FASTag: ఫాస్టాగ్ యూజర్లకు ఊరట: KYV ప్రక్రియను నిలిపివేసిన NHAI
ఈ వార్తాకథనం ఏంటి
ఫాస్టాగ్ యూజర్లకు పెద్ద ఊరట ఇచ్చేలా జాతీయ రహదారుల ప్రాధికార సంస్థ (NHAI) ఒక కీలక నిర్ణయం తీసుకుంది. ఇప్పుడు కొత్తగా కార్లు, జీప్లు, వ్యాన్లకు జారీ చేసే ఫాస్టాగ్లకు కేవైవీ (KYV) ప్రక్రియను నిలిపివేస్తోంది. NHAI ప్రకారం,ఈ నిబంధన ఫిబ్రవరి 1 నుంచి అమల్లోకి వస్తుంది,దీని ద్వారా లక్షలాది వాహన యజమానులకు సౌకర్యం కలుగుతుంది. వాహనానికి సంబంధించిన అన్ని డాక్యుమెంట్లు ఉన్నప్పటికీ, కేవైవీ ప్రక్రియ వల్ల ఫాస్టాగ్ యాక్టివేషన్ ఆలస్యం అవుతూ ఉండటాన్ని NHAI గుర్తించి,ఈ అవసరాన్ని రద్దు చేసింది.
వివరాలు
ఈ సందర్భాల్లో మాత్రమే కేవైవీ అవసరం
ఇప్పటివరకు జారీచేసిన కార్ల ఫాస్టాగ్లకూ కేవైవీ అవసరం లేదని NHAI స్పష్టంచేసింది. ఫాస్టాగ్ను సరిగా అతికించకపోవడం,దుర్వినియోగం వంటి సందర్భాల్లో మాత్రమే కేవైవీ అవసరం పడుతుంది. ఫాస్టాగ్ జారీ సమయంలో, బ్యాంకులు వాహన డేటాబేస్లోని వివరాలను సరిచూసి యాక్టివేట్ చేస్తాయి. కేవైవీ ప్రక్రియ ప్రధానంగా ఈ విషయాలను ధృవీకరిస్తుంది: ఫాస్టాగ్ సరైన వాహనానికి లింక్ చేసి ఉందా?విండ్ షీల్డ్కు సరిగా అతికించారా? లేదా? అనేది తెలుసుకోవడం కేవైవీ ప్రధాన లక్ష్యం. ఈ ప్రక్రియలో వాహనదారులు వాహన ముందు, పక్కవైపు ఫొటోలు, ఆర్సీ, విండ్షీల్డ్లో అతికించిన ఫాస్టాగ్ స్టిక్కర్ ఫోటోలను అప్లోడ్ చేయాల్సి ఉండేది. ఇప్పుడు కేవైవీ తొలగించబడటంతో ఈ సమస్యలు తొలగిపోతున్నాయి.