8th Pay Commission: 8వ వేతన సంఘంపై కీలక అప్‌డేట్‌.. ఫిట్‌మెంట్‌ ఫ్యాక్టర్‌పై ఉత్కంఠ
ఈ వార్తాకథనం ఏంటి
కేంద్ర ప్రభుత్వ ఉద్యోగులు, పెన్షనర్లు ఎంతో ఆసక్తిగా ఎదురుచూస్తున్న 8వ వేతన సంఘం (8th Pay Commission) కీలక దశకు చేరుకుంది. ఈ కమిషన్ ఏర్పాటై 2026 నవంబరు 3 నాటికి ఏడాది పూర్తయింది. మొత్తం 18 నెలల్లో సిఫార్సులు సమర్పించాల్సి ఉండగా.. ఇప్పటికే 12 నెలలు గడిచిపోయాయి. అంటే నిర్ణయించిన గడువులో దాదాపు 66 శాతం పూర్తయింది. నివేదిక సమర్పించేందుకు ఇక ఆరు నెలల సమయం మాత్రమే మిగిలింది. దీంతో కొత్త వేతన నిర్మాణం, కనీస బేసిక్‌ పే, ఫిట్‌మెంట్‌ ఫ్యాక్టర్‌పై ఉద్యోగుల్లో ఆసక్తి పెరుగుతోంది.
వివరాలు
కమిషన్ తన సిఫార్సులను 18 నెలల్లో కేంద్ర ప్రభుత్వానికి సమర్పించాలి
కేంద్ర ప్రభుత్వం 2025 జనవరిలో 8వ వేతన సంఘం ఏర్పాటుపై ప్రకటన చేసింది.
అనంతరం అక్టోబరు 28న కేంద్ర కేబినెట్‌ కమిషన్ నిబంధనలకు ఆమోదం తెలిపింది. 2025 నవంబరు 3న అధికారికంగా గెజిట్‌ నోటిఫికేషన్‌ విడుదలైంది.
సుప్రీంకోర్టు మాజీ న్యాయమూర్తి జస్టిస్‌ రంజనా ప్రకాష్‌ దేశాయ్‌ ఈ కమిషన్‌కు ఛైర్‌పర్సన్‌గా వ్యవహరిస్తున్నారు.
కమిషన్ తన సిఫార్సులను 18 నెలల్లో కేంద్ర ప్రభుత్వానికి సమర్పించాల్సి ఉంటుంది.
ఈ లెక్కన 2027 మే 3 నాటికి నివేదిక అందించాలి. అయితే నివేదిక సమర్పించిన వెంటనే కొత్త జీతాలు అమల్లోకి వస్తాయని భావించకూడదు.
కమిషన్ సిఫార్సులను కేంద్ర ప్రభుత్వం పరిశీలించి, ఆమోదించిన తర్వాతే అమలుపై నిర్ణయం తీసుకుంటుంది.
వివరాలు
ఉద్యోగులు,పెన్షనర్లు,వివిధ సంఘాల నుంచి అభిప్రాయాలు సేకరిస్తున్న కమిషన్
ఇప్పటికే ఉద్యోగులు,పెన్షనర్లు,వివిధ సంఘాల నుంచి కమిషన్ అభిప్రాయాలు సేకరిస్తోంది.
ఇందులో భాగంగా పలు నగరాల్లో సంప్రదింపుల సమావేశాలు నిర్వహిస్తోంది.
2026 అక్టోబరు 22,23 తేదీల్లో ముంబైలోనూ సమావేశాలు జరిగాయి. వేతనాలు, పెన్షన్లు, అలవెన్సులు, ఇతర ఉద్యోగ ప్రయోజనాలపై సంఘాల ప్రతినిధుల అభిప్రాయాలను కమిషన్ తెలుసుకుంటోంది.
ఈసారి వేతన సంఘంలో ఉద్యోగులు ప్రధానంగా ఫిట్‌మెంట్‌ ఫ్యాక్టర్‌పై ఆశలు పెట్టుకున్నారు.
ప్రస్తుతం అందుకుంటున్న బేసిక్‌ పేను ఎంత మేర పెంచాలనే విషయంలో ఈ అంశం కీలకంగా ఉంటుంది.
6వ వేతన సంఘంలో ఫిట్‌మెంట్‌ ఫ్యాక్టర్‌ 1.86గా ఉండగా.. 7వ వేతన సంఘంలో 2.57గా ఉంది.
అయితే 8వ వేతన సంఘానికి సంబంధించి ఇప్పటివరకు ఎలాంటి ఫిట్‌మెంట్‌ ఫ్యాక్టర్‌ను అధికారికంగా ప్రకటించలేదు.
వివరాలు
మరో ఆరు నెలల్లో కమిషన్ నివేదిక
ప్రస్తుతం ప్రచారంలో ఉన్న అంచనాలను తుది నిర్ణయాలుగా భావించకూడదు.
ప్రస్తుతం 7వ వేతన సంఘం ప్రకారం కేంద్ర ప్రభుత్వ ఉద్యోగుల కనీస బేసిక్‌ పే నెలకు రూ.18,000గా ఉంది.
కొత్త కమిషన్ సిఫార్సులతో కనీస వేతనం, కరవు భత్యం (డీఏ), అలవెన్సులు, పెన్షన్‌, గ్రాట్యుటీ వంటి ప్రయోజనాల్లో మార్పులు వచ్చే అవకాశం ఉంది.
2026 జనవరి 1 నుంచి కొత్త వేతన సంఘం సిఫార్సులు అమల్లోకి రావచ్చని అంచనాలు ఉన్నప్పటికీ.. దీనిపై కేంద్ర ప్రభుత్వం ఇప్పటివరకు అధికారిక ప్రకటన చేయలేదు.
మరో ఆరు నెలల్లో కమిషన్ నివేదిక సమర్పించాల్సి ఉండటంతో ఉద్యోగులు తదుపరి ప్రకటనల కోసం ఆసక్తిగా ఎదురుచూస్తున్నారు.