Toyota Rumion: టయోటా రూమియన్ ధరలు తగ్గింపు.. రూ.95 వేల వరకు తగ్గిన ఎంపీవీ

వ్రాసిన వారు Sirish Praharaju

Mar 06, 2026

05:30 pm

ఈ వార్తాకథనం ఏంటి

జపాన్ ఆటోమొబైల్ దిగ్గజం టయోటా కిర్లోస్కర్ మోటార్ తన ప్రముఖ ఎంపీవీ టయోటా రూమియన్ ధరలను తగ్గిస్తూ వినియోగదారులకు గుడ్ న్యూస్ చెప్పింది. కంపెనీ తాజాగా కొత్త ఎంట్రీ లెవల్ 'E' వేరియంట్ను మార్కెట్‌లోకి తీసుకొచ్చింది. దీని ఎక్స్‌షోరూమ్ ధర రూ.9.56 లక్షలు. ఈ కొత్త ట్రిమ్ రావడంతో రూమియన్ ఇప్పుడు దాదాపు రూ.95 వేల వరకు తక్కువ ధరలో అందుబాటులోకి వచ్చింది. ప్రస్తుతం ఈ ఎంపీవీ మొత్తం నాలుగు ట్రిమ్‌లలో విక్రయానికి ఉంది. అవి E, S, G, V వేరియంట్లు. కాగా టాప్ మోడల్ V వేరియంట్ ధర మాత్రం ఎక్స్‌షోరూమ్ ప్రకారం రూ.13.86 లక్షలుగా కొనసాగుతోంది.

వివరాలు

ధరలు

కొత్తగా వచ్చిన E పెట్రోల్ మాన్యువల్ వేరియంట్ ధర రూ.9.56 లక్షలు కాగా, S పెట్రోల్ మాన్యువల్ ధర రూ.10.51 లక్షలు. S CNG మాన్యువల్ వేరియంట్ రూ.11.40 లక్షలు, G పెట్రోల్ మాన్యువల్ రూ.11.64 లక్షలు. అలాగే S పెట్రోల్ ఆటోమేటిక్ ధర రూ.12.05 లక్షలు, V పెట్రోల్ మాన్యువల్ రూ.12.39 లక్షలు. G పెట్రోల్ ఆటోమేటిక్ రూ.13.11 లక్షలు కాగా, టాప్ V పెట్రోల్ ఆటోమేటిక్ వేరియంట్ ధర రూ.13.86 లక్షలుగా ఉంది.

వివరాలు

ఫీచర్స్

ఫీచర్ల విషయానికి వస్తే, కొత్త E ట్రిమ్లో ప్రాథమిక సౌకర్యాలు మాత్రమే ఇచ్చారు. ఇందులో హాలోజెన్ ప్రొజెక్టర్ హెడ్‌లైట్స్, LED టెయిల్ లైట్స్, 15 అంగుళాల స్టీల్ వీల్స్, డ్యూయల్ టోన్ ఇంటీరియర్ డిజైన్, ముందు-వెనుక పవర్ విండోలు, టిల్ట్ అడ్జస్టబుల్ స్టీరింగ్ వీల్ ఉన్నాయి. భద్రత పరంగా 6 ఎయిర్‌బ్యాగ్స్, ముందు సీట్లకు హైట్ అడ్జస్టబుల్ సీట్‌బెల్ట్స్, ABSతో EBD, ESP, హిల్ హోల్డ్ కంట్రోల్ వంటి సేఫ్టీ ఫీచర్లు అందించారు. అయితే S వేరియంట్‌తో పోలిస్తే ఈ కొత్త E ట్రిమ్‌లో కొన్ని ఫీచర్లు తొలగించారు.

వివరాలు

నేచురల్లి ఆస్పిరేటెడ్ పెట్రోల్ ఇంజిన్

ముఖ్యంగా ORVM టర్న్ ఇండికేటర్లు, బాడీ కలర్ డోర్ హ్యాండిల్స్,ఫ్రంట్ స్లైడింగ్ ఆర్మ్‌రెస్ట్, రెండో వరుసకు AC వెంట్స్, రిమోట్ కీ లెస్ ఎంట్రీ, టైప్-C చార్జింగ్ పోర్ట్స్, డే-నైట్ అడ్జస్టబుల్ IRVM, టచ్ కంట్రోల్ ఆడియో డిస్ప్లే,నాలుగు స్పీకర్లు, రెండు ట్వీటర్లు, స్టీరింగ్ మౌంటెడ్ కంట్రోల్స్, USB-AUX ఇన్‌పుట్, సెక్యూరిటీ అలారం వంటి సౌకర్యాలు ఇందులో ఉండవు. ఇంజిన్ విషయానికి వస్తే, E ట్రిమ్‌లో 1.5 లీటర్ నేచురల్లి ఆస్పిరేటెడ్ పెట్రోల్ ఇంజిన్ ఇచ్చారు. ఇది 103 హార్స్‌పవర్ శక్తిని ఉత్పత్తి చేస్తుంది. ఈ ఇంజిన్‌కు 5 స్పీడ్ మాన్యువల్ గేర్‌బాక్స్ మాత్రమే అందుబాటులో ఉంటుంది.

వివరాలు

ఆటోమేటిక్ ట్రాన్స్‌మిషన్ లేదా CNG ఆప్షన్ లేదు

ఇదే ఇంజిన్ ఇండియన్ మార్కెట్‌లో ఉన్న మారుతి సుజుకి ఎర్టిగా మోడల్‌లో కూడా ఉపయోగిస్తున్నారు. అయితే ఈ వేరియంట్‌లో ఆటోమేటిక్ ట్రాన్స్‌మిషన్ లేదా CNG ఆప్షన్ ఇవ్వలేదు. భారత మార్కెట్లో ఈ ఎంపీవీ కియా కారెన్స్ మరియు మారుతి సుజుకి ఎర్టిగా మోడళ్లకు పోటీగా నిలుస్తోంది.