Egg Prices: గుడ్డు ధరలకు రెక్కలు.. ఏడాదిలో 40% పెరుగుదల.. చలికాలంలో మరింత పెరిగే అవకాశం!
ఈ వార్తాకథనం ఏంటి
దేశంలో గుడ్డు ధరలు గత ఏడాది కాలంగా గణనీయంగా పెరిగాయి. ప్రస్తుతం ఒక్క గుడ్డు ధర దాదాపు 40శాతం వరకు పెరిగినట్లు నేషనల్ ఎగ్ కో-ఆర్డినేషన్ కమిటీ (ఎన్ఈసీసీ) అంచనా వేసింది. రాబోయే చలికాలంలో గుడ్లకు డిమాండ్ పెరగడంతో ధరలు మరింత పెరిగే అవకాశం ఉందని పౌల్ట్రీ పరిశ్రమ వర్గాలు చెబుతున్నాయి. గుడ్డు ధరల పెరుగుదల వెనుక ప్రధానంగా మొక్కజొన్న కొరత ప్రభావం కనిపిస్తోంది. మొక్కజొన్నను కోళ్ల దాణాలో ఎక్కువగా ఉపయోగిస్తారు. అయితే ప్రస్తుతం మొక్కజొన్నలో గణనీయమైన భాగాన్ని ఇథనాల్ తయారీకి మళ్లిస్తున్నారు. దీంతో పౌల్ట్రీ రైతులకు అందుబాటులో ఉండే మొక్కజొన్న పరిమాణం తగ్గి.. దాణా ఖర్చులు పెరుగుతున్నాయి.
వివరాలు
చలికాలంలో పెరగనున్న గుడ్ల ధరలు.. వినియోగం పెరిగితే మరింత భారం
ఎన్ఈసీసీ ప్రకారం.. గత ఏడాది కాలంలో గుడ్డు ధరలు సుమారు 35 నుంచి 40 శాతం పెరిగాయి.
ప్రస్తుతం రైతుల వద్ద ఒక్క గుడ్డు ధర దాదాపు రూ.7గా ఉంది. రిటైల్ మార్కెట్లో వినియోగదారులు ఒక్క గుడ్డుకు రూ.8.50 నుంచి రూ.9 వరకు చెల్లిస్తున్నారు.
వచ్చే నెలలో కూడా గుడ్డు ధరలు అధికంగానే ఉండొచ్చని పరిశ్రమ వర్గాలు అంచనా వేస్తున్నాయి.
ముఖ్యంగా చలికాలం ప్రారంభమయ్యే కొద్దీ ధరలు మరింత పెరిగే అవకాశం ఉందని పౌల్ట్రీ అధికారులు చెబుతున్నారు.
సాధారణంగా చలికాలంలో దేశంలో గుడ్ల వినియోగం పెరుగుతుంది. దీంతో సరఫరాపై అదనపు ఒత్తిడి ఏర్పడే అవకాశం ఉంది.
వివరాలు
ఇథనాల్ తయారీకి మళ్లుతున్న మొక్కజొన్న.. గుడ్డు ధరలపై ప్రభావం
దేశంలో ఉత్పత్తి అవుతున్న మొక్కజొన్నలో దాదాపు 37 శాతం ప్రస్తుతం ఇథనాల్ తయారీ కేంద్రాలకు వెళ్తున్నట్లు ఎన్ఈసీసీకి చెందిన ఓ సీనియర్ అధికారి తెలిపారు.
గత ఏడాది గుడ్డు ధరలు దాదాపు 40 శాతం పెరగడానికి మొక్కజొన్న మళ్లింపు కూడా ఒక కారణమని ఆయన పేర్కొన్నారు.
పెట్రోల్పై సాంప్రదాయ ఇంధనాలపై ఆధారపడటాన్ని తగ్గించేందుకు కేంద్ర ప్రభుత్వం ఇథనాల్ కార్యక్రమాన్ని అమలు చేస్తోంది.
పెట్రోల్లో జీవ ఇంధనాన్ని కలిపి విక్రయించేలా చమురు సంస్థలకు లక్ష్యాలను నిర్దేశించింది.
ప్రస్తుతం పెట్రోల్లో ఇథనాల్ కలపడం 20 శాతానికి చేరింది. ఇందుకోసం చెరకు, మొక్కజొన్న వంటి పంటలను పెద్ద మొత్తంలో వినియోగిస్తున్నారు.
వివరాలు
మొక్కజొన్న ధరల పెరుగుదలతో పౌల్ట్రీ రైతులపై పెరుగుతున్న భారం
ఇథనాల్ తయారీకి చెరకును ఎక్కువగా మళ్లించడం వల్ల చక్కెర తయారీకి అందుబాటులో ఉండే చెరకు తగ్గుతోంది.
అదే విధంగా మొక్కజొన్నను ఇథనాల్ ఉత్పత్తికి వినియోగించడం వల్ల కోళ్ల దాణాకు దాని లభ్యత తగ్గుతోంది.
దీంతో ఒకే పంట కోసం పౌల్ట్రీ, ఇథనాల్ పరిశ్రమలు పోటీ పడుతున్న పరిస్థితి ఏర్పడింది.
మూడేళ్ల క్రితం టన్ను మొక్కజొన్న ధర సుమారు రూ.14,000గా ఉండగా.. ఇప్పుడు అది దాదాపు రూ.26,500కు చేరింది.
గత ఐదు నెలల్లోనే మొక్కజొన్న ధర దాదాపు 20శాతం పెరిగినట్లు 'ది ఎకనామిక్ టైమ్స్' పేర్కొంది.
మొక్కజొన్న ధర పెరగడం పౌల్ట్రీ రైతులపై నేరుగా ప్రభావం చూపుతోంది.
వివరాలు
మొక్కజొన్న ధరల పెరుగుదలతో పౌల్ట్రీ రైతులపై పెరుగుతున్న భారం
కోళ్ల పెంపకంలో మొక్కజొన్న అతిపెద్ద ఖర్చుగా ఉంటుంది. మొత్తం పౌల్ట్రీ ఉత్పత్తి వ్యయంలో మొక్కజొన్న వాటా దాదాపు 65 నుంచి 70 శాతం వరకు ఉంటుందని పరిశ్రమ వర్గాలు చెబుతున్నాయి.
దీంతో మొక్కజొన్న ధరలు ఎక్కువ కాలం పెరిగితే రైతుల లాభాలపై తీవ్ర ప్రభావం పడుతుంది.
చివరకు పెరిగిన ఖర్చులో కొంత భాగాన్ని గుడ్లు, చికెన్ ధరల రూపంలో వినియోగదారులపైకి మళ్లించే పరిస్థితి ఏర్పడుతుంది.
పార్లమెంటరీ గణాంకాల ప్రకారం దేశంలో ఏటా సుమారు 4.34 కోట్ల టన్నుల మొక్కజొన్న ఉత్పత్తి అవుతోంది.
ఇందులో దాదాపు 1.7 కోట్ల టన్నులు ప్రస్తుతం ఇథనాల్ తయారీకి ఉపయోగిస్తున్నారు. దీంతో పౌల్ట్రీ దాణాతో పాటు ఇతర పరిశ్రమలకు అందుబాటులో ఉండే మొక్కజొన్న తగ్గుతోంది.
వివరాలు
మొక్కజొన్న కోసం పౌల్ట్రీ, ఇథనాల్ పరిశ్రమల మధ్య పెరుగుతున్న పోటీ
మొక్కజొన్న ఆధారిత ఇథనాల్ ఉత్పత్తి ఇటీవలి కాలంలో వేగంగా పెరిగింది.
2022లో ఇది సుమారు 10లక్షల టన్నుల స్థాయిలో ఉండగా.. 2024లో 60లక్షల టన్నులు దాటింది.
ప్రస్తుతం ఇది దాదాపు 1.7 కోట్ల టన్నులకు చేరింది. 2030 నాటికి ఇథనాల్ కోసం మొక్కజొన్న వినియోగం 2.5 కోట్ల టన్నులకు చేరవచ్చని నిపుణులు అంచనా వేస్తున్నారు.
అదే జరిగితే దేశీయంగా మొక్కజొన్న కోసం పోటీ మరింత పెరిగే అవకాశం ఉంది.
దేశంలో ఉత్పత్తి అయ్యే మొక్కజొన్నలో సుమారు 60శాతం ఇప్పటికే పౌల్ట్రీ పరిశ్రమ వినియోగిస్తోంది.
ఇప్పుడు ఇథనాల్ పరిశ్రమ కూడా అదే పంటకు పెద్ద మొత్తంలో డిమాండ్ చేస్తోంది.
దీంతో పరిమితంగా ఉన్న మొక్కజొన్న సరఫరా కోసం రెండు రంగాల మధ్య పోటీ పెరుగుతోంది.
వివరాలు
మొక్కజొన్న కోసం పౌల్ట్రీ, ఇథనాల్ పరిశ్రమల మధ్య పెరుగుతున్న పోటీ
అయితే గుడ్డు, పౌల్ట్రీ ఉత్పత్తుల ధరలు పెరగడానికి ఇథనాల్ మాత్రమే కారణం కాదని పరిశ్రమ వర్గాలు చెబుతున్నాయి.
కోళ్లపై వేడి వాతావరణం ప్రభావం, మరణాల శాతం, వాతావరణ పరిస్థితుల్లో మార్పులు, దిగుమతి చేసుకునే దాణా పదార్థాల లభ్యత, వాటి ధరలు కూడా ఉత్పత్తి వ్యయాన్ని, మార్కెట్ ధరలను గణనీయంగా ప్రభావితం చేస్తాయని ఓ సీనియర్ పరిశ్రమ అధికారి తెలిపారు.