్లీ-డేవిడ్సన్ నుంచి కొత్త ఎలక్ట్రిక్ మినీ బైక్స్.. ఒక్కసారి చార్జ్ చేస్తే 117 కి.మీ రేంజ్!
ఈ వార్తాకథనం ఏంటి
ప్రముఖ అమెరికన్ ద్విచక్ర వాహన తయారీ సంస్థ హార్లీ-డేవిడ్సన్కు చెందిన ఎలక్ట్రిక్ వాహన విభాగం లైవ్వైర్ (LiveWire) రెండు కొత్త ఎలక్ట్రిక్ మినీ బైక్లను ఆవిష్కరించింది. లైవ్వైర్ S4 హాన్చో ట్రైల్ (S4 Honcho Trail), లైవ్వైర్ S4 హాన్చో స్ట్రీట్ (S4 Honcho Street) పేర్లతో ఈ బైక్లను మార్కెట్లోకి తీసుకువచ్చింది. తైవాన్కు చెందిన ప్రముఖ ద్విచక్ర వాహన తయారీ సంస్థ కిమ్కో (Kymco) సహకారంతో రూపొందించిన ఈ మోడళ్లు యువత, కొత్త రైడర్లు, కాంపాక్ట్ ఎలక్ట్రిక్ మోటార్సైకిల్ కోరుకునే వినియోగదారులను లక్ష్యంగా చేసుకుని అభివృద్ధి చేశారు. ఈ ఏడాది చివర్లో యూకే మార్కెట్లో తొలుత విక్రయాలు ప్రారంభం కానున్నాయి.
వివరాలు
డిజైన్ ఎలా ఉంది?
లైవ్వైర్ S4 హాన్చో సిరీస్ బైక్లు సరళమైన, ఉపయోగకరమైన డిజైన్తో రూపొందించబడ్డాయి. ట్యూబ్యులర్ స్టీల్ ఫ్రేమ్పై నిర్మించిన ఈ బైక్లలో బ్యాటరీ ప్యాక్ హౌసింగ్ కూడా చాసిస్లో భాగంగా పనిచేస్తుంది. వినియోగదారులు మోస్సీ ఓట్ (Mossy Oat), లిక్విడ్ బ్లాక్ (Liquid Black) రంగుల్లో వీటిని కొనుగోలు చేయవచ్చు. స్ట్రీట్, ట్రైల్ వెర్షన్ల మధ్య తేడా ఇదే S4 హాన్చో స్ట్రీట్ రోడ్లపై చట్టబద్ధంగా నడపడానికి అనువుగా రూపొందించారు.ఇందులో మిర్రర్లు, ఎల్ఈడీ లైటింగ్, ఇండికేటర్లు, ఇన్స్ట్రుమెంట్ క్లస్టర్, రియర్ ఫెండర్ వంటి ఫీచర్లు ఉన్నాయి. మరోవైపు S4 హాన్చో ట్రైల్ పూర్తిగా ఆఫ్-రోడ్ వినియోగాన్ని దృష్టిలో ఉంచుకుని అభివృద్ధి చేశారు. అందువల్ల ఇందులో స్ట్రీట్ వెర్షన్లో ఉన్న కొన్ని రోడ్ ఫీచర్లు ఉండవు.
వివరాలు
బ్యాటరీ, రేంజ్ వివరాలు
అలాగే ట్రైల్ మోడల్లో నాబీ (Knobby) ఆఫ్-రోడ్ టైర్లు ఉండగా, స్ట్రీట్ వెర్షన్లో సాధారణ రోడ్ టైర్లు అమర్చారు. ఈ రెండు బైక్లలో కలిపి 1.74 కిలోవాట్ అవర్ (kWh) సామర్థ్యం గల రెండు రిమూవబుల్ బ్యాటరీ ప్యాక్లను అందించారు. సాధారణ వినియోగంలో ఒక్కసారి పూర్తి చార్జ్ చేస్తే సుమారు 85 కిలోమీటర్ల వరకు ప్రయాణించవచ్చు. అయితే గంటకు సుమారు 32 కిలోమీటర్ల స్థిర వేగంతో ప్రయాణిస్తే గరిష్టంగా 117 కిలోమీటర్ల వరకు రేంజ్ లభిస్తుందని కంపెనీ పేర్కొంది.
వివరాలు
పెర్ఫార్మెన్స్ ఎలా ఉంది?
పరిమాణంలో చిన్నవిగా ఉన్నప్పటికీ ఈ ఎలక్ట్రిక్ మినీ బైక్ల పనితీరు ఆకట్టుకునే స్థాయిలో ఉంది. గరిష్టంగా 95 కిలోమీటర్ల వేగం అందుకోగలవు. అలాగే 0 నుంచి 48 కిలోమీటర్ల వేగాన్ని కేవలం 3 సెకన్లలోనే చేరుకుంటాయి. చార్జింగ్ విషయానికి వస్తే, బ్యాటరీని 20 శాతం నుంచి 80 శాతం వరకు చార్జ్ చేయడానికి సుమారు 2 గంటల సమయం పడుతుంది. బరువు, సీటు ఎత్తు S4 హాన్చో ట్రైల్ బరువు 114.7 కిలోలు కాగా, స్ట్రీట్ వెర్షన్ బరువు 120.6 కిలోలు. ట్రైల్ మోడల్ సీటు ఎత్తు 736.6 మిల్లీమీటర్, స్ట్రీట్ మోడల్ సీటు ఎత్తు 762 మిల్లీమీటర్లగా ఉంది. దీంతో వివిధ ఎత్తుల రైడర్లకు ఈ బైక్లు సులభంగా ఉపయోగపడతాయి.
వివరాలు
125సీసీ పెట్రోల్ బైక్లకు సమానమైన పనితీరు
కొత్త S4 హాన్చో సిరీస్ బైక్లు సంప్రదాయ 125సీసీ పెట్రోల్ పిట్ బైక్లకు సమానమైన పనితీరును అందిస్తాయని లైవ్వైర్ వెల్లడించింది. అదే సమయంలో ఎలక్ట్రిక్ వాహనాల ప్రయోజనాలు కూడా వినియోగదారులకు లభిస్తాయని పేర్కొంది. ధరలు ఎంతంటే? LiveWire S4 Honcho Trail ధర: 4,599 బ్రిటిష్ పౌండ్లు (సుమారు రూ.5.88 లక్షలు) LiveWire S4 Honcho Street ధర: 4,999 బ్రిటిష్ పౌండ్లు (సుమారు రూ.6.39 లక్షలు) యువతను ఆకర్షించే డిజైన్, మంచి రేంజ్, ఆకట్టుకునే పనితీరుతో ఈ కొత్త ఎలక్ట్రిక్ మినీ బైక్లు అంతర్జాతీయ మార్కెట్లో ప్రత్యేక గుర్తింపు తెచ్చుకునే అవకాశాలు కనిపిస్తున్నాయి.