Google Shares: గూగుల్ షేర్లలో భారీ పతనం.. ఒక్కరోజే రూ.47 లక్షల కోట్ల సంపద ఆవిరి!
ఈ వార్తాకథనం ఏంటి
టెక్ దిగ్గజం గూగుల్ మాతృసంస్థ అల్ఫాబెట్‌కు స్టాక్ మార్కెట్‌లో భారీ ఎదురుదెబ్బ తగిలింది. గురువారం కంపెనీ షేర్లు ఒక్కసారిగా పడిపోవడంతో సంస్థ మార్కెట్ విలువ భారీగా తగ్గింది. ఒక్కరోజులోనే దాదాపు 500 బిలియన్ డాలర్ల సంపద ఆవిరైంది. భారత కరెన్సీలో ఈ మొత్తం రూ.47 లక్షల కోట్లకు పైమాటే. ఆర్టిఫిషియల్ ఇంటెలిజెన్స్ (ఏఐ) రంగంలో భారీగా పెట్టుబడులు పెడుతున్నప్పటికీ, వాటి ద్వారా ఆశించిన స్థాయిలో లాభాలు వస్తాయా? అనే సందేహాలు ఇన్వెస్టర్లలో నెలకొన్నాయి. దీనికి తోడు ఏఐ టెక్నాలజీ విస్తరణతో గూగుల్ సెర్చ్ ద్వారా వచ్చే ఆదాయానికి గండిపడుతుందనే ఆందోళనలు కూడా షేర్ల పతనానికి కారణమయ్యాయి. ఫలితంగా అల్ఫాబెట్ స్టాక్స్ గత ఆరు నెలల్లో ఎన్నడూ లేనంత కనిష్ఠ స్థాయికి చేరుకున్నాయి.
వివరాలు
ఏఐ సమ్మరీలతో ప్రకటనల ఆదాయానికి గండి!
గూగుల్ సెర్చ్‌లో ఏఐ ఆధారిత సమ్మరీలు అందుబాటులోకి రావడం కంపెనీ ఆదాయంపై ప్రభావం చూపుతోంది.
సెర్చ్ ఫలితాల్లోనే వినియోగదారులకు అవసరమైన సమాచారం అందుబాటులోకి వస్తుండటంతో ప్రకటనల ద్వారా వచ్చే ఆదాయం తగ్గుతోందని కంపెనీ వెల్లడించింది.
ఈ పరిణామం ఇన్వెస్టర్లలో ఆందోళన పెంచింది. దీంతో గూగుల్ మాతృసంస్థ అల్ఫాబెట్ షేర్లు ఆరు నెలల కనిష్ఠానికి పడిపోయాయి.
ఫలితంగా కంపెనీ మార్కెట్ విలువ 3.97 ట్రిలియన్ డాలర్ల నుంచి 3.46 ట్రిలియన్ డాలర్లకు తగ్గింది.
ఏఐ రంగంలో పెట్టుబడులు పెంచుతున్న సమయంలోనే ప్రధాన ఆదాయ వనరైన సెర్చ్ వ్యాపారంపై ప్రతికూల ప్రభావం కనిపించడం కంపెనీకి సవాలుగా మారింది.