Health Insurance: రెండు హెల్త్ ఇన్సూరెన్స్ పాలసీలతో ఒక హాస్పిటల్ బిల్లు క్లెయిమ్ చేసుకోవచ్చా?
ఈ వార్తాకథనం ఏంటి
అత్యవసర ఆరోగ్య పరిస్థితులను దృష్టిలో పెట్టుకుని చాలా మంది హెల్త్ ఇన్సూరెన్స్ తీసుకుంటున్నారు. ఉద్యోగుల్లో అయితే కంపెనీ ద్వారా అందించే మెడికల్ ఇన్సూరెన్స్ సాధారణంగా ఉంటుంది. అయితే, ఆ కవరేజీ సరిపోకపోవడం, చికిత్సలపై ఉండే పరిమితులు, ఉద్యోగం మారినప్పుడు ఎదురయ్యే సమస్యలు వంటి కారణాలతో చాలామంది అదనంగా వ్యక్తిగత ఆరోగ్య బీమా పాలసీని కూడా తీసుకుంటున్నారు. నిపుణుల ప్రకారం, ఒకే పాలసీ కవరేజీ సరిపోకపోతే మిగిలిన మొత్తాన్ని మరో పాలసీ ద్వారా క్లెయిమ్ చేసుకోవచ్చు. కానీ దీనికి ఒక ముఖ్యమైన నిబంధన ఉంది. మీరు తీసుకున్న రెండు ఆరోగ్య బీమా పాలసీల వివరాలను సంబంధిత బీమా సంస్థలకు ముందుగానే తెలియజేయాలి. ఈ విషయాన్ని తెలియజేయకపోవడం వల్ల క్లెయిమ్లు తిరస్కరించబడే అవకాశం ఎక్కువగా ఉంటుంది.
వివరాలు
ఆసుపత్రి ఖర్చులను మించకూడదు
అలాగే, రెండు పాలసీల ద్వారా పొందే మొత్తం రీయింబర్స్మెంట్ ఆసుపత్రి ఖర్చులను మించకూడదు. ఒకే వైద్య ఖర్చును రెండు సార్లు క్లెయిమ్ చేయడం అనుమతించబడదు. ఇది బీమా నియమాలకు వ్యతిరేకం. ఉదాహరణకు, ఒక వ్యక్తికి ఆసుపత్రి బిల్లు రూ.10 లక్షలు వచ్చినట్లయితే, అతనికి కంపెనీ పాలసీ కింద రూ.5 లక్షల కవరేజీ, వ్యక్తిగత పాలసీ కింద మరో రూ.5 లక్షల కవరేజీ ఉంటే, ముందుగా కంపెనీ పాలసీని ఉపయోగించాలి. ఆ తరువాత మిగిలిన మొత్తం కోసం వ్యక్తిగత పాలసీ ద్వారా క్లెయిమ్ చేసుకోవాలి. మొదటి బీమా సంస్థ వద్ద సమర్పించిన బిల్లులు, సెటిల్మెంట్ వివరాలను రెండో బీమా సంస్థకు తప్పనిసరిగా అందించాలి.
వివరాలు
ఉద్యోగ సంస్థ అందించే హెల్త్ ఇన్సూరెన్స్ను ముందుగా వినియోగించండి
ఉద్యోగ సంస్థ అందించే హెల్త్ ఇన్సూరెన్స్ను ముందుగా వినియోగించడం మంచిది. ఎందుకంటే ఉద్యోగం మారితే ఆ పాలసీ ప్రయోజనం నిలిచిపోవచ్చు. అదే సమయంలో, వ్యక్తిగతంగా తీసుకున్న పాలసీని క్లెయిమ్ చేయకుండా కొనసాగిస్తే, రిన్యువల్ సమయంలో నో-క్లెయిమ్ బోనస్ లేదా ప్రీమియం తగ్గింపు వంటి ప్రయోజనాలు పొందే అవకాశం ఉంటుంది.
వివరాలు
హెల్త్ ఇన్సూరెన్స్ క్లెయిమ్ రిజెక్ట్ కావడానికి ప్రధాన కారణాలు ఇవే:
పూర్తి వివరాలు ఇవ్వకపోవడం: ఒక పాలసీతో చేసిన క్లెయిమ్ గురించి మరో బీమా సంస్థకు తెలియజేయకపోవడం. డూప్లికేట్ క్లెయిమ్స్ ప్రయత్నించడం: ఒకే ఆసుపత్రి ఖర్చును రెండుసార్లు క్లెయిమ్ చేయడం. డాక్యుమెంట్స్ లోపం: అవసరమైన బిల్లులు, సెటిల్మెంట్ సర్టిఫికేట్లు సమర్పించకపోవడం. ఆలస్యంగా సమాచారం ఇవ్వడం: క్లెయిమ్ విషయాన్ని బీమా సంస్థకు సమయానికి తెలియజేయకపోవడం.