Electric PV sales : భారత్‌లో ఈవీల జోరు.. సెప్టెంబర్‌లో రికార్డు స్థాయికి చేరిన అమ్మకాలు
ఈ వార్తాకథనం ఏంటి
భారత్‌లో ఎలక్ట్రిక్ వాహనాల (EV) మార్కెట్ వేగంగా విస్తరిస్తోంది. సెప్టెంబర్‌లో దేశవ్యాప్తంగా ఈవీ రిటైల్ విక్రయాలు సరికొత్త రికార్డును నమోదు చేశాయి. ఒక్క నెలలోనే మొత్తం 3,33,634 ఎలక్ట్రిక్ వాహనాలు విక్రయమయ్యాయి. గత ఏడాది సెప్టెంబర్‌లో నమోదైన అమ్మకాలతో పోలిస్తే ఈసారి 74 శాతం వృద్ధి నమోదైంది. ఈ వివరాలను ఆటోమొబైల్ డీలర్స్ అసోసియేషన్స్ సమాఖ్య (FADA) బుధవారం వెల్లడించింది. ఈవీ విక్రయాలపై ఫాడా అధ్యక్షుడు సాయి గిరిధర్ స్పందించారు. గతేడాదితో పోలిస్తే వృద్ధి కనిపించడం మాత్రమే కాకుండా.. సెప్టెంబర్ అమ్మకాలు కొత్త ఆల్‌టైమ్ రికార్డుగా నిలిచాయని తెలిపారు.
వివరాలు
వినియోగదారుల నుంచి పెరుగుతున్న డిమాండ్
పండగ సీజన్‌లో పెరిగిన కొనుగోళ్ల ఆసక్తి, పెట్రోల్ వాహనాలతో పోలిస్తే ఈవీలకు తక్కువగా ఉండే నిర్వహణ వ్యయం, కొత్త మోడళ్ల రాక, కేంద్ర ప్రభుత్వం అమలు చేస్తున్న పీఎం ఈ-డ్రైవ్ వంటి పథకాలు ఈ వృద్ధికి కీలకంగా మారాయని వివరించారు.
ఈవీలకు ప్రస్తుతం లభిస్తున్న ఆదరణ కేవలం ప్రభుత్వ సబ్సిడీల కారణంగా మాత్రమే కాదని సాయి గిరిధర్ పేర్కొన్నారు.
వినియోగదారుల నుంచి పెరుగుతున్న డిమాండ్ కూడా ఈవీ మార్కెట్ విస్తరణకు ప్రధాన కారణంగా మారిందని స్పష్టం చేశారు.
వాహనాల విభాగాల వారీగా చూస్తే.. ఎలక్ట్రిక్ ద్విచక్ర వాహనాల అమ్మకాలు భారీగా పెరిగాయి.
గతేడాదితో పోలిస్తే 88.67 శాతం వృద్ధితో సెప్టెంబర్‌లో 2,07,314 యూనిట్ల విక్రయాలు నమోదయ్యాయి.
వివరాలు
4,188 యూనిట్లకు చేరిన ఎలక్ట్రిక్ కమర్షియల్ వాహనాల అమ్మకాలు
ఎలక్ట్రిక్ ప్యాసింజర్ కార్ల అమ్మకాలు కూడా 94.56 శాతం పెరిగి 36,108 యూనిట్లకు చేరాయి.
ఈ రెండు విభాగాల్లోనూ సెప్టెంబర్ విక్రయాలు ఇప్పటివరకు నమోదైన అత్యధిక స్థాయికి చేరడం విశేషం.
ఇక ఎలక్ట్రిక్ త్రీ వీలర్ల విక్రయాలు 86,024 యూనిట్లుగా నమోదయ్యాయి. ఎలక్ట్రిక్ కమర్షియల్ వాహనాల అమ్మకాలు 4,188 యూనిట్లకు చేరాయి.
మొత్తంగా దేశంలోని మొత్తం వాహన విక్రయాల్లో ఎలక్ట్రిక్ వాహనాల వాటా కూడా పెరిగింది.
గత ఏడాది ఇదే సమయంలో 10 శాతంగా ఉన్న ఈవీల వాటా.. ప్రస్తుతం 13 శాతానికి చేరింది.
సెప్టెంబర్‌లో నమోదైన రికార్డు విక్రయాలతో భారత్‌లో ఎలక్ట్రిక్ వాహనాలపై వినియోగదారుల ఆసక్తి మరింత బలపడుతున్నట్లు స్పష్టమవుతోంది.